“Bizim market” şəbəkəsinin rəhbəri Xanımbacı İsmayılova kürəkəni Easim Salmanovla bağlı hüquq-mühafizə orqanlarına müraciət edib.

Məlumata görə, daxili işlər naziri Ramil Usubova, nazirin birinci müavini Vilayət Eyvazova, Bakı Şəhər Baş Polis İdarəsinin rəisi Mirqafar Seyidova İsmayılova Xanımbacı Qasım qızı tərəfindən göndərilən ərizədə qeyd olunub ki, MTN hadisələri bəzi məmurlara dərs olmadı, onlar yenə də müəyyən adamlarla əlbir olub əmlak ələ keçirmək, insanları alçaltmaq, öz güclərini sadə vətəndaşlar üzərində göstərmək, milyonlarla pulları dövlət büdcəsindən və qanundan gizlətmək yolu tutublar: “Belə ki, mən rəsmi olaraq “Bizim market” şəbəkəsinin sahiblərindən biriyəm. Kürəkənim Salmanov Rasim Süleyman oğlu da qeyri-rəsmi həmin marketlər şəbəkəsinin sahibidir. Rasim Salmanov dövlətdən əmlaklarını və pullarını gizlətmək məqsədilə öz adına heç bir əmlak rəsmiləşdirməmişdir. Bunun müqabilində o, mənim və qızlarımın, nəvəmin adına bank hesabları açmış, mütəmadi olaraq həmin bank hesabları ilə 100 000 000 ABŞ dollardan çox pul vəsaitlərini Türkiyə və Kanadaya keçrimişdir. Demək olar ki, adı heç harda getməsə də bütün əmlak və pulları xarici ölkələrə qanunsuz yollarla aparmışdır. Hətta birinci devalvasiyadan sonra heç kəsin bankdan dollar çıxara bilmədiyi bir vaxtda o, Beynəlxalq Bankın sədri Cahangir Hacıyevlə əlbir olub milyonlarla dollar pulu bankdan çıxarmışdır (bank əməliyyatları barədə sənədləri təqdim edə bilərəm).

“Bizim market” Şəbəkəsinin günlük yığılan pulları isə mənim nəvəm Quliyev Sahib Arif oğlunun “Yapıkredibank”da adi cari hesabına köçürülmüşdür. Ordan isə mütəmadi olaraq Rasim Salmanovun göstərişləri ilə pulları nəvəm çıxardıb inkassatorla onun evinə və tapşırıq verdiyi digər yerlərə aparmışdır. Lakin son dövrlər devalvasiyanın olması, Cahangir Hacıyevin tutulması, onun pul əməliyyatlarını həyata keçriməkdə çətinlik çəkməsi və artıq qanunsuz pul köçürmələrinin qeyri-mümkünlüyü görən Rasim Salmanov bizim ailəni neytrallaşdırmaq qərarına gəlmişdir. Əsas səbəb isə ailə daxili mübahisə olmuş və mənim onun qanunsuz əmələri barədə hüquq-mühafizə orqanlarına məlumat verməyim barədə xəbərdarlığım olmuşdur. O, “qara məni basınca, qoy mən basım” prinsipi ilə hərəkət etmiş, Bakı Şəhər Baş Polis İdarəsində müavin işləyən general dostlarının köməkliyi və havadarlığı ilə heç bir günahı olmayan nəvəm Quliyev Sahib Arif oğlu barədə dələduzluq maddəsi ilə cinayət işi başlatmış, məmurlara 100 000 manat (pulun məbləğini Rasim açıq-aşkar özü deyir) xərcləyərək nəvəmi tutdurmuşdur. Mən tam məsuliyyətimlə bildirirəm ki, Elxan adlı general şəxsən mənim ailəmin dindirmələrində iştirak etmiş və bizdən əmlakları Salmanov Rasimə verməyimizi təkidlə tələb etmişdir. Bundan başqa məndə olan məlumata görə Sizin qohumunuz Xətai rayon Prokuroru Yusif İldırımzadə mənim nəvəmin həbs edilməsində əsas rol oynayan şəxsdir və birbaşa Rasim Salmanovun biznesinə havadarlıq edir.

Hazırda bizi xəbərdarlıq edir ki, sakit dursanız, özünüzü ağıllı aparsanız, necə cinayət işi başlatmışam, elə də xitam elətdirəcəm. Müstəntiq mənim bir işarəmlə bu işi ya bağlayar, ya davam edər. Bildirim ki, onunla əlbir olan müstəntiq Vüqar İsmayılovdur.

Salmanov Rasim Süleyman oğlu barəsində ətraflı araşdırma aparılıb, oğurladığı pulları geri qaytarması, nəvəm barədə isə icraata xitam verilməsi barədə göstəriş verməyinizi xahiş edirəm”.

Gülər Məmmədsoy