Oğurluq və narkotik alverində təqsirli bilinən məhkumdan sərt ittihamlar

Oğurluq, narkotik vasitələri əkib-becərməkdə, satmaqda və digər cinayətlərdə ittiham olunan Şəki şəhər sakini, 1971-ci il təvəllüdlü Razin Teymurovun cinayət işi üzrə məhkəmə prosesi başa çatıb.

İttihama görə, Razin Teymurov 12 aprel 2015-ci il tarixdə, saat 02 radələrində Rəhman Məmmədova məxsus Şəki şəhəri, Şərbablar küçəsi ev 47 ünvanında yerləşən evinə girib. O, evdən hər birinin dəyəri 80 manat olan iki ədəd qaz balonu və dəyəri 25 manat olan su mühərriki, dəyəri 15 manat olan su mühərriki, dəyəri 10 manat olan hidrafor aparatını oğurlayıb.

Razin Teymurov növbəti cinayət əməlini həmin ilin aprelin 20-də törədib. O, həmin gün gecə saat 02.00-da Şəki şəhəri M.Ə.Rəsulzadə prospekti 269 ünvanda yerləşən Gözdən Əlillər Cəmiyyətinin həyətində olan mebel sexinə gizli girib. O, oradan Nurməmməd İbrahimxəlilova məxsus 20 manat dəyərində bir ədəd laqonda və 20 manat dəyərində bir ədəd burğunu ələ keçirib.

Bundan başqa, Razin Teymurov satış məqsədilə istehlak miqdarından artıq miqdarda əldə etdiyi narkotik vasitə olan qurudulmuş marixuananı özündə saxlayıb. O, həmin narkotik vasitə olan marixuanadan satış məqsədilə bir qismini 27 aprel 2015-ci il tarixdə Yevlax rayonu Xaldan dairəsində “Elçin” adlı şəxsə satmaq barədə razılığa gəlib. O, daha sonra Xaldan qəsəbəsində başqa bir nəfərdən 3 üç ədəd kağız bükümündə ayrı-ayrılıqda təmiz çəkiləri 0,648 qram, 0,779 qram və 0,131 qram tiryəkdən kustar üsulla hazırlanmış narkotik vasitə olan heroini qanunsuz olaraq əldə edib.

Razin Teymurov həmin gün Şəki şəhərinə gəlib və saat 12.50-də Şəki Şəhər-Rayon Polis Şöbəsinin narkotiklərlə mübarizə bölməsinin əməkdaşları tərəfindən keçirilən əməliyyat tədbiri zamanı Şəki şəhəri, Şərbablar küçəsində saxlanılıb. O, polis şöbəsinə gətirilərək, üstünə baxış

keçirilib. Baxış zamanı Razin Teymurovun əynindəki gödəkcəsinin sol yan cibindən heroin aşkar edilib.

Bundan sonra müəyyən olunub ki, Razin Teymurov 2014-cü il ərzində yaşadığı evin həyətində əkilib-becərilməsi qadağan edilmiş narkotik tərkibli çətənə (kannabis) bitkilərini aqrotexniki qaydada xüsusi qulluq etməklə becərib. Buna görə də aprelin 27-də, saat 15.30-da Razin Teymurovun yaşadığı Şəki şəhəri, Şərbablar küçəsi ev 2/9 ünvanda baxış keçirilib.

Baxış zamanı qanunsuz olaraq təkrarən dibçəkdə əkərək kultivasiya etdiyi tərkibində narkotik maddələr olan 04 ədəd ümumi çəkisi 0,83 qram əkilib-becərilməsi qadağan edilmiş aqrotexniki qaydada xüsusi qulluq olunmuş narkotik tərkibli çətənə (kannabis) bitkiləri, yaşadığı evin yataq otağından, çarpayının altından qanunsuz olaraq satış məqsədilə əldə edib saxladığı təmiz çəkisi 401,58 qram olan qurudulmuş marixuana selofan torbada aşkar edilib.

Razin Teymurov Cinayət Məcəlləsinin 177.2.2, 177.2.3-cü (təkrar, yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törətmək), 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 234.2-ci (satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma), 237.2.2-ci (qanunsuz olaraq təkrar tərkibində narkotik maddələr olan bitkiləri kultivasiya etmə) maddələri ilə ittiham edilib.

Şəki Ağır Cinayətlər Məhkəməsinin hökmü ilə Razin Teymurov 5 il 6 ay müddətinə azadlıqdan məhrum edilib. Həmçinin narkomaniyada əziyyət çəkdiyi üçün onun barəsində narkoloji kabinetdə profilaktiki qeydiyyata alınması, cəza çəkdiyi müddətdə norkomaniyadan məcburi müalicə

olunması barədə qərar qəbul edilib. Hökmdən narazı qalan Razin Teymurov apelyasiya şikayəti verib. Onun şikayəti araşdırılması üçün Şəki Apelyasiya Məhkəməsinə göndərilib.

Razin Teymurov apelyasiya şikayətini onunla əsaslandırıb ki, Şəki Ağır Cinayətlər Məhkəməsinin hökmü sərt və ədalətsizdir: “Məhkəmə ittiham aktında göstərilən ittihamlara düzgün yanaşmayıb və onun söylədiyi dəlilllərə məhəl qoymayıb. Hesab edirəm ki, barəmdə olan cinayət işinin ibtidaii istintaqı zamanı kobud səhvlərə yol verilib, ittiham mümkün hesab edilə bilməyən və qeyri-mötəbər subutlara əsaslandırılıb. Birinci instansiya məhkəməsi də bu səhvləri aradan qaldırmağa çalışmayıb. Mümkün hesab edilə bilməyən və qeyri-mötəbər sübutlara əsaslanaraq mənə qarşı ittiham hökmü çıxarılıb. Məhkəmə vaxtı verdiyim səmimi və azad ifadəm yox, istintaq zamanı hədə-qorxu və aldatma yolu ilə əldə edilən ilkin ifadəm mötəbər sübut hesab edilib. Qeyd edirəm ki, Şəki Ağır Cinayətlər Məhkəməsi ittihamın sübut olunmasında yaranan şübhələri təqsirləndirilən şəxsin xeyrinə həll etməli olduğu halda, qeyri-müəyyən səbəbdən bunu etməkdən çəkinib və ittiham tərəfinə olan mövqeyini açıq-aşkar nümayiş etdirib. İttihamın sübut olunmasında yaranan şübhələri digər sübutlarla aradan qaldırmaqda çətinlik yarandıqda, onlar şübhəli sayılır və təqsirləndirilən şəxsin xeyrinə həll təfsir edilir. Şəki Ağır Cinayətlər Məhkəməsinin bu cür yanaşması Azərbaycan Respublikası Konstitutsiyası, Cinayət Məcəlləsi, Cinayət Prosessual Məcəlləsinin normalarına zidd olmaqla yanaşı, “İnsan Hüquqları və əsas azadlıqlarının müdafiəsi haqqında” Konvensiyanın nəzərdə tutuduğu hüquqların, xüsusilə də həmin müqavilənin 6-cı maddəsində nəzərdə tutulmuş məhkəmə araşdırması hüququnun kobud pozuntuları ilə müşayət olunan məhkəmə baxışı əsasında qəbul edilib. Ona görə də, Şəki Ağır Cinayətlər Məhkəməsinin hökmündə dəyişiklik edilməsini və mənə Cinayət Məcəlləsinin 234.1, 234.2 və 237.2.2-ci maddələri ilə məhkum edilməyimə dair hökmün ləğv edilməsini istəyirəm”.

Təqsirləndirilən şəxs daha sonra qeyd edib ki, onun ittiham olunduğu cinayət işi üzrə barəsində Cinayət Məcəlləsinin 70.3-cü (Şərti məhkum etmə təyin edilərkən məhkəmə tərəfindən sınaq müddəti müəyyən olunur. Bu müddət ərzində məhkum öz davranışı ilə islah olunmasını sübut etməlidir. Sınaq müddəti altı aydan beş ilədək müddətə müəyyən edilir) maddəsinə əsasən, təyin edilmiş cəzanın sınaq müddəti təyin edilsin.

Məhkəmə iclasında çıxış edən dövlət ittihamçısı Vidadi Cabbarov hökmün qаnuni və əsаslı, təyin edilmiş cəzаnın isə ədаlətli olduğunu göstərib. O, bildirib ki, apelyasiya şikayətinin təmin edilməsi üçün əsas yoxdur. Tərəfləri dinləyən hakim kollegiyası sonda Razin Teymurovun apelyasiya şikayətinin təmin edilməməsi barədə qərar qəbul edib.