Prezident yanında QHT- lərə Dövlət Dəstək Şurasına rəsmi sorğu

Ötən saylarımızda QHT-lərə Dövlət Dəstək Şurası və onun rəhbəri Azay Quliyev haqda yazılar dərc etmişdik. Bu yazılarımızda adıçəkilən qurumla bağlı bəzi maxinasiyalardan bəhs etmişdik. İlk yazımızdan sonra qarşı tərəfəin mövqeyini ifadə etmək hüququnu tanıyaraq QHT-lərə Dövlət Dəstək Şurası tərəfindən redaksiyamıza göndərilən məktubu dərc etmişdik.
Təəssüf ki, vətəndaş cəmiyyətinin qoruyucusu olmaq funksiyasını üzərinə götürən bir qurum medianın sağlam tənqidinə dözüm göstərə bilmədi. Hətta müxtəlif sosial şəbəkələrdə bizə qarşı bəzən etik normaları aşan hədyanlara belə keçdilər. Biz məqsədimizin xırda maraqlara deyil, dövlət qurumunda, özü də vətəndaş cəmiyyətini müdafiə edən bir təşkilatın daxilində baş verənləri araşdırmaq, büdcədən ayrılan vəsaitlərin xərclənməsində şəffaflığı təmin etmək olduğundan bu hədyanları cavabsız buraxdıq. İndi obyektivliyimizi və qərəzli olmadığımızı təsdiqləmək üçün QHT-lərə Dövlət Dəstək Şurası ilə bağlı maliyyə məsələlərinə aydınlıq gətirmək hüququnu elə onların özlərinə buraxırıq. “Gündəm xəbər” olaraq QHT-lərə Dövlət Dəstək Şurasının rəhbərinə rəsmi müraciətimizi diqqətinizə çatdırırıq:

“Prezident yanında QHT- lərə Dövlət Dəstək Şurasının
sədri, Milli Məclisin üzvü Azay Quliyev cənablarına

Hörmətli Azay bəy,
İctimai vəsaitlərin xərclənməsində şəffaflığın artırılması, bu istiqamətdə ictimai nəzarətin təmin olunması və ictimaiyyətin məlumatlandırılması məqsədilə “Gündəm xəbər” qəzeti bir sıra dövlət qurumlarının, o cümlədən QHT- lərə Dövlət Dəstək Şurasının fəaliyyəti, həyata keçirdiyi layihələr, dövlət büdcəsindən xərclədiyi vəsaitlərlə bağlı araşdırmalar aparır. Araşdırmaların obyektiv və əhatəli alnıması üçün xahiş edirik “İnformasiya əldə etmək haqqında” və KİV haqqında Qanuna uyğun şəkildə aşağıdakı suallları cavablandırasınız;

1. Prezident yanında QHT- lərə Dövlət Dəstək Şurasının fəaliyyəti dövründə QHT- lərin maliyyələşməsi üçün indiyə qədər müstəqil və müştərək şəkildə (digər donor təşkilatlarla birgə) hansı həcmdə qrant ayrılıb. Xahiş olunur müsabiqə və müsabiqədən kənar verilən qrantların həcmini ayrıca qeyd edin.
2. Ötən müddət ərzində hansı təşkilatların qrant layihələri maliyyələşib və layihələrin büdcəsi nə qədər olub? Zəhmət olmasa siyahını təqdim edin.
3. İndiyə kimi QHT- lərə Dövlət Dəstək Şurasının bu və ya digər formada dəstəyi ilə xarici səfərlərə, beynəlxalq konfrans və görüşlərə hansı təşkilatların nümayənədələri və kimlər gedib, onlara hansı həcmdə vəsait ödənilib və bu proses necə həyata keçirilib (müsabiqə yolu, nəğd ödəniş, köçürmə yolu və s.)
4. Prezident yanında QHT- lərə Dövlət Dəstək Şurası tərəfindən hansı Şura üzvlərinin və Milli Məclis üzvlərinin rəhbərlik etdiyi şəxslərin QHT- lərinə məxsus layihələr maliyələşdirilib və bu layihələrin büdcəsi nə qədər olub? Zəhmət olmasa siyahını təqdim edin.
5. Prezident yanında QHT- lərə Dövlət Dəstək Şurasının hazırda məskunlaşdığı yer hansı quruma və ya şəxsə malikdir? Şura bu ünvanda fəaliyyət göstərdiyinə görə hansısa quruma və ya şəxsə ödəniş ödəyirmi? Ödəyirsə aylıq hansı həcmdə ödəyir?
6. Ötən müddət ərzində və hazırda Prezident yanında QHT- lərə Dövlət Dəstək Şurasında işləyən kimlər şəxsən sizin yaxın və uzaq qohumlarınızdır? Konkret olaraq Şuranın mühasibi Tofiq müəllimlə sizin hansı qohumluq əlaqəniz var? Zəhmət olmasa Şurada işləyən və dövlət büdcəsində maaş alan şəxslərin adlarını və vəzifəsini qeyd edin.

Qanunvericiliyin tələblərinə uyğun şəkildə suallarımızı qısa bir zamanda cavablandıracağınıza əmin olduğumuzdan bəri başdan təşəkkürümüzü bildiririk.