Bu gün Bakı Slavyan Universitetinin Yaradıcılıq fakültəsinin dekanı, mərhum tənqidçi Elnarə Tofiqqızının doğum günüdür. O, 1977-ci il dekabrın 24-də anadan olub. Bakı Dövlət Universitetinin Filologiya fakültəsini və AMEA Ədəbiyyat İnstitutunun aspiranturasını bitirib.

2013-cü il sentyabrın 20-də həkim səhlənkarlığı nəticəsində dünyasını dəyişib.

3 kitabın, onlarla elmi və ədəbi-tənqidi məqalənin müəllifidir.

gundemxeber.az tanınmış ədəbiyyat adamlarının, ziyalıların Elnarə Tofiqqızı ilə bağlı fikirlərini təqdim edir:

Yazıçı Kamal Abdulla mərhum tənqidçinin yüksək inzibatçılıq bacarığını və ədəbi istedadını xüsusilə qeyd edir:

“Bəzən inzibati işləri yaxşı bacaranlar yaradıcılıqda və ya əksinə, çətinlik çəkirlər. Elnarə isə bir neçə xüsusiyyəti özündə birləşdirirdi: səmimi, gülərüz, inzibatçı, istedadlı... O, tələbələri, universitet kollektivi arasında öz rəftarı, davranışı, qayğısı ilə, ədəbi çevrədə və ictimaiyyət arasında yazıları, peşəkarlığı, dürüstlüyü, ədəbi mətnə dəyərli yanaşması ilə qısa müddətdə böyük hörmət qazanmışdı. Mən sanki bacımı, doğmamı itirmişəm və bu itkini hər gün hiss edirəm”.

Millət vəkili Aqil Abbasın fikrincə, Elnarə xanım kimi parlaq bir ədəbiyyat adamını səhlənkarlıqla öldürmək bizim səhiyyədəki faciəmizdir:

“Necə olur ki, bu cür xəstəxanalar tikilir, yüksək səviyyəli, ən müasir avadanlıqla təchiz olunur, ancaq həkimlərimiz ən xırda əməliyyatlarda insanları öldürürlər. Baxın saytlara, qəzetlərə: hər gün bir ananın, bir xəstənin həkim səhlənkarlığından ölümü haqqında xəbərlərə rast gəlmək mümkündür. Məni də narahat edən odur ki, bu qədər ölümlərə görə çox vaxt kimsə cəzalandırılmır, cəzasızlıq isə növbəti faciələrə yol açır. Biz çalışmalıyıq ki, Elnarə xanımın ölümünə bais olanların hər biri mütləq öz cəzasını alsın. Bu, bizim qələmə, sözə olan borcumuzdur, həm də günahkarların cəzalanması bu mənfi ənənəyə son qoymaq üçün böyük addım olar”.

“Yazı” dərgisinin redaktoru, yazıçı Azad Qaradərəli Elnarə Tofiqqızının son dərəcə obyektiv bir tənqidçi olduğunu bildirir:

“Elnarə xanım qayğıkeş idi, istedadlı adamları qoruyurdu, amma ən sevimli tələbələrinin də yazılarına ədəbi-bədii qiymətləndirmə baxımından güzəşt etmirdi. Mətnə çox sədaqətli idi və belə tənqidçilər çox təəssüf ki, barmaqla sayılacaq qədərdir. Buna görə də Elnarə Tofiqqızının itkisi ədəbiyyatımız, ədəbi tənqidimiz üçün böyük itkidir”.

Tənqidçi Cavanşir Yusifli onun ədəbi-tənqidi dəyərlərə böyük həssaslıqla yanaşdığını xatırladır:

“Kitab olası yazılarından bunu indi də oxumaq, görmək mümkündür. Xüsusilə onun filoloji baxışları, ixtisasına uyğun şifahi xalq ədəbiyyatı bilgiləri, fəhmi bir çox mətnlərin qatlarını açmaqda ona yardımçı olurdu. Ancaq cəmi 2-3 il onun yazılarını izləyə bildik və hesab edirəm ki, onun daha böyük əsərlərini yazası yaşı hələ qarşıdaydı”.

Yazıçı Nəriman Əbdürrəhmanlı Elnarə xanımın ədəbi yazılarını daim izlədiyini xatırladır:

“Ədəbi baxışlarında bir sistemlilik vardı - güzəştsiz, səmimi. Onun tənqid etdiyi ədəbiyyat adamları da ondan şəxsi müstəvidə incimirdilər. Çünki heç kimə qarşı qərəzi yox idi, sifarişlə yazmırdı, yazdıqları səmimi düşüncələri, ədəbi baxışları idi”.

“Kulis” dərgisinin redaktoru, yazıçı Qan Turalı bildirir ki, Elnarə Tofiqqızının vəfatı bütün ədəbiyyatımız üçün itkidir:

“Onun itkisi həm ədəbiyyatın, həm bizim, həm də dostumuzun faciəsidir. Çünki onun həyat yoldaşı Anar Niftəliyev də hamımızın dostudur və bu itki onun qədər bizi də sarsıdır”.

Xatırladaq ki, tanınmış tənqidçi Elnarə Tofiqqızı 2013-cü il sentyabrın 20-də Nəsimi rayonunda yerləşən “Medi Sina” Tibb Mərkəzində süd vəzi kanalının əməliyyatı zamanı həkim səhlənkarlığı ucbatından vəfat edib. Elnarə Tofiqqızının ölümündə təqsirli bilinən anestezioloq Firuz İbrahimov 2015-ci il avqustun 31-də Bakı Apelyasiya Məhkəməsinin qərarı ilə Cinayət Məcəlləsinin 124.1 (məsuliyyətsizlikdən insan ölümünə səbəb olma) və 320.1 (sənəd saxtakarlığı) maddələri əsasında 2,5 il müddətinə azadlıqdan məhrum edilib.