NATO-nun kadrı sayılan müdafiə nazirinin devrilməsi
Kremlin planlarına daxildir; son aksiyanın zorakılıqla
dağıdılması Əliyevin Putinə “əzələ nümayişi”dir

“Son günlər əsgər ölümlərinin qabardılması və buna görə Müdafiə Nazirinin istefasının ciddi şəkildə tələb edilməsi Rusiyanın Azərbaycandakı planlarının tərkib hissəsidir”.
Bu barədə Avropa.info-ya hakimiyyət dairələrindəki mənbədən məlumat verilib. Mənbənin dediyinə görə, NATO-nun kadrı sayılan Səfər Əbiyevin devrilməsi Rusiyanın əsas planlarındandır. “Rusiya hakimiyyəti hesab edir ki, Azərbaycan ordusunda NATO sisteminin tətbiq olunması və getdikcə ordunun Rusiyadan uzaqlaşması Səfər Əbiyevin adı ilə bağlıdır. Məhz bu səbəbdən də, Azərbaycanda təsir imkanlarını artırmaq istəyən qonşu dövlət ilk növbədə Azərbaycan ordusunun rəhbərliyinə Rusiyaya tanış olan bir ismi gətirmək istəyir” - deyə mənbə vurğulayır.
Onun sözlərinə görə, bütün bunlara baxmayaraq “Əsgər ölümlərinə son” şüarı ilə keçirilən aksiyaların Rusiyaya heç bir bağlılığı yoxdur: “Azərbaycandakı müxalifətin və bütövlükdə protest elektoratın Rusiya ilə uzaq məsafə saxlamaları məlumdur. Sadəcə son dövrlər əsgər ölümləri çoxaldığından müxalif gənclərin buna sərt reaksiya verməsindən Rusiya yararlanmaq fikrindədir. Çünki Rusiyanın Azərbaycan müxalifəti içərisində elə bir ciddi dayaqları yoxdur. Məhz Rusiyanın Azərbaycanda protest elektoratı olmadığı üçün qonşu dövlətə bu prosesi daha da qızışdırmaq qalır”.
Hakim dairənin Səfər Əbiyevə münasibətinə gəlincə, müdafiə nazirinin yarıtmaz kadr olduğu fikri həm hakimiyyətdə, həm də ictimaiyyətdə birmənalıdır deyə mənbə bildirir: “20 ildir nazir olan Səfər Əbiyevdən artıq hamı bezib. Hakimiyyət daxilində də onun istefaya göndərilməsini istəyənlər var. Müəyyən hakimiyyətdaxili klanlar da onun vəzifəsindən uzaqlaşdırılmasını istəyirlər.
Lakin prezident İlham Əliyev NATO-nun müdafiə etdiyi Səfər Əbiyevin Rusiyanın hərbi təhdidləri qarşısında tab gətirə biləcək şəxs olmasını və ölkə başçısına sadiqliyini nəzərə alaraq onu vəzifəsində saxlayır. Eyni zamanda dövlət başçısı müdafiə nazirinin devrilməsinin Rusiyanın planlarına aid olduğunu nəzərə alaraq onu istefaya göndərmir. Lakin son 20 ildə olan əsgər ölümlərinin başlıca müqəssirinin Səfər Əbiyev olmasını da heç kim təkzib etmir”.
Martın 10-da əsgər ölümləri ilə bağlı Bakıda keçirilən aksiyanın su şırnaqları, rezin güllələr, gözyaşardıcı qaz vasitəsi ilə dağıdılmasına gəlincə, mənbə bildirir ki, bu hakimiyyətin Rusiyaya güc nümayişi idi: “Bundan əvvəl də əsgər ölümləri ilə bağlı aksiya keçirilmişdi. Lakin o zaman hakimiyyət bu aksiyaya ciddi müdaxilə etməmişdi. Bu dəfə isə etirazçıların Rusiya ilə heç bir bağlılığı olmamasına baxmayaraq, hakimiyyət qonşu dövlətə güc nümayiş etdirdi. Bununla da Rusiyadan gələn bütün təhlükələrə adekvat reaksiya verəcəyini diqqətə çatdırdı”.
Ancaq gedişat S.Əbiyevin xeyrinə işləmir və vəziyyət onu deməyə əsas verir ki, Rusiya onu yıxmağa hazırlaşır. Bu istiqamətdə zəmin hazırlayıb və gec-tez Kreml məqsədinə çatacaq. Çünki Moskvanın arzuları həmişə gerçəkləşir. Orduda əsgər ölümlərinin səngiməməsi də bir tərəfdən prosesin daha da qızışmasına təkan verir.
Müdafiə Nazirliyi daxilində də xeyli dərəcədə ruspərəst qüvvələr var. Başda Nəcməddin Sadıqov olmaqla ordu içində Moskvanın yanında olan generallar, komandanlar işləyir. “Qurd ağacı içindən yeyər” deyiminə uyğun olaraq həmin qüvvələr Əbiyevin axırına çıxmaq üçün budaqlarını silkələyirlər. Eyni zamanda Elçin Quliyev də nazirə qarşı olan qüvvələrdən biridir. Lakin S.Əbiyev geri çəkilənə oxşamır. NATO-nun dəstəyinə güvənən nazir arxayınlaşıb ki, onu postundan kimsə tərpədə bilməz. İlham Əliyev isə seçki ilində fors-major vəziyyət yaranarsa nəinki Əbiyevi istefaya göndərər, hətta həbs belə etdirər.

Aslan