Bakı Slavyan Universitetinin dekanı Elnarə Tofiqqızının həkim səhlənkarlığı nəticəsində dünyasını dəyişdiyi “Medi Sina” klinikasının baş həkimi Abbas Bağırov klinikadakı işindən çıxıb.

Bunu zərərçəkənin hüquqlarını müdafiə edən hüquqşünas Səməd Vəkilov mediaya açıqlamasında bildirib. Onun sözlərinə görə, "Müvəkkil" hüquq mərkəzində aparılan müstəqil təhqiqat klinikaya sorğu göndərərkən artıq A.Bağırovun orada işləmədiyi müəyyənləşib. “Ancaq onun vəzifəsindən istefa verməsi məsuliyyətdən qurtarması anlamı daşımır”, - deyə hüquqşünas qeyd edib.

S.Vəkilov istintaqa ilk vəsatətlərini təqdim etdiyini də vurğulayıb:
“İş materialları ilə artıq tanışam və bir qrup şəxsin dindirilməsi ilə bağlı Nəsimi Rayon Prokurorluğunda yaradılan istintaq qrupunun rəhbəri Ələkbər Rzayevə vəsatət təqdim etmişəm. Hesab edirəm ki, istintaqın obyektiv aparılmasında həmin şəxslərin dindirilməsi mühüm əhəmiyyət kəsb edir”.

Xatırladaq ki, tənqidçi Elnarə Tofiqqızı bu il sentyabrın 20-də “Medi Sina” Tibb Mərkəzində əməliyyat zamanı həkim səhlənkarlığı və məsuliyyətsizliyi nəticəsində dünyasını dəyişib. Sentyabrın 25-də Nəsimi Rayon Prokurorluğunda faktla bağlı cinayət işi qaldırılıb. İşin obyektiv araşdırılıb günahkarların cəzalandırılması üçün zərərçəkən ölkə başçısına və hüquq-mühafizə orqanlarının rəhbərlərinə müraciət edib. Hazırda cinayət işinin istintaqı Baş prokuror Zakir Qaralovun nəzarətindədir.