AXP sədrinin müsahibəsi ölkə siyasətinin gündəmində zəlzələ effekti yaradıb


Azərbaycan Xalq Partiyasının sədri Pənah Hüseynin “Yeni Müsavat” qəzetinə son müsahibəsindəki açıqlamalar geniş ictimai müzakirəyə səbəb olub. P.Hüseynin ictimai müzakirə hədəfinə çıxan açıqlamalarından biri “İlk dəfədir rejissoru özümüz olmadığımız oyunda rol almaq zorunda qalmışıq” fikridir.
Milli Şuranın komissiya sədri Eldəniz Quliyev həmin fikirlə bağlı “Qafqazinfo”ya deyib ki, Pənah Hüseyn ağıllı siyasətçidir, amma bəzən lazım olduğundan çox ağıllılıq nümayiş etdirir: “Pənah bəyin həmin sualına cavab olaraq ondan soruşmaq lazımdır ki, ssenari müəllifi, rejissoru olduğunuz tamaşalarda, rolları payladığınız əsərlərdə hansı nailiyyətləri əldə etmisiniz? Vahid namizədin seçildiyi ərəfədə ağıllı siyasətçi ehtiyatlı davranmalı və bu həssaslığı nəzərə almalıdır”.

P.Hüseyn isə onun fikirlərinə bildirilən rəylərə, cavablara heç bir münasibət bildirmək istəmədi: “Mən fikirlərimi müsahibəmdə bildirmişəm. Mənim fikirlərim barədə digərlərinin fikri bildirmək hüququ var. Mən onlara şərh verməyə ehtiyac duymuram”.

ADP sədri Sərdar Cəlaloğlu isə “Yeni Müsavat”a açıqlamasında Pənah Hüseynin narahatlığını bölüşdüyünü və bu narahatlığa əsas olduğunu bildirdi: “Pənah bəy narahatdır ki, ssenari Rusiyada yazılıb. Rusiyada demokratiya yoxdursa, orada yazılan ssenari nə dərəcədə Azərbaycan xalqının istəklərinə uyğun olacaq? Həmin müsahibədə Pənah Hüseyn etiraf edir ki, müxalifət bu ssenariyə daxil edilib. Bu ssenarinin nəticələrinə görə məsuliyyət müxalifətin, İsa Qəmbərin, Əli Kərimlinin üzərində qalacaq. Orada iştirak edən digər qüvvələrin elə bir məsuliyyəti yoxdur. Yəni sabah nəticəyə görə məsuliyyəti Eldəniz Quliyev kimi adamlar daşımayacaqlar. Çünki Eldəniz Quliyev kimdir ki?! Eldəniz Quliyev siyasətçi olmayıb və bu gün də siyasətçi deyil. O, ictimai-siyasi hadisələrin mahiyyətinə vara bilmir. Sadəcə ona bir rol ayırıblar və həmin rolu oynayır. Xalq həqiqəti net şəkildə bilsə, bir nəfər də olsun Milli Şuranın arxasınca getməz. Xalqın bir dənə müstəqilliyi qalıb əlində. Müstəqillik də əldən gedəndən sonra Eldəniz Quliyev kimi adamlar öz rollarını oynayıb bitirmiş olacaqlar və kənara çəkiləcəklər. Məsuliyyət isə qalacaq Müsavat və AXCP-nin, onların liderlərinin üzərində. Biz heç olmasa verdiyimiz qərarları bilirdik ki, özümüz veririk, bilirdik ki, təklif kimindir, necə müzakirə olunub, hansı nəticələri ola bilər. İndi Moskvadan bir dənə paket gəlir və təkliflər, nə edilməli olan məsələlər orada olur. Burdakı liderlər isə sanki icraçı məmurlar kimi onu icra edirlər. Pənah Hüseyn də, bax, bundan narahatdır”.

ADP sədri qeyd etdi ki, demokratik qüvvələr bu 20 ildə əksər seçkilərdə xalqın səsini qazana biliblər. Bunun özü uğurdur. Qələbəni rəsmiləşdirmək isə beynəlxalq dairələrin Azərbaycanda siyasi hakimiyyətin dəyişməsinə xeyir-dua verməməsi səbəbindən mümkün olmayıb: “Ona görə də biz uzun illər Azərbaycan iqtidarı ilə yanaşı həmin beynəlxalq dairələrlə üz-üzə durmalı olmuşuq. Hamı başa düşür ki, dünya gücləri demokratik dəyişimə dəstək vermədiyi halda daxili güclər heç bir şey edə bilmirlər. Azərbaycanda məhz belə olub. Buna görə demokratik qüvvələrin heç bir uğurunun olmadığını iddia etmək düzgün deyil”.

Bir sıra siyasi şərhçilər isə hesab edir ki, Pənah Hüseyn Milli Şura ilə bağlı ifrat ağıllılıq nümayiş etdirməkdə haqlıdır. Bu ölkənin müstəqilliyi uğrunda savaşmış, buna görə məhrumiyyətlər yaşamış bir şəxsin müstəqillik üçün əndişələnməsi təbiidir. Müstəqillik uğrunda savaşın nə olduğunu bilməyənlər üçünsə əlbəttə Pənah Hüseynin narahatlığını başa düşməməsi təbiidir. Demokratik qüvvələrin özlərinin ssenari müəllifi və rejissoru olduqları proseslərdə heç bir uğura imza atmadığını iddia edənlərin nəzərinə isə bir faktı xatırlatmaq yerinə düşür. Pənah Hüseynin də daxil olduğu demokratik qüvvələr özlərinin ssenari müəllifi və rol aldığı proseslərdə ən böyük uğura nail olub Azərbaycanı müstəqil dövlət ediblər. Və 20 ildir bu müstəqil dövlətin müstəqilliyinə zərər gətirəcək heç bir addıma getməyiblər. Bir qüvvənin 20 ildə heç bir sapmaya yol verməməsi ssenarini məhz özlərinin yazmasının nəticəsidir.