Silsilə cinayətlər törədən gənclər cəzalandırıldı

Cəlilabad rayonunda oğurluq hadisələri törətməkdə təqsirli bilinən rayon sakinləri – 1987-ci il təvəllüdlü Samir Əzizov, 1986-cı il təvəllüdlü Rəşad Məmmədov və 1990-cı il təvəllüdlü Cavid Hüseynovun cinayət işi üzrə məhkəmə prosesi başa çatıb.
İttihama görə, Cəlilabad rayon sakinləri Samir Əzizov, Rəşad Məmmədov və digər şəxslər qabaqcadan əlbir olub, bir qrup şəxs halında cinayət əlaqəsinə giriblər.
Onlar Cəlilabad şəhəri, S.Axundov küçəsi, ev 1b-də yaşayan Əzizağa Mustafayevin 2016-cı il fevralın 16-da evində olmamasını biliblər. Onlar oğurluq etmək çəqsədilə həmin gün saat 10 radələrində evə girib.
Həmin vaxt Rəşad Məmmədov ətrafa nəzarət etmək üçün pusquda dayanıb, Samir Əzizov və cinayətkar qrupun digər üzvü isə evin yerləşdiyi ünvana gəlib, evin sol tərəfində yerləşən pəncərənin üstündəki dəmir barmaqlığı sındırıb.
Onlar evdən Əzizağa Mustafayevə məxsus 15208 manat dəyərində 9.700 ABŞ dollarını və 100 manat milli pulunu oğurlayıblar.
Bundan sonra Samir Əzizov, Rəşad Məmmədov və Cavid Hüseynov Cəlilabad şəhəri, Təbriz küçəsi, ev 17a-da yaşayan Sevinc Qiyevanıın evindən oğurluq ediblər.
Belə ki, Rəşad Məmmədov aprelin 30-da, saat 22 radələrində qrup üzvlərinə mobil telefonla zəng edərək dayısı qızı Sevinc Quliyevanın onunla eyni bir toy məclisində olduğunu, evdə olmadığını bildirib.
Bundan istifadə edən Samir Əzizov və cinayətkar qrupun digər üzvü Sevinc Quliyevanın yaşadığı evin giriş qapısının sağ tərəfində yerləşən pəncərənin üstündəki dəmir barmaqlığı sındırıb və evə giriblər. Onlar Sevinc Quliyevaya məxsus 3 min 300 manat dəyərində qızıl-ziynət əşyalarını və 2000 manat pulunu goğurlayıblar. Rəşad Məmmədov isə Sevinc Quliyevanın evindən göstərilən məbləğdə əmlaklarının gizli olaraq talanması ilə nəticələnən oğurluq cinayətinin törədilməsində cinayətin icraçılarına kömək edib.
Daha sonra Samir Əzizov, Rəşad Məmmədov və Savid Hüseynov Cəlilabad şəhəri, Babək küçəsi, ev 14-də yaşayan Zenfira Əsgərovanın evdə olmamasından istifadə ediblər.
14 iyun 2016-cı il tarixdə, saat 23 radələrində hər üçü Rəşad Məmmədovun idarə etdiyi “VAZ-21115” markalı avtomobil ilə Zenfira Əsgərovanın yaşadığı evin yanına gəliblər. Sonra Rəşad Məmmədov avtomobildə gözləyib, Samir Əzizov və Cavid Hüseynov evə giriblər. Evdən 1.000 manat dəyərində
“Arçelik“ markalı televizoru və 80 manat dəyərində iki ədəd gümüş üzükləri oğurlayıblar.
Bundan sonra dəstə üzvləri Cəlilabad şəhəri, Azərbaycan küçəsi, ev 35, mənzil 20-də yaşayan Fərid Əliyevin və ailə üzvlərinin evdə olmamalarından istifadə edib, iyun 27-də, saat 23 radələrində evə giriblər.
Samir Əzizovun özü ilə gətirdiyi burğu aləti ilə evin qapısını açıb. Bu zaman binada yaşayan Fərid Əliyevin yaxın qonşuları duyuq düşüb və onlar səs-küy salaraq, onların oğurluq etmələrinə mane olublar.
Samir Əzizov, Rəşad Məmmədov və Cavid Hüseynov Cinayət Məcəlləsinin 177.3.2-ci (oğurluq, külli miqdarda ziyan vurmaqla törədildikdə) maddəsi ilə ittiham ediliblər.
Lənkəran Ağır Cinayətlər Məhkəməsinin hökmü ilə Samir Əzizov 6 il 11 ay 27 gün, Rəşad Məmmədov 7 il 6 ay müddətinə azadlıqdan məhrum ediliblər. Zamində olan hər iki təqsirləndirilən şəxsin barəsində həbs qətimkan tədbiri seçilib. Onlar məhkəmə zalından həbs olunublar. Digər təqsirləndirilən Cavid Hüseynovun barəsində 2700 manat cərimə cəzası təyin edilib.
Hökmdən narazı qalan Samir Əzizov apelyasiya şikayəti verib. O, şikayətində barəsində olan hökmün dəyişdirilməsini, daha yüngül cəza verilməsini xahiş edib. Digər iki təqsirləndirilən isə apelyasiya şikayəti verməyiblər.
Samir Əzizovun şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Amil Dosiyevin sədrliyi ilə baş tutan prosesdə araşdırılıb. Hakim
kollegiyası apelyasiya şikayətinin dəlillərini araşdırandan sonra qərar elan edib. Qərara görə, Samir Əzizovun cəzası 5 il 11 ay 27 günə endirilib.
Məhkəmə Rəşad Məmmədov apelyasiya şikayəti verməsə də, onun cəzası ilə bağlı da dəyişiklik edib. Onun cəzası 7 il 3 aya endirilib.

Aslan
gundemxeber.az