Baş memar məsuliyyəti sürücüsünün boynuna qoydurur

Gündəm Xəbər”ə verilən məlumatda bildirilir ki, qəzanı şəxsən baş memar, ixtisasca fizika müəllimi olan Azad Əliyevin özü törətsə də, bu gün məsuliyyət yükünü o, sürücüsünün üzərinə qoydurur
Son günlər Gəncədə baş verən hadisələr, diqqəti cəlb edən bir çox olaylar tam əksəriyyətin müzakirə etdiyi mövzulardan birinə çevrilir ki, onlardan biri də, şəhərin baş memarının adı ətrafında yaşananlardır. Belə ki, bu gün ayrı-ayrı mətbu orqanlara, o cümlədən “Gündəm Xəbər” qəzetinə də verilən məlumatlarda bildirilir ki, 07 noyabr 2015-ci il tarixdə Gəncə şəhər memarlıq və tikinti şöbəsinin baş memarı Əliyev Azad Akif oğlunun xidməti istifadəsində olan “Hyundai” markalı “20 AA 011” dövlət qeydiyyat nişanlı avtomobili, “VAZ–2106” markalı avtomobillə toqquşur. Qəza nəticəsində “VAZ-2106”-da olan iki nəfər gənc–Gəncə şəhər sakinləri 22 yaşlı Sənan Əkbərli və 18 yaşlı Tofiq Əlizadə, Gəncə şəhər Təcili Tibbi Yardım Xəstəxanasının Travmatologiya şöbəsinə yerləşdirilirlər. Onların vəziyyətinin normal olduğu bildirildirilsə də, hal-hazırda hadisə ilə bağlı Gəncə şəhər Baş Polis İdarəsində araşdırmalar davam etdirilməkdədir. Baş verən yol-nəqliyyat hadisəsi gizlinləri ilə bağlı bir çox məlumatlar, mediayaya da sızmışdır. Aparılan araşdırmalar zamanı o da məlum olmuşdur ki, gənclərin səhhəti heç də normal deyil və baş verən yol-nəqliyyat hadisəsi zamanı, hər iki gənc ağır bədən xəsarətləri almışlar. Yəni, onlardan birinin dalağı və bir böyrəyi çıxarılmış, digəri isə kəllə-beyin travması almışdır.
O halda sual oluna bilər ki, görəsən Gəncə şəhər memarlıq və tikinti şöbəsinin baş memarı vəzifəsini daşıyan Əliyev Azad Akif oğlunun istifadəsində olan “20 AA 011” dövlət qeydiyyat nişanlı xidməti avtomobillə qəzanı kim törədib? Bu haqda məlumatı verən mənbə bildirir ki, qəzanı Azad Əliyevin özü törətsə də, çox keçmir ki, qəzaya səbəbkar onun sürücüsü Ələkbərov Elnar Surxay oğlunun olduğu bildirildi.
“Gündəm Xəbər”ə verilən başqa bir məlumat isə, daha çox diqqəti cəlb etməkdədir. Belə ki, hadisə baş verən zaman Gəncə şəhər Narkoloji Dispanserdə həm baş memar Azad Əliyev, həm də onun sürücüsü Elnar Ələkbərov eyni gündə müayinə olunurlar və hər ikisinin də sərxoş olmadıqları barədə rəy də yazılır. Görəsən qəza baş verən zaman “20 AA 011” dövlət qeydiyyat nişanlı avtomobili neçə nəfər idarə edib? Maraq kəsb edən hal odur ki, əgər nəqliyyat vasitəsinin bir sükanı olursa, o halda hər iki şəxsin müayinədən keçməsinə səbəb nə olub? Yəqin ki, belə bir sualın cavabını əgər silinməyibsə şəhərdəki kameraların köməyi ilə də aydınlaşdırmaq olar.
Etibarlı mənbənin israrla bildirdiyi məlumatda o da deyilir ki, qəzanı şəxsən baş memar, ixtisasca fizika müəllimi olan Azad Əliyevin özü törətsə də, bu gün məsuliyyət yükü onun sürücüsü Elnar Ələkbərovun üzərinə qoyulur. Hadisədən sonra sürücü ilk öncə məsuliyyəti üzərinə götürməsə də, verilən məlumatlarda bildirilir ki, o, hal-hazırda mövqeyini dəyişməkdədir. Bundan əlavə, “Gündəm Xəbər”ə daxil olan başqa bir məlumatda isə bildirilir ki, zərərçəkənlər qəza törədəni tanısalar da, adı çəkilən hər iki şəxs hal-hazırda azadlıqdadırlar. Mənbə onu da bildirir ki, Azad Əliyev gənclərə ciddi xəsarətlər yetirməsi müqabilində, onlardan hər birinə ilk öncə 50 min manat, sonra isə 60 min manat pul təklif edib. Baş verən yol-nəqliyyat hadisəsi ilə bağlı Gəncə şəhər Baş Polis İdarəsində aparılan müəmmalı ləng araşdırmalar, bir daha onu söyləməyə əsas verir ki, hadisəni sürücünü Elnar Ələkbərov deyil, şəxsən Azad Əliyevin özü törədib.
Baş verən hadisədən bir-iki gün keçməmiş etibarlı mənbə onu da çatdırdı ki, sən demə Elnar Ələkbərov icra hakimiyyəti rəsmisinin sürücüsü işləsə də, əslində onun adı sürücü kimi ştat cədvəlində getmirmiş. Elə ki, Azad Əliyev düşdüyü durumdan çıxış yolları axtarır, bu zaman o belə bir qərara gəlir ki, ən asan yol Elnar Ələkbərovun adını hadisədən bir neçə gün əvvələ ştat cədvəlinə əmrlə yazdırmaq və məsuliyyət yükünü də onun boynuna qoymaq olur. Onun belə bir addımı Azad Əliyevə imkan verir ki, o, həm daşıdığı vəzifəsini, həm də sahibi olduğu çoxşaxəli biznesini qoruya bilsin. Yəni, bu gün baş verənlər və atılan addımlar, hələ ki, baş memarı məsuliyyətdən yayındıra bilir.
Bir faktı da qeyd edək ki, hələ 12 fevral 2013-cü il tarixdə ölkə rəhbəri cənab İlham Əliyev, əksər vəzifə sahiblərinin, onların harınlaşmış, ərköyün ödladlarının qudurğan
hərəkətləri ilə bağlı 2013- cü ilin fevralın 12-də Bakı Biznes Mərkəzində keçirilən və 2009-2013-cü illəri əhatə edən sosial-iqtisadi inkişafa dair “Dövlət Proqramı”nın icrasının dördüncü ilinin yekunlarına həsr olunmuş konfransdakı çıxışında vurğulamışdı ki, “vəzifəli şəxslər, onların övladları çox zaman qudurğanlıq edirlər, insanları təhqir edirlər, özlərini apara bilmirlər. Kim onlara bu statusu verib cəmiyyətdə? Onların güvəndiyi adamları vəzifəyə mən təyin etmişəm, mən də lazım bildikdə onları işdən çıxaracağam. Bir də bilsəm ki, kiminsə özü, yaxud da ailə üzvlərindən bir kimsə haradasa xuliqanlıq eləyir, nadanlıq eləyir, özünü apara bilmir, o adam həbs ediləcək, işdən də qovulacaq”. Bəli, belə bir yanaşma dəfələrlə dövlət başçısı tərəfindən nümayiş etdirilsə də, təəssüflər olsun ki, hələ də verilmiş tapşırıqlara məhəl qoymayan, insanları təqib və təhqir edən, döyən, söyən, onlara xəsarətlər yetirən vəzifə sahibləri və onların yaxın çevrəsi, bu gün də belə bir addımlarını atmaqdadırlar. Onlardan biri də, yuxarıda qeyd etdiyimiz kimi 07 noyabr 2015-ci il tarixdə Gəncə şəhər memarlıq və tikinti şöbəsinin baş memarı Əliyev Azad Akif oğlu olmuşdur.
P.S. Məqalə çapa hazırlanakən məlumatlı mənbə onu da bildirdi ki, xəsarət alanlardan birinin valideyni bildirir ki, yol-nəqliyyat hadisəsi zamanı baş memarın xidməti avtomobilini idarə edən Azad Əliyevin özü deyil, onun oğlu idarə edirmiş. Daxili orqanları ciddi xəsarət alan gəncləri teztələsik xəstəxanadan da çıxarırlar. Deməli, buna səbəb o olur ki, hadisəni törədən şəxs hüquq-mühafizə orqanı əməkdaşlarının razılığı ilə məsuliyyətdən yayınmaq üçün, belə bir addımlarını atır.
Baş verənlərlə bağlı Azad Əliyevin mövqeyini öyrənmək üçün icra hakimiyyətinə qədər getsək də, təəssüflər olsun ki, onu iş başında tapa bilmədik. Baxmayaraq ki, həmin gün onun vətəndaşlarla qəbul günü idi. Memarlıq və Tikinti şöbəsinin hüquqşünası Çingiz müəllimin mövqeyinə gəlincə isə o da, bildirdi ki, “Azad müəllimi gözləməyin, çünki düz 4 aydır ki, o işə gəlmir”.
Araşdırmamız davam edir.
Mehriban Əzizqızı

gundemxeber.az