Etibarlı mənbənin israrla bildirdiyi məlumatda bildirilir ki, qəzanı şəxsən baş memar, ixtisasca fizika müəllimi olan Azad Əliyevin özü törətsə də, bu gün məsuliyyət yükü onun sürücüsü Elnar Ələkbərovun üzərinə qoyulur

Bir çox media orqanlarına, o cümlədən “Gündəm Xəbər”ə verilən məlumatda bildirilir ki, 07 noyabr 2015-ci il tarixdə Gəncə şəhər memarlıq və tikinti şöbəsinin baş memarı Əliyev Azad Akif oğlunun xidmətində olan “Hyundai” markalı “20 AA 011” dövlət qeydiyyat nişanlı avtomobili “VAZ – 2106” markalı avtomobillə toqquşur. Qəza nəticəsində “VAZ-2106”-da olan iki nəfər gənc–Gəncə şəhər sakinləri 22 yaşlı Sənan Əkbərli və 18 yaşlı Tofiq Əlizadə, Gəncə şəhər Təcili Tibbi Yardım Xəstəxanasının Travmatologiya şöbəsinə yerləşdirilirlər. Onların vəziyyətinin normal olduğu bildirildirilsə də, hal-hazırda hadisə ilə bağlı Gəncə şəhər Baş Polis İdarəsində araşdırmalar davam etdirilməkdədir. Baş verən yol-nəqliyyat hadisəsi gizlinləri ilə bağlı bir çox məlumatlar, mediayaya da sızmışdır. Aparılan araşdırmalar zamanı o da məlum olmuşdur ki, gənclərin səhhəti heç də normal deyil və baş verən yol-nəqliyyat hadisəsi zamanı, hər iki gənc ağır bədən xəsarətləri almışlar. Yəni, onlardan birinin dalağı və bir böyrəyi çıxarılmış, digəri isə kəllə-beyin travması almışdır.
O halda sual oluna bilər ki, görəsən Gəncə şəhər memarlıq və tikinti şöbəsinin baş memarı vəzifəsini daşıyan Əliyev Azad Akif oğlunun istifadəsində olan “20 AA 011” dövlət qeydiyyat nişanlı xidməti avtomobillə qəzanı kim törədib? Bu haqda məlumatı verən mənbə bildirir ki, qəzanı Gəncə şəhər memarlıq və tikinti şöbəsinin baş memarı Azad Əliyev törətsə də, çox keçmir ki, qəzaya səbəbkar onun sürücüsü Ələkbərov Elnar Surxay oğlunun olduğu bildirildi. “Gündəm Xəbər”ə verilən başqa bir məlumat isə, daha çox diqqəti cəlb etməkdədir. Belə ki, hadisə baş verən zaman Gəncə şəhər Narkoloji Dispanserdə həm baş memar Azad Əliyev, həm də onun sürücüsü Elnar Ələkbərov eyni gündə müayinə olunurlar və hər ikisinin də sərxoş olmaması haqda rəy də yazılır. Görəsən qəza baş verən zaman “20 AA 011” dövlət qeydiyyat nişanlı avtomobili neçə nəfər idarə edib? Maraq kəsb edən hal odur ki, əgər nəqliyyat vasitəsinin bir sükanı olursa, o halda hər iki şəxsin müayinədən keçməsinə səbəb nə olub? Yəqin ki, belə bir sualın cavabını əgər silinməyibsə şəhərdəki kameraların köməyi ilə də aydınlaşdırmaq olar.
Etibarlı mənbənin israrla bildirdiyi məlumatda deyilir ki, qəzanı şəxsən baş memar, ixtisasca fizika müəllimi olan Azad Əliyevin özü törətsə də, bu gün məsuliyyət yükü onun sürücüsü Elnar Ələkbərovun üzərinə qoyulur. Hadisədən sonra sürücü ilk öncə məsuliyyəti üzərinə götürməsə də, bu gün isə verilən məlumatlarda bildirilir ki, o mövqeyini dəyişib.
Bundan əlavə, “Gündəm Xəbər”ə daxil olan məlumatda bildirilir ki, zərərçəkənlər qəza törədəni tanısalar da, adı çəkilən hər iki şəxs hal-hazırda da azadlıqdadırlar. Mənbə onu da bildirir ki, Azad Əliyev gənclərə ciddi xəsarətlər yetirməsi müqabilində, onlardan hər birinə əvvəlcə 50 min manat, sonra isə 60 min manat pul təklif edib. Baş verən yol-nəqliyyat hadisəsi ilə bağlı Gəncə şəhər Baş Polis İdarəsində aparılan müəmmalı ləng araşdırmalar, bir daha onu söyləməyə əsas verir ki, hadisəni sürücünü Elnar Ələkbərov deyil, şəxsən Azad Əliyevin özü törədib.
Araşdırmalarımız davam edir.
Mehriban Əzizqızı
“Gündəm Xəbər”