Samir Əliyev Zakir Qaralova başına gətirilənlərdən yazdı

2015-ci ilin iyulunda qətlə yetirilən Natavan Əliyevanın keçmiş həyat yoldaşı Samir Əliyev ayrıca baş prokuror Zakir Qaralova müraciət edib. Həyat yoldaşı Zəminə Əliyeva həmin müraciətin surətini redaksiyamıza təqdim edib.

Qeyd edək ki, ötən saylarımızda da onun müraciətləri dərc edilib. Samir Əliyev həmin müraciətlərdə olduğu kimi baş prokurora müraciətində də işgəncələrə məruz qaldığını, keçmiş həyat yoldaşının qətlinin onun üzərinə qoyulduğunu iddia edir. Müraciəti təqdim edirik: “BDU-nun hüquq fakultəsinin bütün məzunları kimi mən də sizin rəy verdiyiniz və müəllifi olduğunuz dərsliklərlə ali təhsil almışam. Lakin nə o dərsliklərdə, nə də digər qanunvericilikdə 8 aydır ki, həbsdə olmağımın hüquqi əsasları barədə heç nə yazılmayıb.

AR CPM -maddə 157.1: “Təqsirsizlik prezumpsiyasına müvafiq olaraq şəxsən cinayət qanunu ilə tutulmuş əməlin törədilməsinə adiyyatı yoxdursa və sübutlar yoxdursa, o, həbs oluna və ya zərurət olmadıqda həbsdə saxlanıla bilməz”. Əgər cinayətin törədilməsinə aidiyyatı sübutlar varsa, xüsusi amansızlıqla qətlə yetirilən şəxsin ölümündə 29, 120.1, yəni ölümə cəhddə təqsirləndirilməyim hansı hüquqi ədəbiyyatda yazılıb ki, mən onu oxumamışam? Bu ittihamın yalnız iqtisadı əsasları ola bilər ki, bu da müstəntiq Aslan Ibrahimova məlumdur. 8 aylıq istintaq müddətində bir dəfə də olsun təcridxanaya gəlməyən, əsassız həbslə və repressiv mənəvi təzyiqlərlə mənə və ailəmə işgəncələr verən Aslan Ibrahimov özümə qəsd etdikdən sonra, çoxsaylı tələblərimdən yorulub nəhayət ki, məni dindirmək qərarına gəldi. Mənim və mərhumun şəxsi həyatını araşdırmaqla, dindirməni də məhz bu istiqamətdə quran müstəntiqə şəxsi həyat, ailə sirləri ilə bağlı məsələlərlə əlaqədar AR CPM-nin 199-cu maddəsini xatırlatsam da, mərhumun qətli ilə onun şəxsi həyatının əlaqəsi olması ehtimalını araşdırdığını deyən müstəntiq elə məni də ehtimallarla həbs etdiyini dolayısı ilə sübut etmiş oldu. Aslan Ibrahimov üçün çox maraqlı olan mənim şəxsi həyatım və ailə şəkil və videolarımın bu cinayətlə əlaqəsi olmadığı halda istintaq orqanı üçün hansı əhəmiyyəti olduğunu bilmək maraqlı olardı. Şəxsi həyatımla bağlı şantajedici suallarının cavabı ilə verdiyi ittiham ziddiyyət təşkil edir. O müstəntiqdən hər şey gözləyin. Bu cür saxtakar istintaq aparan orqana Siz rəhbərlik edirsiniz. BDU-nun hüquq fakultəsinin tələbələri isə Sizin dərsliklərinizlə təhsil alaraq minlərlə Samir Əliyevlərin qanunsuz həbsinə səbəb olur, bəlkə də məcbur olurlar. Elə o fakultənin məzunları, Nəsimi rayon Məhkəməsinin hakimləri Elman Isayev və Babək Pənahov gözümün içinə baxaraq mənə bir həmkar kimi “Baş Prokurorluğun təqdimatından sonra biz kimik ki?” deyə bilirlərsə, deməli mən Sizin dərslikləri düzgün oxumamışam”.