Bir neçə gün bundan əvvəl QHT-lərə Dəstək Şurası haqqında birinci yazımı dərc etdiyinizə görə, azad fikirli jurnalistlərə minnətdarlıq edirəm. Sizlər Azay Quliyevin basqısından qorxmadan, bir kimsədən çəkinmədən mənim açıqlamamı dərc etdiniz. Çox təəssüf edirəm ki, digərləri qrant almamaq ehtiyat edərək belə məqalələrə diqqət ayırmadılar. Hətta, bəziləri məddahlıqdan da geri qalmadılar. Onları qınamıram, balalarına yəqin ki, çörək pulu aparırlar.
Mənim məktubumu naməlum elektron poçt kimi qələmə verdilər, halbuki adım da və soyadım da hər kəsə bəllidir. Mən uzun müddət Milli QHT Forumuna gəlib getmişəm. Onlarla işləmək istəyində olduğum xahişlərimin sayı-hesabı yoxdur. Heç vaxt Fərasət Qurbanov mənim kimi savadlı insanları, Azay Quliyevin yanına buraxmayıb. Ehtiyatlanıb ki, birdən mən ofis meneceri olaram, əsas söz sahibinə çevrilərəm. Bu belə də oldu. Mənim kimi fəallar uzaqlaşdırıldı, yeni-yeni vitse-prezidentlər ortaya çıxarıldı. 3-4 nəfər özləri qaldılar ki, xarici donorlardan aldıqları pulları yaxşıca bölə bilsinlər. Bunlar elə o vaxtdan korrupsiya təcrübəsi topladılar. Hamısının da qohumluq əlaqələri, göz qabağındadır.
İllər keçdi, ayrı sahədə işləsəm də, QHT yaratmaq qərarına gəldim. Dəfələrlə şuraya özüm, yaxud da qızım müraciət etdi. Sanki büroktarizmin ana mərkəzinə müracitə etdiyimizin şahidi olduq. Nə müraciətlərimizə baxan, nə də ki, bir qulaq asan oldu. Ümumilikdə, bu proses iki ilə yaxın çəkdi, nə QHT yaratmağa məktub, nə də ki, qrant almağa imkan verdilər.
Rauf Zeyniyə də müraciət etdik, dedi Forumun gücü çatan iş deyil. Bəs necə olur ki, öz təşkilatlarınızı qeydiyyatdan keçirib. onlara onminlərlə pul ayırırsınız?
Bir qədər vaxt keçdikdən sonra, əvvəlki dostlarımdan birinə xahiş etdim ki, mənim Azay Quliyevlə görüşməyimə kömək etsin. Nə fayda, dedilər ki, artıq Azay o Azay deyil. Artıq o, nazirdir. Onunla yox, Fərasət Qurbanovla görüşməyimə kömək edə biləcəklərini dedilər. Özüm istəmədim, çünki Fərasəti də, Resurs Mərkəzlərinin rəhbərlərini də, Raufu da, Aydını da, Umudu da yaxşı tanıyıram. Əslən Qərbi Azərbaycandan olduğum üçün, Azay Quliyevin kim olduğunu da, qohumlarını da yaxşı tanıyıram. Ona görə də, mətbuatdan insanlara yalan sırımağı yığışdırın deyirəm.
QHT-də olan çox dostlarımız var ki, onlar QHT Şurasının əməllərindən zinhara gəliblər. Aldıqları layihələrin 50 faizini, məcburi “otkad” kimi alırlar. Onları məcburi öz nəşriyyatlarına göndərirlər. İclas zalını məcburi “mətbuat evi”nə də saldırırlar. Mühasibatlığı özlərində etdirirlər, hamısı da küllü miqdarda vəsait qarşılığında.
Kimsə “otkad” məsələsini kənara çıxardırsa, sözün məcazi mənasında onu “əzməyə başlayırlar”. Qorxuya düşən təşkilat rəhbərləri də, onları ifşa edə bilmirlər.
MTN-nin əməkdaşı kimi Şurada çalışan Azər Rəhimovla, ortaq tanışlığımız da var idi. Ortaq dostlardan biri məni onunla görüşə yönəltdi və bildirdi ki, o, sənə qeydiyyat və pul almaqda köməklik edəcək. Onunla görüşərkən, o, məndən çox pul istədi. Razılaşmadım, ona görə ki, hər şey həll olunsun, sonra qrant alanda verərəm. Dedi, yox nağd olmalıdır, yoxsa Azay müəllim öz boynuna bu işi götürməz.
Sonradan həmin adamlardan eşitdim ki, Azəri çıxardıblar. Danışırdılar ki, Azay Quliyev onun əli ilə xeyli pul qazandı, amma arxasında dayanmadı.
Şuraya gedib-gələnlərin hamısı deyir ki, ora qohum məclisidir. Zarafatca deyirlər ki, “Azayın Şurası”. Təsadüfi demirlər. Forumdakı dostlarımızın çoxu gündəlik ordadılar. Mən hər şeyi dəqiq bilməsəm də, onlar kimin Azay Quliyevlə necə qohum olduğunu əzbər bilirlər.
Bir sözlə, Şura Azay Quliyevin qohumları üçün iş yeri, “pul dağı”, deputat seçilmək üçün güc mənbəyidir.
Çoxunuz bunu yaxşı bilirsiz, sadəcə cəsarətiniz çatmır ki, açıq deyəsiniz. Bəlkə də. mən ürəklərdən xəbər vermişəm.
Qoy bu işə cavabdehlik daşıyan qurumlar baxsınlar. Bəlkə də onların insafı olacaq, QHT qeydiyyatı üçün məktub almağı, qrant almağı Şuraya həvalə etməyəcəklər.

“Gündəm Xəbər”

Kamil Nəzərov