Ruslarla suriyalıların dinlərmi eynidir, irqlərimi eynidir, yoxsa bir mədəniyyət bağlılıqları var? Sərhədləri mövcuddurmu? Yox, yox, yenə də yox...

Heç bir bağlılıqları olmadıqları halda, 1000 kilometrlərlə məsafəni basa-basa nə işi var Putinin Suriyada?

Hə, əlbəttə zamanında ruslar Suriyanın nusayri hakimiyyətini silahlandırıb. 1982-ci ildə Suriyanın indiki diktatoru Bəşər Əsədin atası Hafiz Əsəd rusların verdiyi həmin silahlarla Hama şəhərində öz xalqına qarşı qətliam törədib və sairə. İndi rusların silah bazarı, neft bazarı əlindən çıxır deyə 1000 kilometrlə məsafəni qət edib, Türkmən Dağında qətliammı törətməlidir?
Bu, insan haqlarına zidd deyilmi? Bu, işğal deyilmi? Rusiyanın qəsbinə işğal deyə bilməyənlərin Türkiyənin öz ərazisini müdafiə etməsinə dil uzatmaları nə qədər doğrudur?

Bu millətçilikdən dəm vuran "ziyalılar" (əslində ziyanlılar) Türkmən dağında rus, Əsəd, İran ordusunun soydaşlarımız olan türkmənlərə qarşı qətliamlarını niyə görməzdən gəlirlər?
Deputatlarımızdan biri iddia edir ki, Türkmən dağına hücum filan yoxdur, orada qətliam da baş verməyib. Anadolu türkləri demiş: Yok artık.

Bütün dəlillər sübutlar, videolar, fotolar, hər şey ortadadır. Üstəlik hadisə Marsda, Yupiterdə, nə bilim başqa planetlərdə baş vermir. Türkiyənin sərhədlərində baş verir. Türkiyə mətbuatı, dünya mediası bu haqda xəbərlər yayır, türkmən komandirlərin çağrışları var, döyüş səhnələrinin video görüntüləri yayılır. Ən vacibi isə qarşı tərəf, Rusiya, Suriya, İran mətbuatı da türkmənlərin yaşadığı bölgəyə hücum edildiyini təsdiqləyir. Bizim deputat isə bunu ya görmür, ya da görməzdən gəlir.
Hər şey bir tərəfə, Xocalını unutduqmu? Xocalıda baş verən soyqırım rusların 336-cı moto-atıcı alayının köməkliyi ilə törədilməmişdimi? Azərbaycanın 20 faiz işğal olunmuş torpaqlarını ermənilərə ruslar peşkəş etməyibmi? Torpaqlarımızı ermənilərdən geri almaq üçün qarşımızda duran sədd Rusiya deyilmi?

1918-ci ildə Azərbaycanı, Bakını rus-erməni işğalçılarından təmizləyən kim idi? Osmanlı ordusu deyildimi? 2002-ci ildə İran hava məkanımızı pozan zaman onları yerində oturdan kimi idi, Türk şahinləri deyildimi? Bəs uzun illərdir erməniləri silahlandıran, müdafiə edən kimdir, Rusiya deyilmi? Cənablar, nəyin peşindəsiniz?
Necə deyə bilərsiniz ki, Türkiyə Rusiyadan üzr istəsin? Rusiya Xocalıya görə üzr istəyibmi? Və yaxud Türkiyə ərazisinə soxulan rus təyyarəsini vurduğu üçün niyə üzr istəməlidir? Bu nə məntiqdir? Sizin millətçiliyiniz, bozqurdluğunuz ancaq məclislərdə araqdan dümləyib 2 barmağını yuxarı qaldırmaqdan ibarətdirmi?

Türkiyənin nəinki öz torpaqlarını, öz soydaşlarını, bütün İslam-Türk coğrafiyasını, Osmanlının əhatə etdiyi torpaqları müdafiə etmək özəl haqqıdır. Və bunu da bacardığı qədər edir.

Əlbəttə, baş verən olaylar bir testdir. Bəziləri bu testdən üzüqara çıxdı. Amma ümumilikdə toplum olaraq üzüağ çıxdığımızı deyə bilərik. Bunu həmin bir neçə nəfər "millətçi"nin mediada, sosial şəbəkələrdə sərt şəkildə tənqid edilməsi göstərir. Toplum olaraq Türkiyənin yanında, Rusiyanın qarşısındayıq.
Həmin "bozqurd"çulara da zəruri tövsiyə Cənablar, ya doğrunu danışın, ya da susun!