Ötən ilin iyulunda öldürülən Natavan Əliyevanın keçmiş həyat yoldaşı «Azadlıq»a nələr yazdı?

2015-ci ilin iyulunda qətlə yetirilən Natavan Əliyevanın keçmiş həyat yoldaşı Samir Əliyev redaksiyamıza müraciət edib. Müraciəti redaksiyamıza onun indiki həyat yoldaşı Zəminə Əliyeva təqdim edib. Qeyd edək ki, keçmiş polis işçisi olan Samir Əliyev Natavan Əliyevanın qətlində təqsirləndirilərək həbs olunub. O, redaksiyamıza müraciətində işgəncələrə məruz qaldığını, qətli onun üzərinə qoyulduğunu iddia edir. Samir Əliyevin müraciətində kifayət qədər ciddi ittihamlar var. Bəribaşdan bildiririk ki, bu müraciəti dərc etməklə istintaqa təsir göstərmək, Samir Əliyevin təqsiriszliyi barədə rəy yaratmaq niyyətimiz yoxdur. Biz də hüquq-mühafizə orqanları kimi istənilən cinayətin cəzasız qalmamasında maraqlıyıq.

Beləliklə, Samir Əliyev yazır:

“Döyməyin ki, iz qalmasın, amma danışana qədər belə halda saxlayın”

“08.07.2015 tarixdə Xətai Rayon Polis Idarəsinin əməkdaşları mənə zəng etdilər və dedilər ki, Respublika Xəstəxanasında meyit var, gedin baxın, bəlkə tanıdız. Artıq neçə gün idi ki, Xətai Rayon Polis Idarəsinin əməkdaşları ilə birgə mən və ailə üzvlərimiz itkin düşmüş dayım qızı Əliyeva Natəvanın axtarışında idik. Bu barədə məlumat alan kimi, avtomobilim yuyucuda olduğundan taksi ilə meyitxanaya getdim. Çatan kimi Xızı Rayon Polis Şöbəsinin əməkdaşları mənə yaxınlaşıb onlarla getməyimi tələb etdilər və məni tələsik öz avtomobillərinə oturdub apardılar. Mən avtomobilimin yuyucuda olduğunu dedim və xahiş etdim ki, gedək avtomobilimi götürüm. Xətai rayonu, Qaçaq Nəbi küçəsindəki yuyucuya getdik. Mən maşından düşmədim və yuyucudan maşını əməkdaşlara təhvil verilməsini xahiş etdim. Salman adlı, sonradan Cinayət Axtarış Bölməsinin rəisi olduğunu bildiyim polis əməkdaşı mənim avtomobilimi idarə etdi və biz birlikdə Xızı Rayon Polis Şöbəsinə gəldik. Əvvəlcə Yadigar adlı rəis müavini, sonra isə rəis Elmar Usubov, Cinayət Axtarış Bölməsinin rəisi Salman adlı şəxs, rayon prokuroru və müstəntiq məni şifahi sorğu-sual etdilər. Üzərimdə olan 1 ədəd ”Iphone” və 1 ədəd “Samsung Duos” markalı mobil telefonlarımı, “Tissot” markalı qol saatımı, pul qabımı və ümumilikdə 1550,00 AZN pulumu maddi sübut kimi götürdülər. Əlavə olaraq avtomobilimə də mənim iştirakım olmadan baxış keçirdilər və mənə qeyd edilənlərlə bağlı heç bir protokol təqdim etmədilər. Sorğuda iştirak edən rayon prokuroru və müstəntiq, Yadigar adlı rəis müavini son günədək mənimlə etik normalara uyğun rəftar etdilər. Lakin rəis Elmar Usubov və göstərişlərini yerinə yetirən Cinayət Axtarış Bölməsinin rəisi Salman şərəf və ləyaqətimi alçaltmaqla və fiziki zor tətbiq etməklə dindirmələr və sorğular keçirirdilər. Ayaqlarımın altına rezin dəyənəklərlə vurduqda söydüyümü görüb ağzımı, ayaqlarımı, əllərimi yapışqan lentlə bağlayaraq xidməti otaqda yerə uzatdılar. Saat 20:00 radələrindən təxminən 3 saatdan da çox o vəziyyətdə saxladılar və Elmar Usubov Salmana tapşırdı ki, döyməyin ki, iz qalmasın, amma danışana qədər belə halda saxlayın.

“Divarlara qanımla ”Mənə vəkil verin” sözlərini yazdım”

Gecə yarısı idi və artıq sutka dəyişmişdi. Məni Xızı Rayon Polis Şöbəsinin yaxınlığında yerləşən prokurorluq binasına gətirdilər. Tural adlı müstəntiq gecə yarısına qədər şahid qismində dindirərək ifadəmi aldı və təxminən 03:30 radələrində məni şöbəyə qaytardılar. Səhv etmirəmsə, 2-ci və ya 3-cü mərtəbədə dəhlizdə səhərə qədər saxladılar. Yanımda adını xatırlamadığım serjant da mənimlə bərabər dəhlizdəki kresloda oturduq. Növbədə olan Nurəddin və Aqil adlı əməkdaşlar mənə münasibətdə normal olsalar da, Salman səhərə kimi tez-tez otağından çıxıb yatdığım üçün qəfil təpik vurmaqla məni yatmağa qoymurdu və sonra otağına qayıdırdı. Səhər saat 09:00 radələrində mənə qarşı qeyri-insani rəftarı görüb vəkil tələb etdim və ailə üzvlərimlə telefonla danışmaq istədiyimi bildirdim. Əvəzində isə, Salmandan, daha sonra isə Elmar Usubovdan təhqirlər eşitdim. Məni nə əsasla saxladıqlarını soruşaraq pozulmuş hüquqlarımın bərpasını tələb etdikdə Salman yanımda mühafizə üçün dayanmış serjantın paqonunu yerə ataraq “al, bu da əsas” dedi və məni polisə müqavvimət göstərməkdə ittiham edərək məhkəmədə 6 sutka inzibati həbs qərarı verdilər. Məhkəmədə vəkil tələb etsəm də, əsassız həbs olunduğumu desəm də, eşidən olmadı. Məhkəmədən dərhal sonra məni prokurorluğa apardılar və Bakıdan gələn müstəntiq Aslan Ibrahimov məndən şahid qismində təkrar ifədə aldı. Sonra isə şöbəyə gətirildim və nahar fasiləsindən sonra məni Elmar Usubov və Aslan Ibrahimov şifahi sorğu-sual etdilər. Aslan Ibrahimov əvvəlcə mülayim danışsa da, Elmar Usubovun təhqir və qışqırıqlarına cavab vermədiyimi gördükdə o da təhqirlərə başladı, mənə işgəncə verməyi göstəriş verib otaqdan çıxdı. Məni 6 sutka həbsimi çəkmək üçün şöbənin müvəqqəti saxlama yerinə apardılar. Sol tərəfdən ən son kamerada saxlanıldım. Oranın Süleyman adlı serjantı mənə bir neçə saxlanma ilə bağlı sənədə qol çəkdirdi və mən ona inzibati həbs qərarından şikayət ərizəsi yazmaq üçün vəkil və ailəmə zəng hüquqlarımın təmin olunmasını tələb etdim. Saxlandığım 6 gün ərzində heç bir tələbim yerinə yetirilmədi. Hətta mənə ərizə yazmaq üçün kağız-qələm də vermirdilər. Kameradakı asılqanın dəmiri ilə qolumu kəsərək bütün divarlara qanımla “Mənə vəkil verin” sözlərini yazdım. Həmin yazıları mənim orada saxlandığım son gün xadiməyə sildirdilər. Inzibati həbsdə olduğum 6 gün ərzində demək olar ki, hər gün Aslan Ibrahimov və Elmar Usubov ora gələrək məni şifahi və yazılı sorğu-sual edirdilər.

“Şantaja keçib atamın üzünə durmağı tələb etdilər”

Avtomobilimdən götürülmüş yaddaş diskində şəxsi həyatıma və ailəmə aid video-foto görüntülərin olduğunu deyən Aslan Ibrahimov cinayətin mənim və ya atamın törətməsi barədə şübhələri olduğunu bildirərək ikimizdən birimizin bunu etiraf etməli olduğumuzu tələb edirdi.

Mən valideynlərimlə normal münasibətim olmadığını, 2-ci ailə həyatı qurmağımla əlaqədar küsülü olduğumuzu dedikdə atamdan şübhələnməyim barədə ifadə verməyimi tələb etdi. Mən isə törədilmiş cinayət barədə anlayışım olmadığını və “kim tərəfindən törədilməsini bilsəydim deyərdim” dedikdə üzümə tüpürərək başıma zərbə vurdu. 15.07.2015-ci il tarixdə 6 günlük inzibati həbs müddəti bitdi və məni rəis müavininin otağına apardılar. Lakin rəis müavini Yadigar otaqda yox idi. Elmar Usubov, Aslan Ibrahimov və özlərini MTN əməkdaşı kimi təqdim edən 3 nəfər əvvəllər görmədiyim şəxs məni sorğu – sual etdilər. Sonra adını bilmədiyim 3 nəfərdən biri başıma selofan torba keçirib “ya danışacaqsan, ya da öləcəksən” deyib torbanı başımdan keçirib boğazımda sıxdı. Təxminən 30-40 dəqiqəlik dindirmədən sonra, müvəqqəti saxlama yerinin əməkdaşı Süleyman otağa gəlib əleyhqaz gətirdi. Mənə MTN əməkdaşı kimi təqdim olunan 3 nəfərin ikisi qollarımdan tutub biri isə əleyhqazı başıma geyindirdi və məni bu cür işgəncə ilə sorğu-suala tutaraq işgəncə ilə boynuma etmədiyim cinayəti qoymaq üçün əllərindən gələni edirdilər. Məni MTN-in təcridxanasına aparacaqlarını deyərək hədələyirdilər. Sonra Aslan Ibrahimov əlində bir neçə A4 formatlı kağızda ağ-qara çap olunmuş şəkillər göstərdi və əlehqazı başımdan çıxartmağı tələb etdi. Aslan Ibrahimovun mənə göstərdiyi şəkillər, mənə məxsus yaddaş diskində olan şəxsi həyatıma və ailəmə aid, açıq-saçıq, çimərlik şəkilləri idi. Mən hər şeyi gözləsəm də, bunu gözləmirdim və əsəbimdən otaqda onların hamısını söydüm və bu cür şantaja görə cavab verəcəklərini dedim. Elmar Usubov isə mənə “hələ sən mənim kim olduğumu bilmirsən” deyib güldü. Əlehqazı isti havada mənə geyindirib işgəncələri davam etdikdən sonra məni elə həmin gün, yəni 15.07.2015-ci il tarixdə Süleyman adlı serjantın “Niva” maşını ilə Bakıya gətirdilər. Hətta Süleyman yolda mənə Elmar Usubovun daxili işlər nazirinin qohumu olduğunu deyərək, “o, hər şey edə bilər, ona heç kim heç nə etmir” ifadəsini də işlətdi. Bakıda 1 gün Nərimanov Rayon Polis Idarəsinin təcridxanasında saxlandım və 16.07.2015-ci il tarixdə məni “guya 2013-cü ildə aramızdakı münaqişə zamanı öldürmək istəmişəm, bu əməli 2 il sonra həyata keçirmişəm” kimi absurd fərziyyə ilə təqsirləndirərək Cinayət Məcəlləsinin 29, 120.1 və 120.1 maddəsi ilə barəmdə həbs qətimkan tədbiri seçdilər. Ortada mərhumun xüsusi amansızlıqla qətlə yetirilmiş meyiti olduğu halda mənim barəmdə bu cür tövsifin hansı maraqlar doğurduğu yəqin məlumdur. Aslan Ibrahimovun qərəzli mövqeyi və işin başqa müstəntiqə həvalə olunması barədə ərizələrlə müraciət etsəm də, əksinə mənə və ailə üzvlərimə qarşı represiv təzyiqlər davam edir.

“Müstəntiq bir nəsli bir-birinə düşmən edib”

7 aydır ki, 5 azyaşlı övladımla görüşmək və telefon danışığı aparmaq qadağan olunub. Ağır xəstə olan atamın müalicəyə ehtiyacı olduğu halda ölkədən çıxışına qadağa qoyulub. Əməkdar müəllimə olan anam barədə Təhsil Nazirliyinə, DIN-in müstəntiqi olan qardaşım barədə isə xidməti iş yerinə uydurma böhtan xarakterli məktublarla onların işgüzar nüfuzuna və cəmiyyətdəki mövqeyinə zərbə vurub. Aslan Ibrahimov 7 aylıq istintaq müddətində tam fəaliyyətsizlik göstərmiş, əksinə qohumlar arasında düşmənçilik və nifaq salaraq bir nəsli düşmən edib. Müxtəlif orqanlara dəfələrlə bu hallar barədə müraciət etsəm də, ərizələrim elə barəsində şikayət etdiyim Aslan Ibrahimova göndərilib. “Biz gör kimləri tutub içəri qoyuruq, sən kimdən kimə şikayət edirsən?” deyən müstəntiqə etiraz olaraq 26.01.2016-cı il tarixdən yeməkdən imtina etmişəm. Pozulmuş hüquqlarım bərpa olunmasa, Ermənistan istisna olmaqla, hətta ən geridə qalmış Afrika ölkəsi olsa da, bütün ölkələrdən sığınacaq istəyəcəm. “Insan hüquqları” barədə anlayışı olmayan Aslan Ibrahimov kimilər “həbs edim sonra boynuna qoyub sübud edərəm” prinsipi ilə əhali arasında dövlətçilik haqqında mənfi rəy yaradır. Bəlkə insan hüquqlarından danışmayaq və insan olduğumuzu danaraq Heyvanların mühafizəsi ilə bağlı təşkilatlara müraciət edək?!”

Yazıda adı hallanan şəxslərin də mövqeyini dərc etməyə hazırıq.