Fazil Mustafa: “İran Azərbaycan torpaqlarını işğal edən dövlətə əsas dəstək verən xarici siyasət yeridir”

Elxan Şahinoğlu: “İran iqtisadi məntiqdən çıxış edərək, Azərbaycanla əməkdaşlığa üstünlük verəcək”.

Dünən Azərbaycan Respublikasının prezidenti İlham Əliyev İrana rəsmi səfər edib. Səfər çərçivəsində iki ölkə arasında iqtisadi-ticari, energetik, humanitar- mədəni, tibb sahələrini əhatə edən 11 sənədin imzalanması mərasimi baş tutub. Həmçinin hər iki ölkə prezidenti mətbuata iki ölkə arasında inkişaf edən münasibətlər çərçivəsində dostluq mesajları veriblər.

Türkiyə-Rusiya-İran üçbucağındakı gərgin münasibətlər fonunda Azərbaycan prezident İlham Əliyevin İran səfərini politoloq Elxan Şahinoğlu və Böyük Birlik Partiyasının sədri, millət vəkili Fazil Mustafa ilə müzakirə edilib.



Elxan Şahinoğlu: “Suriya məsələsi ilə bağlı ABŞ-la Rusiya arasında atəşkəs müqaviləsinin razılaşması İlham Əliyevin işinə yaradı”

Prezidentin İran səfəri ilə bağlı fikirlərini bölüşən politoloq Elxan Şahinoğluna görə, İran Azərbaycanla iqtisadi əlaqələrini genişləndirməyə çalışır:

“Prezident İlham Əliyevin İran səfərində əsas iqtisadi mövzular müzakirə olundu. Lakin buna baxmayaraq, siyasi mövzular da gündəmdədir. Düşünürəm ki, Suriya məsələsi ilə bağlı ABŞ-la Rusiya arasında atəşkəs müqaviləsinin razılaşması İlham Əliyevin işinə yaradı. Çünki prezident İran səfəri zamanı da Azərbaycanın Suriyada sülh və sabitliyin hökm sürməsini istədiyini vurğuladı. İran səfərində mövzular tamam başqa idi. Əsas məsələ odur ki, İran Azərbaycanla iqtisadi əlaqələrini genişləndirməyə çalışır. İran öz qazını hansısa yolla Avropaya çatdırmaq istəyir, ortaq dəmiryol tikintisi reallaşır. Iran iqtisadi məntiqdən çıxış edərək, bu məsələdə Azərbaycanla əməkdaşlığa üstünlük verəcək”.



Fazil Mustafa: “İran Ermənistana dəstək verməyi dayandırdıqdan sonra Azərbaycanla daha yaxın münasibətlər qura bilər”.

İranın Ermənistana dəstək verən əsas ölkələrdən biri olduğunu vurğulayan millət vəkili Fazil Mustafa bildirir ki, prezidentin bu səfərindən faydalı nəticələr gözləməyə dəyər:

“Azərbaycanın qonşu dövlət kimi İranla münasibətlərinin qurulması və iqtisadi əlaqələrin davam etməsi hər iki ölkə üçün yararlıdır. İran bir sıra müstəvilərdə Azərbaycanla tərs xarici siyasət anlayışına malik olan ölkədir. Xüsusilə də, bölgədə Azərbaycana düşmən olan ölkələrin dəstəklənməsində rol alan bir ölkədir. İranın bu siyasətində hələki dəyişiklik baş vermədiyinə görə, hər iki dövlətin münasibətlərinin səmimi dostluq münasibətinə çevirilməsi gözlənilmir. İran Ermənistana dəstək verməyi dayandırdıqdan sonra Azərbaycanla daha yaxın münasibətlər qura bilər. Çünki Azərbaycanın hansısa bir problemi yoxdur. Əksinə İranın Azərbaycanla bağlı problemi var. İran Azərbaycan torpaqlarını işğal edən dövlətə əsas dəstək verən xarici siyasət yeridir. Ümid edirəm ki, prezidentin bu səfəri faydalı olacaq. Səfərdə səslənən mesajlar, imzalanan müqavilələr hər iki dövlətin xoş niyyətindən xəbər verir. Biz çalışmalıyıq ki, İranla münasibətlərdə hansısa narahatlıq yaşanmasın”.

Gülşən ŞƏRİF