Bir neçə gün bundan əvvəl Gəncə Lokomotiv Deposunda iş saatının sonlarında "ADY"QSC-nin istehsalat şöbəsinin rəisi vəzifəsindən Cavid Qurbanovun yeni təyinatından sonra, həmin şöbənin baş mühəndisi vəzifəsinə irəli çəkilən 66 yaşlı Asim Qasımovun təlimatçı işləyən qardaşı oğlu Sabit Qasımovla, maşinist köməkçisi Arzu Kərimov arasında mübahisə düşür. Bütün zamanlarda olduğu kimi, baş alıb gedən səs-küyə Sabit Qasımovun adı çəkilən depoda işləyən qardaşları Cabir və Cavid gəlirlər. Məsələyə müdaxilə edən qardaşların hər ikisi lokomotiv deposunda çalışsalar da, hal-hazırda məzuniyyətdədirlər. Onların mübahisəyə qarışmaları, son anda Arzu Kərimovun bıcaqlanması ilə nəticələnir. Səbəb də, təlimatçı Sabitin iş vaxtı maşinist köməkçisinə yatması ilə bağlı irad bildirməsi olur. Depo əməkdaşlarının bildirdiyinə görə, təlimatçı Sabit Qasımovla maşinistlər və maşinist köməkçiləri arasında belə mübahisələr tez -tez baş verir. Onu da vurğulayaq ki, təlimatçı S.Qasımov bütün zamanlarda tutduğu vəzifədən asılı olaraq, daim yararlanmağı bacaran vəzifə sahiblərindən biri hesab olunub. Belə ki, o, hərbi xidmətə yararsız olsa da, sex rəisi vəzifəsində çalışdığı zaman dəfələrlə lokomotiv deposunda "mis əməliyyatları"nın təşkilatçısı kimi yaxalanıb və həmin zamanlarda da "ADY"QSC-də lokomotiv istehsalat rəisi vəzifəsində çalışan əmisi Asim Qasımovun sayəsində, daim “sudan quru” da çıxmağı bacarmışdı. Onu da qeyd edək ki, Sabit və Cabir Qasımov qardaşlarının hər ikisi hərbi xidmətə yararsız sayılırlar və işlərindəki ciddi nöqsanlara görə dəfələrlə işdən çıxarılsalar da, çox keçməyib ki, əmilərinin sayəsində Gəncə lokomotiv deposuna bərpa olunublar. Asim Qasımov haqqında qısa arayış: Asim Qasım oğlu Qasımov 90-cı illərdə Gəncə Lokomotiv Deposunda maşinist vəzifəsində çalışmış, daha sonralar "Xalq Cəbhəsi"nin Gəncə dəmir yolunda qovşaq rəhbəri olan Elfat Nağıyevin və həmin zamanlarda kriminal avtoritet sayılan, sonralar elə oğru aləmin əli ilə evinin qarşısında güllələnən qardaşı Rasim Qasımovun ( ləqəbi Yanıq Rasım) hədələri altında lokomotiv deposuna rəis təyin olunmuşdu. Dəmir yolu sahəsində Mendeleyev cədvəlində dəmir yoluna aid metalların hətta xarici ölkələrə belə satışı ilə məşğul olmuş Asim Qasımovun küllü sərvət sahibi, saysız evlər, villalar, Gəncədə obyektlər sahibi olması heç kimə sirr deyil. Əvvəllər özünü Ziya Məmmədovun kadrı olduğunu etiraf edən istehsalat rəisi bütün zamanlarda sudan quru çıxmış , hər bir rəhbərə "XOD" da tapa bilmişdir. O, 66 yaş həddində olmasına baxmayaraq, bu dəfə də Cavid Qurbanova yol tapmağı bacarıb. Hal-hazırda əldə etdiyimiz məlumata görə, zərərçəkmiş maşinist köməkçisi Arzu Kərimov şikayət edərsə, o, işdən çıxarılacağı ilə də təhdid olunur. İlk öncə o, Gəncə Təcili Tibbi Yardım Xəstəxanasına aparılsa da, həmin gün də evə buraxılır. Mövzunu diqqətdə saxlayacağıq. Qarşı tərəfin də mövqeyini dərc etməyə hazırıq.

Mehriban

gundemxeber.az