Sərdar Cəlaloğlu: “Sabah Pənah liderlik etsə, demək mən o prosesdə olmayacağam”

- Sərdar bəy, müxalifətdə yeni birlik yaradırsınız, bu məqsədlə toplaşırsınız. Proses necə gedir?

- Söhbət müxalifət düşərgəsində birlik yaratmaqdan və ya konsolidasiyadan getmir. Sadəcə olaraq dünyada qlobal böhran yaşanır və bunun Azərbaycana təsirləri var. Bizdə toplaşaraq kollektiv şəkildə mövqe bildirmək üçün müəyyən cəhdlər edirik. Gələcəkdə prosesin hansı istiqamətdə gedəcəyi, müxalifətin birləşib-birləşməyəcəyi haqqında nəsə demək indidən tez olardı. İndi sadəcə olaraq müxalifət kollektiv şəkildə qlobal böhrana ilkin reaksiyalar verir. Məsələni bu cür qiymətləndirmək və qəbul etmək lazımdır.

- Yeri gəlmişkən, siz o zaman Pənah Hüseynin və gənclərin ideyasına qarşı çıxmışdınız. Amma indi Pənah Hüseynin ideyası əsasında toparlanma prosesində iştirak edirsiniz...

-Pənah Hüseynin hansı təkliflərini deyirsiniz ki?

- Pənah Hüseyn təklif edirdi ki, müxalifət bir araya gəlsin, unutmuşunuz?

- Bilirsinizmi, indi bir qrup partiya birgə tədbir keçirib. Hərədə bura öz ağlı və təklifləri ilə gəlib. Pənah Hüseyn bu, mənsə başqa ideya ilə bura gedirəm. Digər təşkilatlarda fərqli ideya və təkliflərlə gəlir. Ancaq bu o demək deyil ki, bura toplaşanların hamısı mənim və ya Pənah Hüseynin fikrinə görə bura gəlir. Şəxsən mənim üçün indiki mərhələdə müxalif partiyaların mövqeyi əhəmiyyətlidir. O mənadakı onlar nə düşünürlər, hansı təkliflərlə gəlirlər. Pənah Hüseynə tamam başqa şey lazımdır, yəqin onu müəyyən etmək istəyir və s. Bura gələnlər fərqli mövqedə və yanaşmalarda olur.

- Pənah Hüseyn bir müddət əvvəl bəyan etmişdi ki, bu mərhələdə liderlik etməyə iddialıdır...

- Biz burada kiminsə liderlik etməsinin qəti əleyhinə deyilik. Pənah Hüseyn də, niyə liderlik etməsin ki?

- Demək Pənah Hüseynin liderliyi ətrafında toplaşmısınız?

- Gərək liderlik üçün bir şey olsun ki, Pənah da liderlik etsin. Əvvəlcə lider, sonra isə proses yaranmır ki...

- Ancaq özünüz elan etmişdiniz ki, Pənah Hüseyn çılğın siyasətçidir, bu da liderlik üçün xarakterik deyil...

- Bu o deməkdir ki, mən Pənah Hüseyni lider olaraq qəbul edə bilmərəm. Amma Pənah Hüseyni lider kimi qəbul etmək istəyən bəlkə də, çoxlu sayda insanlar var. Hər şey mənim fikrimlə deyil axı. Tutaq ki, mən demişəm ki, Pənah Hüseynin liderlik üçün kifayət qədər xüsusiyyəti yoxdur. Sabah Pənah liderlik etsə, demək mən o prosesdə olmayacağam. İndi söhbət ondan gedir ki, hər şey reallıqdan asılıdır, sənin və ya mənim subyektiv fikirlərimdən asılı deyil. Mənim fikirlərim, bizim partiyanın yanaşmalarına uyğun həmin prosesdə işlər getməyəcəksə, demək bizdə orada olmayacağıq.

- Hazırda işçi qrupunda liderliyi Pənah Hüseyn edir?

- Hələlik heç bir liderlik yoxdur. Rotasiya qaydasına uyğun olaraq tədbirlərimizi keçiririk. Böyük tədbir bizdə keçirilib. Bundan sonra bir dəfə Ümid Partiyasının qərargahında görüşmüşük. Növbəti tədbir VİP-in qərargahında olacaq. Hələlik burada liderlik məsələsi yoxdur. İclasda konsensus tətbiq edilir, irəli sürülən ideya və təkliflər müzakirə edilir. Mən bilmirəm ki, siz hansı səbəblərə görə, liderlik məsələsini qabardırsınız. Amma hələlik ortada lider yoxdur.

- İşçi qrupun toplantısı ADP-də keçiriləndə siz, VİP-də keçiriləndə Əli Əliyev sədrlik edir. Pənah Hüseynin, İxtiyar Şirinin və digərlərinin qərargahları yoxdur. Bəs onlar işçi qrupuna necə moderatorluq edəcək?

- Biz demişik ki, kimin ofisi varsa, toplantıları ora salıb keçirəcəyik. Kimin ki, ofisi yoxdursa, demək onlarda keçirilməyəcək. Mütləq deyil ki, orada olan adamların hamısının ofisində mütləq tədbir keçirilsin. Ofis və şərait yoxdursa, deməli tədbirdə olmayacaq da.

- Sizcə, bu ədalətlidirmi, kimin qərargahı varsa sədrlik edəcək, kimin qərargahı yoxdursa etməyəcək. Pənah Hüseyn və digər partiya sədrləri elə gəlib ancaq sizin sədrliyinizlə keçirilən iclaslara qulaq asacaqlar...

- Ofisi olan əziyyət çəkir, iclası təşkil edir, gələn qonaqlara çay verir. Guya mənim qərargahımda iclası keçirdiklərinə görə, mənə medal verirlər? Ya mən nəsə qazanıram? Ötən həftə İqbalın ofisində toplaşdıq. Bəyəm buna görə, ona medal verdik? Əksinə, onu əziyyətə saldıq, çay təşkil etdi, məsuliyyəti daha çox oldu və s. Özü də, nəzərə alın ki, biz konkret təşkilat yaratmamışıq ki, belə məsələlər prinsipiallıq təşkil etsin. Bəlkə elə bu gün tədbirə qatılanlar sabah qatılmayacaq. Hələ bilmirik ki, bu ilkin cəhdlərin sonunda təşkilat yaranacaq, ya yaranmayacaq. Odur ki, bu məsələlər vaxtından qabaq ki, məsələlərdir.

- Ümid Partiyası ilə müttəfiqliyə son verdiniz. Amma indi yenidən müttəfiqliyə başlamısınız. Bu doğru siyasətdir?

-Bu platformada çoxlu partiyalar iştirak edir. İkitərəfli əməkdaşlıq məsələsi deyil. İkincisi, biz bu mərhələdə öz töhvəsini verən, böhrandan güclü çıxmaq arzusunda olan bütün qüvvələrlə bir yerdəyik. İstər Ümid olsun, istərsə də Müsavat. İndi bəzi partiyalar radikal hərəkətlərin tərəfindədir. Təbii ki, biz onlarla birgə ola bilmərik. Radikal islahatlar istəyən qüvvələrlə isə əməkdaşlıq edə bilərik.

- Fevralda daha geniş tədbir keçirmək istəyirsiniz?

-Mən öz fikrimi demişəm. Tədbir niyə keçirilməlidir, məqsəd nədir? Bu sual aydın olmalıdır. Bu platformada çoxlu partiyalar və təşkilatlar iştirak edir. Münasibətlər və təkliflərdə fərqlidir. Bəziləri hesab edir ki, tədbirləri çoxaltmaq lazımdır. Mən isə hesab edirəm ki, çoxluğu səhnəyə çıxarmaq doğru deyil. Mən bunun əleyhinəyəm. Biz deyirik ki, dialoq olmalıdır, hakimiyyət-müxalifət danışıqları müsbət olardı. Bəziləri isə hesab edir ki, indiki məqamda xalqı oyuna qatmaq lazımdır. Odur ki, fikir ayrılıqları var. Net qərar qəbul olunan zaman baxacağam, əgər düzgün hesab etmədiyimiz yol seçiləcəksə, biz bu prosesdə olmayacağıq.

- Milli Şura, AXCP və Müsavat tədbirlərinizdə nəyə görə, iştirak etmir?

- Hesab edirəm ki, siyasətdə əvəzedilməzlik deyilən bir şey yoxdur. Kim istəsə iştirak edə, kim istəsə iştirak etməyə bilər. Müsavatın bu tədbirdə iştirakı nə bizə böyük üstünlük qazandırır, nə də iştirak etməməsi. Sadəcə olaraq bəzi qüvvələrin kənarda qalması, qeyri müəyyən mövqe tutması bizim üçün maraqlıdır. Məsələn, Müsavat hansı təklifləri irəli sürür, bizim bəzi dostlarımız yanlış yol tutmurmu? Müxalifətdə olan qüvvələrin bəzi fikirləri milli maraqlara zidd ola bilir. Bu baxımdan mövqelər maraqlıdır. Yoxsa, guya AXCP və Müsavatın olub-olmamasının nə mənası. Biz onsuzda tədbirimizi keçirdik, lazım olsa AXCP və Müsavatdan daha böyük tədbirlər keçirə bilərik. Bunlar boş-boş şeylərdir. Onların burada olması və ya olmaması xüsusi əhəmiyyət daşımır. Əhəmiyyətlisi indiki vəziyyətdə düzgün qərarların qəbuludur. Düzgün qərarların qəbul edilməsi üçün də, ağıllı adamlar bir yerdə olmalıdır.

- Müsavat və AXCP-nin konkret mövqeyi nədən ibarətdir?

- Revanişist yanaşması var. Çünki bunlar vaxtı ilə hakimiyyətdə olublar. Mən görürəm ki, Pənah Hüseyn nə qədər əziyyət çəkir. Vaxtı ilə o da AXC hakimiyyətində təmsil olunub. Odur ki, bunun da, revanş hissləri var. Əli Kərimlinin, Arif Hacılının kənarda durması, bizim tədbirlərimizə gəlməməsi, bizə başqa ad qoyması anlaşılandır. Onlar 25 il əvvəl hakimiyyətdə olublar. İndi də, əvvəlki mövqeləri əldə etmək üçün revanşist əhval-ruhiyyədədirlər. Bu əhval ruhiyyə nə qədər ki, onlarda var, vəziyyətə bizim kimi baxa biləməyəcəklər. Yəni bir yerə ola bilməyəcəyik. Üstəlik bizimdə hərəkət və davranışlarımız onların təəbrincə “satılmaq” kimi görünəcək. Bunlar bizim bir araya gəlməməyimiz üçün ən ciddi səbəbdir.

- Sizə niyə “cib” müxalifəti, “satqın” təşkilatlar deyirlər?

- Biz heç kəsə müxalifətin bir arada olduğunu göstərmirik. Bunlar sadəcə böhranla bağlı ilkin reaksiyadır. Guya indi Əli Kərimli və ya Müsavat cib müxalifəti olmayıb nə iş görüblər ki? Əksinə, bu cürə mövqe müxalifətin daxilində çəkişmə yaratmaqdır. Yəni mənə deyəndə ki, cib müxalifətisən, mən də məcbur olub deyəcəyəm ki, sən də satqınsan. Beləcə çəkişmə gedir və xalqda müxalifətdən uzaqlaşır. Ola bilsin ki, onlar düşüncəsizlikdən bu addımı atırlar. Yaxşı, tutaq ki, biz cib, Müsavat və AXCP isə xalqın “qəhrəman” müxalifətisən. Yaxşı bəs bunlar qəhrəman müxalifətdirsə, nədən AXCP ilə Müsavat bir araya gələ bilmir, birgə tədbir keçirib vahid mövqedən çıxış etmirlər? Bunu müəyyən edin. Bu müxalifətə də deyirəm ki, indiki halda sizin revanşist ab-havada olmağınız, bu üslubda mübarizə aparmağınız Azərbaycan xalqına heç nə vəd etmir.

- Son günlər Müsavat başqanı Arif Hacılı ilə müzakirələriniz olubmu?

- Yanvarın 23-də Müsavat başqanı Arif Hacılı ilə bizim partiyanın qərargahında görüşdüm. Özüm ondan xahiş etdim ki, yanvarın 24-də keçiriləcək toplantıda iştirak etsin, birgə mübarizə aparaq. Arif Hacılı da gülümsədi və səhəri günü tədbirə gəlmədi.

- Əli Kərimli və Milli Şura ilə kontakt qurmusunuzmu?

- Əli Kərimli ilə heç bir kontaktım yoxdur və yaratmaq niyyətində də deyiləm.

- Ancaq Razi Nurullayevin cəbhəsi tədbirə qatılıb...

- Bu barədə təklif irəli sürüləndə, mən bunun əleyhinə çıxış etdim.

- Ancaq Razi Nurullayevin müavini həmin tədbirdə iştirak edib...

- Bizim tədbirdə müsavatçılarda, cəbhəçilər də var idi. Kütləvi tədbirdə insanların iştirakı normaldır. Dedik ki, kim maraqlanırsa, fikrimizi bilmək istəyirsə, buyurub gəlsin.

HÜSEYN ABBASOĞLU

gundemxeber.az