Ali məktəblərdəki İranın “dindar” agentləri və ya Təhsilimizin altına qoyulmuş bombalar.

Təhsil – hər bir millətin gələcəyi, dövlətin təməli, dünyaya açılan pəncərədir. Hər bir xalq öz inkişaf yolunu məhz malik olduğu təhsillə qazanmışdır. Lakin əfsuslar olsun ki, bu gün bəzi ali məktəblərimizdə dini radikalizmlə məşğul olan İran agentləri fəaliyyət göstərir və...

Nardaranda baş verən son hadisələr gündəmə yenidən din pərdəsi altında daldalanıb, dini radikalizmlə məşğul olan bir çox “dindarları” gətirdi. İranın bəzi rəsmi dairələrinin din adı altında Azərbaycanda öz iyrənc siyasətlərini yerinə yetirdikləri heç kimə sirr deyil. Bu məqsədlə İranda dini mədrəsə təhsili alan gənclərimiz, müəllimlərimiz arasında bəzilərinin açıq, bəzilərinin isə beynini yumaqla üstüörtülü əməkdaşlığa cəlb edilmələri də hamıya məlumdur.

İran uzun illərdir ki, bu sahədə işlər görür. Onlar azərbaycanlı yeniyetmələri həm qanuni, həm də qeyri – qanuni yolla İrana keçirir, Qəzvin və bu kimi şəhərlərin tədris mərkəzlərində onları pulsuz təhsillə təmin edərək, beyinlərini ekstremist fikirlərlə doldururlar. Maraqlı məqam isə budur ki, həmin gənclər Maştağa, Nardaran və s. Bakı kəndlərindən seçilirlər.

Əgər xatırlayırsınızsa, İran ilə yollar açılan zaman Azərbaycandan İranın Qəzvin şəhərinə bir çox yeniyetmələr qeyri – qanuni yolla keçərək, oranın dini mədrəsələrində təhsil almışdılar. Maraqlıdır ki, sonralar həmin yeniyetmələr bu təhsillərini nədənsə gizlətməyə çalışmışdılar. Bəziləri hətta tərcümeyi – hallarında həyatlarındakı bu kiçik aralığı ört – basdır edərək üstündən keçməyə belə çalışmışdılar.

Bir məqamı da qeyd edək ki, Qəzvində dini mədrəsə, kollec və ali məktəblərdə təhsil alanlarımız çoxluq təşkil edir və onların böyük qismi İslam “dini” altında pərdələnərək gənclərin beyinlərini zəhərləyirlər. Həmin təhsil ilə beyni doldurulanlar isə əfsuslar olsun ki, Azərbaycana alayı təfəkkürlə qayıdırlar.

Hazırkı dövrdə Azərbaycanda fars dili üzrə mütəxəssislərin sayı gündən – günə artır. Onlar fars dilinin ahəngdarlığını, gözəlliyini, söz ehtiyatını, poetikasını öyrənir və gənc nəslə öyrədirlər. Bakıda fəaliyyət göstərən İslam Universiteti, həmçinin Bakı Dövlət Universitetinin İlahiyyat fakültəsində gənc nəslə elmi – dini bilgilər aşılanır, İslam dininin elmi əsasları, əxlaqi dəyərləri öyrədilir. Maraqlıdır ki, belə tədris ocaqlarımız və orada tədris edən dünyaca tanınmış alimlərimiz olduğu halda, Qəzvində təhsil almaq arzusu əcəba nədən qaynaqlanır?

Əfsuslar olsun ki, yeniyetməlik dövründə Qəzvin mədrəsələrində qeyri – qanuni yollarla dərs alanların bir çoxu Azərbaycana düşmən mövqeyi ilə qayıdırlar. Onların bəziləri ail məktəblərimizə yol tapır, burada dərs deyir, İranın onlara öyrədilən ekstremist siyasətini Azərbaycanda yaymağa başlayırlar. Həmin müəllimlər çox zaman özlərinin qohumlarının, əzizlərinin, əmi, dayı, qardaşlarının xəstəliyi bəhanəsiylə tez – tez İrana gedir, oradakı ekstremist təfəkkürlü şəxslərdən təlimat alaraq Azərbaycana qayıdırlar.

Qəzvin mədrəsə və kolleclərində təhsil alan bəzi ali məktəb müəllimləri özünəməxsusluqları ilə də seçilirlər. İddiaları boylarından belə böyük olan bu müəllimlər özlərinin ayaqlarına böyük olan tanınmış alimlərin ayaqqabılarını geyinmək iddiasında olsalar da, nə ayaqqabıya əlləri çatır, nə də onu daşımağı bacarırlar.

Burda mənəm, Bağdadda kor xəlifə iddiası ilə işlədikləri ali məktəblərdə kafedra müdirinin, dekanın yerinə göz dikən bu dini agentlər təəssüflər olsun ki, çıxdıqları qını belə unudur, onlara çörək verənlərin qabına utanmadan tüpürürlər. Beləcə, vəzifə iddiası onların gözlərini elə kor edir ki, haradan gəldiklərini, onlara kimin çörək verdiyini, kimin sayəsində çörək yediklərini belə unudurlar. Bu müəllimlər onları alim edənlərin belə yerinə utanmadan göz dikirlər.

Maraqlıdır ki, nədənsə təhlükəsislik orqanları belə müəllimlərin İran səfərlərini, keçmişlərini, buradakı fəaliyyətlərini, Vəhabilərlə əlaqələrini araşdırmırlar. Ekstremizmin ali məktəblərə yol açması ən qorxulu hallardan biridir. Unutmayaq ki, Qəzvinin dini mədrəsələrində təhsil alıb,

bunu gizlətmək istəyənlər, İranın ekstremist fikirləri ilə beyinləri zəhərlənib ali məktəblərdə dərs deyən bəzi müəllimlər Azərbaycan təhsilinin altına qoyulmuş bombalardır. Bu müəllimlərin əsas məqsədləri vəzifə kürsüsünə dırmanıb, dövləti, elmi, təhsili zəiflətməkdir.

Onlar hələ yenicə formalaşmağa başlayanda, bığ yerləri təzəcə tərləyəndə İranın xüsusi xidmət orqanlarının tələsinə düşürlər. Geri döndükdə isə...

Bu gün Qəzvinin mədrəsə yetirmələrinin bəziləri ali məktəblərdə kök salıb. Onların nə vaxtsa ali məktəblərdə Nardaran hadisələrinə bənzər hadisələrin törətməyəcəklərinə əcəba, kim təminat verir? Zənnimcə hüquq – mühafizə orqanları və digər əlaqədar təşkilatlar bunu araşdırmalıdırlar. Yoxsa...

Çinarə Vüqar

gundemxeber.az