Nəqliyyat Nazirliyi yollardan yığışdırılan müfəttişlərin aqibətilə bağlı məsələyə aydınlıq gətirib.

Qurumun sözçüsü Namiq Həsənov XəzərNews.az-a bildirib ki, artıq ötən aydan Nəqliyyat Nazirliyinin müfəttişlərinin yollarda fəaliyyətinə xitam verilib və bundan sonra onlar fəaliyyət göstərməyəcəklər: “Hazırda müfəttişlərin bundan sonra Nəqliyyat Nazirliyində hansı işlərlə məşğul olması məsələləri araşdırılır və yeni fəaliyyətləri müəyyənləşdirilir. Əmək qanunvericiliyinə uyğun olaraq onların fəaliyyətləri müəyyən ediləcək. Razılaşan qalıb işləyəcək, istəməyən də öz ərizəsi ilə işdən gedəcək. Hazırda müfəttişlərin siyahısı müəyyənləşdirilir. Gələn həftə konkret olaraq müfəttişlərin fəaliyyəti ilə bağlı ictimayyətə ətraflı məlumat veriləcək”.

Xatırladaq ki, Prezidentin 14 oktyabr 2015-ci il tarixli Fərmanı ilə Nəqliyyat Nazirliyinin inzibati xətalara baxmaqla bağlı xeyli səlahiyyətləri alınaraq Dövlət Yol Polisinə verilib. Həmçinin ölkə başçısının digər göstərişi ilə artıq taksi fəaliyəti üçün lisenziya və fərqlənmə nişanı ASAN xidmət tərəfindən veriləcək.

Prezidentin Fərmanından sonra elə həmin gündən Nəqliyyat Nazirliyinin tərkibində Bakı Sərnişin və Yük Daşımalarının Təşkili şöbəsinin fəaliyyəti dayandırılıb. Çox guman ki, onların fəaliyyəti bundan sonra davam etməyəcək.