Şirin Cəfərli: “Bu, siyasi sifarişin nəticəsidir…”

“İmkan verməyin ki, Azərbaycanda daha bir AZAD SÖZ tribunası haqsızlıqla susdurulsun”

Məlum olduğu kimi Baş Prokurorluq “Gündəm Xəbər” qəzetinin baş redaktoru Şirin Cəfərli barəsində qaldırılmış cinayət işinin məhkəməyə göndərilməsi haqda məlumat yayıb. Baş prokuror yanında Korrupsiyaya qarşı mübarizə idarəsində “Gündəm xəbər” qəzetinin təsisçisi Şirin Cəfəri barəsində Cinayət Məcəlləsinin 213.2.2 (vergi ödəməkdən yayınma) və 308.1-ci (vəzifə səlahiyyətlərindən sui-istifadə) maddələri olan cinayət işinin istintaqı aparılıb. İstintaqla müəyyən edilib ki, qəzetin təsisçisi Şirin Cəfəri vergi ödəyicisi kimi qəzetin nəşri və satışını həyata keçirərkən vergi qanunvericiliyinin tələblərinə əsasən vergi orqanlarına qanunvericiliklə müəyyən edilmiş hallarda və qaydada vergi hesabatını təqdim etməli və vergi öhdəliklərini yerinə yetirməli olduğu halda, həmin tələbləri pozaraq 2009-2011-ci illər üçün sadələşdirilmiş vergi 3.316 manat olduğu halda, həmin dövr üçün vergi orqanına təqdim etdiyi bəyannamələrə bilə-bilə yalan məlumatlar daxil edərək sadələşdirilmiş vergini 82 manat, yəni 3.234 manat az göstərib. Bundan başqa 2009-cu ildə gəlir vergisi 25 min 900 manat, 2010-cu ildə isə 42 min 344 manat olmaqla, cəmi 68 min 244 manat olmasına baxmayaraq həmin illərdə gəlir vergisi ilə bağlı vergi orqanlarına bəyannamə təqdim etməmiş və beləliklə ümumilikdə 71 min 478 manat məbləğində külli miqdarda vergini dövlət büdcəsinə ödəməkdən yayınıb. Şirin Cəfəri Cinayət Məcəlləsinin 213.2.2-ci maddəsi ilə təqsirləndirilən şəxs qismində cəlb edilərək barəsində başqa yerə getməmək haqqında iltizam qətimkan tədbiri seçilib. Cinayət işi üzrə istintaq tamamlanaraq baxılması üçün aidiyyəti üzrə Gəncə şəhər Kəpəz rayon məhkəməsinə göndərilib.
Baş verənlərlə bağlı qəzetimizin təsisçisi Şirin Cəfərinin mövqeyini öyrəndik. Şirin bəy bizimlə söhbətində bildirdi ki, rəhbərlik etdiyi quruma uzun müddətdir ki, müxtəlif səpgili təzyiqlər edilir: “Bu vaxta qədər müxtəlif vasitələrdən istifadə olunaraq daha çox tənqidi mövqedə dayanan «Gündəm Xəbər» qəzetinin susdurulmasına çalışılıb. Lakin bu da alınmadıqda sonuncu dəfə qəzetimizə qarşı absurd ittihamlar irəli sürüldü və guya ki, qəzetimizin maliyyə işlərində vergidə yayınma halları olub və bu iş üzrə Vergilər Nazirliyinin Vergi Auditi Departamenti tərəfindən araşdırmalar aparılıb.
Bu araşdırmalar nəticəsində isə ortaya absurd və gülünc bir qənaət qoyulub. Belə ki, qəzetimizin bu ilin 16 may tarixindən gündəlik nəşr olunmasına baxmayaraq, vergi orqanlarının əməkdaşları son bir illik fəaliyyətimizin bütün dövrünə gündəlik nəşri şamil ediblər. Eyni zamanda qəzetimizin real tirajının rekvizitdə göstərilməməsini bəhanə edərək, «Gündəm Xəbər»lə bağlı araşdırmalar zamanı «Azadlıq» qəzetinin bugünkü tirajını nümunə kimi götürüb və hər iki absurd dəyərləndirmə şəraitində qəzetimizə qarşı astronomik həddə vergidən yayınma məbləği irəli sürüblər.
Yəni məlum olduğu kimi, qəzetimizə qarşı sürülən ittihamda da guya ki, qəzetimiz tərəfindən nəğd pul hesablaşmalarının aparılması qaydalarının pozulduğu və beləliklə külli miqdarda, yəni 68.244 manat məbləğində vəsaitin vergidən yayındırıldığı qeyd olunub. Halbuki yuxarıda da qeyd etdiyim kimi, qəzetimizin real tirajı 2000 nüsxədən yuxarı olmayıb və qəzetimiz yalnız bu ilin 16 may tarixindən etibarən gündəlik, yəni həftədə 5 dəfə dərc edilməkdədir.”
Ş.Cəfəri qəzetə qarşı qaldırılmış vergi iddiasının araşdırmasında baş verən kobud qanunsuzluqlardan da bəhs etdi: “Əlavə olaraq bildirmək istəyirəm ki, ilk əvvəl Vergi Auditi Departamentinin əməkdaşları mənə qəzetimin 2008-ci ildən 2011-ci ilin may ayının 1-nə qədər olan müddət ərzindəki fəaliyyətinin araşdırılacağını bildirdilər. Mən də onlarla razılaşdım və diqqətlərinə çatdırdım ki, «Gündəm Xəbər» qəzeti 2009-cu ilin iyun ayından etibarən nəşr olunur. Bir daha qeyd edim ki, «Gündəm Xəbər» qəzeti yalnız ötən ilin 16 may tarixindən etibarən əvvəl həftədə beş dəfə, sonra isə 6 dəfə dərc edilməkdədlir. Lakin sonradan vergi orqanlarının əməkdaşları elan etdikləri tarixə qədər, yəni 2011-ci ilin may ayının 1-nə qədər olan dövrdəki dövriliyi yox (yəni həftədə 2-3 dəfə), 2011-ci ilin 16 may tarixindən olan dövriliyi (yəni həftədə 5 dəfə) əsas kimi götürərək bu dövriliyi bütün ilə şamil etməklə yanaşı, yuxarıda da qeyd etdiyim kimi «Azadlıq» qəzetinin bugünkü tirajı ilə (8 min nüsxə) «Gündəm Xəbər» qəzetinə astronomik həddə cərimə kəsib. Halbuki «Gündəm Xəbər» qəzeti nəşr olunduğu gündən maksimum tirajı 2000 nüsxə olub.
Bildirirəm ki, «Gündəm Xəbər» qəzetinə qarşı olan bütün bu basqılar siyasi mahiyyət daşıyır, siyasi sifarişin nəticəsidir. Bu səbəbdən bütün ölkə ictimaiyyətindən, hüquq-müdafiə təşkilatlarından, beynəlxalq təşkilatlardan, Avropa ölkələrinin və ABŞ-ın Azərbaycandakı səfirliklərindən bu gülünc və qanunsuz hərəkətin durdurulması üçün dəstək istəyirəm. İmkan verməyin ki, Azərbaycanda daha bir AZAD SÖZ tribunası haqsızlıqla susdurulsun”.

QEYD: Bütün baş verənlərlə bağlı geniş araşdırmamızı növbəti saylarımızda diqqətinizə çatdıracayıq. Amma avtoritar bir rejimin medaya qarşı bu basqısına ən azından həmkarlarımızdan dəstək umduğumuz halda laqeyd münasibətini izah etməkdə çətinlik çəkirik...