“Texnikabank” bir ailənin evini ələ keçirmək istəyir

Həbsdən yaxa qurtaran “Texnikabank”ın idarə heyətinin sədri Etibar Əliyev banka yenidən rəhbər qayıtmasına baxmayaraq, bu bankda problemlər hələ də qalmaqdadır. Artıq vətəndaşları məhkəməyə çəkən bank rəhbərliyi onların hüquqlarını da pozmağa çalışır. Amma məhkəmələr bankın xeyrinə yox, vətəndaşın xeyrinə qərar çıxarır.

Etibar Əliyev bankın rəhbərliyindən kənarlaşdırılandan sonra bu bankın adı dəyişdirilib. Bankın yeni adı “Bank Technique” Açıq Səhmdar Cəmiyyəti adlandırılıb. Həmin bank sabiq milli təhlükəsizlik naziri Eldar Mahmudovun qudası, Azərbaycan Beynəlxalq Bankının rəhbəri Cahangir Hacıyevin izarədarlığına verilib.

Amma sonradan bankda aparılan qanunsuz əməllər aşkar edilib və bank Cahangir Hacıyevdən alınıb. İndi yenə də banka Etibar Əliyev rəhbərlik edir. Buna baxmayaraq bankda qanunsuz hərəkətlər davam edir, həm də bank vətəndaşları məhkəmələrə çəkir, onları yersiz olaraq məhkəmə qərarıları ilə cərmələməyə çalışır. Beliklə iflas dönəmində olan bank səhimlərini artırmağa çalışır.

Bankın müştərisinə qarşı qaldırdığı iddialardan biri də İlham Kərimov, Gülbəniz Kərimova və Könül Vəlizadə olub. Bank iddia edib ki, sözü gedən şəxslərdən 46858,35 manat tutularaq bankın hesabına köçürülməlidir.

Bankın hiyləsi

Həmçinin bank iddia ərizəsində İlham Kərimova məxsus olan Qəbələ rayonu, Çuxur Qəbələ kəndində 0,37 ha torpaq sahəsində yerləşən 2 mərtəbəli, 4 otaqlı fərdi yaşayış evi ələ keçirməyə çalışıb. Bank həmin evin açıq hərracdan satılması, bankın kredit tələbinin satılmış əmlakın hesabına ödənilməsi istəyib.

Həmçinin İlham Kərimova məxsus ipoteka olunan evdə yaşayan ailə üzvləri - Kərimova Gülbəniz Nəcməddin qızı və Vəlizadə Könül İlham

qızı, həmçinin ipoteka müqaviləsi bağlandıqdan sonra evə qeydiyyata düşən şəxslərin 1 ay ərzində həmin evi tərk etmədikəri halda onların məcburi qaydada çıxarılması barədə qətnamənin qəbul edilməsi istənilib.

Qəbələ Rayon Məhkəməsinin iddia üzrə bankın İlham Kərimova olan borcunu 39421,99 manat məbləğində olmasını müəyyən edib. Məhkəmə ipoteka predmeti olan Qəbələ rayonu, Çuxur Qəbələ kəndində 0,37 ha torpaq sahəsində yerləşən 2 mərtəbəli, 4 otaqlı fərdi yaşayış evinin ilkin satış qiymətini 120000 manat məbləğində müəyyən edib.

Məhkəmə qətnaməsi niyə bankın rəhbərliyini narazı salıb?

Qətnamədə qeyd edilir ki, ipoteka predmeti olan həmin bağ evi açıq hərracda satılması, onun satışından əldə olunmuş pul vəsaitinin iddiaçıya ödənilməsi, həmin məbləğ ödənildikdən sonra ipoteka predmetinin hərracda satışından əldə olunmuş pul vəsaitinin qalan hissəsinin İlham Kərimova qaytarılması barədə qətnamə qəbul edilib.

Məhkəmənin qətnaməsindən bankın rəhbərliyi narazı qalıb və apelyasiya şikayəti verib. Apelyasiya şikayəti araşdırılması üçün Şəki Apelyasiya Məhkəməsinə göndərilib. Şikayət hakim Mahir Əsədlinin sədrlik etdiyi kollegiyada araşdırılıb.

Bankın nüyəndəsi məhkəmədə nə dedi?

Prosesdə çıxış edən bankın nümayəndəsi Elxan Gülməmmədov bildirib ki, birinci instansiya məhkəməsi ipoteka predmeti olan əmlaka 120000 manat ilkin satış qiyməti müəyyən edib. Lakin bu qiymət hazırki bazar qiyməti ilə müqayisədə şişirdilmiş bir qiymətdir. Tərəflər arasında bağlanaraq rəsmiləşdirilmiş 24 iyul 2009-cu il tarixli ipoteka müqaviləsi ilə həmin əmlak 115000 manat müəyyən edilib”.

Nümayəndənin sözlərinə görə, bank tərəfindən təkrar ekspertiza təyin edilməsi barədə məhkəməyə vəsatət verilib, lakin məhkəmə vəsatətə heç bir münasibət bildirmədən qətnaməni elan edib: “Ona görə də Qəbələ Rayon Məhkəməsinin qətnaməsi qismən-ipoteka predmeti olan əmlaka 120000 manat ilkin satış qiymətinin müəyyən edilməsi hissəsində ləğv edilməli, qətnamə qalan hissədə dəyişdirilmədən saxlanılmalıdır”.

Cavabdehlərə məhkəmənin yeri və vaxtı barədə məlumat verilsə də, onlar məhkəmədə iştirak etməyiblər. İlham Kərimov və digər şəxslər məhkəməyə teleqrama vuraraq prosesin başqa vaxta keçirilməsini istəyiblər. Amma hakim belə nəticəyə gəlib ki, cavabdehlər heç bir səbəb olmadan məhkəmədə iştirak etməyiblər. Buna görə də məhkəmənin başqa günə təxirə salınmasına heç bir əsas görülməyib.

Tərəflərin fikirlərini öyrənən hakimlər iş üzrə qətnaməni açıqlayıblar. Qətnaməyə görə, bankın apelyasiya şikayəti təmin edilməyib və Qəbələ Rayon Məhkəməsinin qətnaməsi qüvvədə saxlanılıb.

gundemxeber.az