Bakı Baş Səhiyyə İdarəsində (BBSİ) “stavka” alveri davam edir

34 saylı poliklinikanın USM həkimi Rəhilə Sadıxova poliklinikada qanunsuz olaraq USM həkimi ştatının yaradılması barədə BBSİ rəisi Elmira Əliyevaya yenidən rəsmi müraciət göndərib. Bu barədə “Yeni Müsavat”a R.Sadıxova məlumat verib. R.Sadıxova bildirdi ki, bu, E.Əliyevaya ünvanlanan sayca üçüncü məktub olsa da , müraciətlərinin heç birinə cavab almayıb.
O, müraciətində 34 saylı poliklinikanın baş həkimi Vəfa Əliyevanın rəhbərlik etdiyi poliklinikada sahə terapevti işləmiş Vəfa Abdullazadənin heç bir əsas və ehtiyac olmadan əvəzetmə ilə USM həkimi vəzifəsinə təyin etməsindən yazıb. R.Sadıxova 1996-cı ildən Badamdar qəsəbəsində yerləşən 15 saylı Birləşmiş Səhər Xəstəxanasında ştat cədvəlinə uyğun olaraq 1 ştat vahidi USM həkimi vəzifəsində işlədiyini, bu xəstəxana ləğv edildikdən sonra onun bazası əsasında yaradılmış 34 saylı poliklinikada BBSİ-nin 339/K saylı əmri ilə ştat cədvəlinə uyğun olaraq 1 ştat vahidi ilə yeganə USM həkimi kimi fəaliyyətini davam etdirdiyini bildirir: “2006-cı ildə bu poliklinikada fəaliyyətə başlayandan sonra baş həkim mənə 1 ştat vahidinin 0.5 vahidindən imtina etməyi təklif etdi. Bu təklifdən imtina edəndən sonra baş həkimin qəzəbinə tuş gəldim. Baş həkim 0.5 ştat vahidi müalicə-bədən tərbiyəsi həkimi ştatını USM həkimi ştatı ilə əvəz etdi və sahə həkimi Vəfa Abdullazadənin mənim iş rejimimə mane olmamaq şərtilə müvəqqəti olaraq bu vəzifədə fəaliyyət göstərməsinə icazə verdi. Səhiyyə nazirinin 2009-cu ildə verdiyi əmrinə əsasən bir həkimin iki vəzifə daşıması qadağan olunur. Amma bu əmr Vəfa Abdullazadəyə şamil edilmədi. Vəfa Abdullazadə əsas ixtisası üzrə 2010-cu ildə terapiya ixtisasartırma kursunda olub. 2011-ci ilin martında bu ixtisas üzrə həkimlərin sertifikasiya imtahanına çağırılıb. Amma bu çağırış sonradan mənə məlum olmayan səbəblərdən ləğv edildi. 2011-ci ildə nazir əvəzetmə vəzifələrinin ləğvinə dair əmr verdi. Nazirin bu əmri də Vəfa Abdullazadəyə şamil edilmədi. O, baş həkimlə anlaşaraq USM ixtisası üzrə sertifikasiya imtahanına göndərilməsini istəyib. Baş həkim onun istəyinə uyğun olaraq Səhiyyə Nazirliyinin Sertifikasiya Mərkəzinə yanlış məzmunlu məktub yazaraq Vəfa Abdullazadənin 2011-ci il dekabrın 28-də sertifikasiya imtahanına buraxılış vəsiqəsi almasına nail oldu. Bu məqsədlə Vəfa Abdullazadənin əmək kitabçası da saxtalaşdırılıb.
Saxta sənədlərlə sertifikat əldə etdikdən sonra Vəfa Abdullazadə və baş həkim Bakı Baş Səhiyyə İdarəsi rəhbərliyi ilə anlaşaraq, 2012-ci ilin ştat cədvəlinə 0.5 vahid USM həkimi ştatı əlavə ediblər. Bu isə nazirin 143, 151, 119 saylı əmrlərinə ziddir. Çünki bu əmrlərə əsasən ştat cədvəlindən artıq ştat vahidinin yaradılması yolverilməzdir. Ştat vahidinin yaradılması yalnız Səhiyyə və Maliyyə Nazirliklərinin razılığı ilə həyata keçirilə bilər.
R.Sadıxova yazıb ki, BBSİ-nin rəisi E.Əliyeva ona qanun pozuntusuna yol verənlərin ciddi cəzalandırılacağını desə də, hələ də tədbir görülməyib: “Nazir Oqtay Şirəliyev Elmira Əliyevaya böyük etimad göstərərək Bakı Baş Səhiyyə İdarəsinin rəhbərliyini ona etibar edib. O, baş verənləri cənab nazirə məruzə etmək əvəzinə cinayət xarakterli əməlləri ört-basdır edir. Prezident fevralın 12-də müşavirə zamanı vətəndaşların müraciətlərinin dinlənilməsi, qanuni tələblərinin təmin edilməsi və qanunu pozan məmurun ciddi cəzalandırılmasını söyləyib. Prezidentin fevralın 16-da imzaladığı sərəncamda büdcədən maliyyələşən təşkilatlarda vəsaitlərin təyinatı üzrə xərclənməməsi, ştat cədvəlində nəzərdə tutulduğundan artıq ştat vahidlərinin yaradılması ciddi qanun pozuntusu kimi göstərilib”.
R.Sadıxova yazıb bildirir ki, indiyədək nazir O.Şirəliyevə göndərdiyi teleqram və məktublar nazirdən gizlədilib: “Baş vermiş ciddi qanun pozuntuları ilə əlaqədar nazir Oqtay Şirəliyevdən məni qəbul etməsini xahiş edirəm”. Səhiyyə Nazirliyinin mətbuat xidmətinin rəhbəri Anar Qədirl bildirdi ki, R.Sadıxova O.Şirəliyevin qəbuluna düşmək üçün nazirliyin ümumi şöbəsinə müraciət etməlidir: “Hər ayın 1-dən 10-dək nazirin qəbul günləridir”.

Firuddin Bəşirov