Sabiq rektorla görüşən bütün şəxslər istintaqa çağırılacaq

Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada yaşayan Elşad Abdullayevlə əlaqəli olması ehtimal edilən bütün məmurlar istintaqa çağırılır. Bu barədə məlumatı “Azadlıq” qəzeti yayıb. Qəzet iddia edir ki, bu sırada övladı ABU-da təhsil alan məmurlar xüsusi yer tutur: “Hətda sabiq rektorla bir dəfə görüşən məmurlar da sorğu-suala çəkilir. İstintaqa çağırılan əsasən kiçik və orta ranqlı məmurlardır. Onlara Elşad Abdullayevlə görüşlərində hansı mövzuda söhbət etdikləri barədə suallar verilir”.
Məsələ ilə bağlı bizim əldə etdiyimiz məlumatda isə istintaqa təkcə məmurların deyil, bir neçə məşhur iş adamının da cəlb edildiyi bildirilir. Bundan başqa artıq Elşad Abdullayevə görə istintaqa ifadə verəcək şəxslərin siyahısının hazırlanması barədə də məlumat almışıq. Maraqlıdır ki, həmin siyahıda bir sıra müxalifət nümayəndələri, QHT-çilər və tanınmış jurnalistlərin də adı var. Hələlik bu siyahı açıqlanmır. Bunun səbəbi isə adları çəkilən şəxslərin Elşad Abdullayevi açıq şəkildə müdafiəyə qalxmasının qarşısını almaqdır. Plan bundan ibarətdir ki, Elşad Abdullayev özü istintaqa cəlb ediləndən sonra siyahı cəmiyyətə təqdim edilsin.
Mənbəmizin məlumatına əsasən siyahının necə hazırlanması barədə də məlumat əldə etmişik. Məlum olub ki, siyahıya düşən adamlar indiyə kimi videolarda adları çəkilən şəxslərin ifadələri, istintaqın əldə etdiyi sənədlərin araşdırılması və eləcə də Elşad Abdullayevin telefon danışıqlarının siyahısı əsasında hazırlanıb. Hətta ilkin olaraq, Elşad Abdulayevlə telefon danışığı olan şəxslərə zənglərin edilməsi, onunla hansı səbəbdən danışması barədə sorğu –sualların aparılması da əldə etdiyimiz informasiyalar arasındadır.

Zaur