Qobustan icra başçısının dövlət vəsaitlərini qeyri-şəffaf xərcləməsi Hesablama Palatası tərəfindən rəsmi şəkildə təsdiqini tapdı.

İcra başçısı Adil Məmədov ifşa olundu.
Prezidentin konfransda rayon icra hakimiyyətlərinin bu günə kimi dotasiya ilə özünü saxladığını deməsi və bundan sonra öz daxili imkanları hesabına ayaqda dayanmalı olacağını söyləməsi göstərir ki, Qobustanın timsalında korrupsiyanın tüğyan edən bir çox regionlara daha dövlət büdcəsindən vəsait ayrılacağı gözlənilmir.
VİZUAL.az-ın xəbərinə görə, Adil Məmmədov Masallıda qeydiyyatdan keçmiş "Adil” MMC vasitəsi ilə Qobustandakı bütün dövlət qurum və müəssisələrinə, eləcə də bələdiyyə orqanlarına avadanlıq və ləvazimatların alınması üçün ayrılan dövlət vəsaitlərinin mənimsənilməsi həyata keçirilir.
Bu məqsədlə ayrılan vəsaitlər "Adil” MMC-nin bank hesabına köçürülür. Sonra isə həmin pullar nağdlaşdırılaraq, hesabdan çıxarılır. Bu zaman vəsaitlərin cəmi 70%-i tələb olunan inventarların alınmasına sərf olunur.
Qobustan RİH-nin rəhbərliyi tərəfindən törədildiyi iddia olunan maxinasiyalardan ikincisi Mehdi Hüseynzadə adına sovxozun ərazisi ilə bağlıdır. Mənbə bildirir ki, sovxozun balansında kənd təsərrüfatı ilə məşğul olmaq üçün yararlı olan 800 hektar ərazi var.
Lakin başçı Adil Məmmədov və sovxozun direktoru Zümrüd Şərifova öz aralarında razılığa gələrək həmin ərazini qeydiyyata alarkən, onun sahəsini cəmi 500 hektar göstəriblər. Qalan 300 hektar isə, Kənd Təsərrüfatı Nazirliyindən "gizlədilərək”, bu iki məmurun şəxsi mənafeyləri üçün istifadə olunmaqdadır.
Adil Məmmədovun maxinasiyalarından üçüncüsü kimi də "Polad-İnşaat” şirkətinin rayondakı fəaliyyəti ilə bağlı qanun pozuntuları diqqət mərkəzinə gətirilir. Türkiyəli iş adamı Polad Cəmilin rəhbərlik etdiyi bu şirkət hazırda Qobustan ərazisində yol çəkilişi işlərilə məşğuldur.
Bu məqsədlə də hazırda şirkət rayonun dörd müxtəlif ərazisindən: Cəngi, Ceyrankeçməz, Diri Baba türbəsinin arxası və Pirsaat çayının üzərindəki çınqıl karxanasından torpaq daşınması həyata keçirir.
Məlumdur ki, bu torpaq daşınmaları yerli bələdiyyələrlə müqavilələr bağlanmaqla, Ekologiya və Təbii Sərvətlər Nazirliyinin və Fövqəladə Hallar Nazirliyinin müvafiq rəyləri əsasında həyata keçirilməlidir.
Hər maşının tutumu isə 60-70 kub.metrdir. Beləliklə, gün ərzində daşınan torpağın ümumi qiyməti təxminən 8-10 min manat civarında olsa da, indiyədək yerli bələdiyyələrdən yalnız birinin hesabına, həm də cəmi 1 min manat pul ödənilib.
İddia olunur ki, "Polad-İnşaat” şirkətinin həyata keçirdiyi torpaq daşımalarına görə ödənilən pullar da məhz başçı tərəfindən mənimsənilir.
Qeyd edək ki, Hesablama Palatasının iclasında nəzarət tədbirinin nəticələri üzrə Kollegiya Qərarının layihəsi də müzakirə edilmiş və səsə qoyularaq qəbul edilib.
Müəyyən edilmiş nöqsanların aradan qaldırılması məqsədilə qərarın surəti RİH-ə göndərilib, auditin nəticələri üzrə Milli Məclisinə məlumat təqdim olunub.
Hesablama Palatasının növbəti kollegiya iclası keçirilib.
APA-nın verdiyi xəbərə görə, Hesablama Palatasının sədri Vüqar Gülməmmədovun sədrliyi ilə keçirilmiş iclasda dövlət büdcəsinin "Mənzil və kommunal təsərrüfatı” bölməsindən, dövlət büdcəsinin dövlət əsaslı vəsait qoyuluşundan və ehtiyat fondlarından Qobustan Rayon İcra Hakimiyyətinə (RİH) ayrılan vəsaitlərin istifadəsi ilə bağlı həyata keçirilmiş nəzarət tədbirinin nəticələri müzakirə edilib İclasda yoxlama qrupunun məlumatı və fəaliyyət istiqaməti üzrə məsul auditorun təqdim etdiyi hesabat dinlənilib.
Auditor RİH tərəfindən dövlət əsaslı vəsait qoyuluşundan və ehtiyat fondlarından ayrılan vəsaitlərin istifadəsi zamanı xüsusi razılığa (lisenziyaya) malik olmayan podratçı təşkilatla satınalma müqaviləsi bağlanıldığını, bitum və yanacaq-sürtgü materiallarının qiymətlərinin artması ilə əlaqədar inşaat prosesində müqavilə məbləğinin müvafiq prosedur qaydalara riayət edilmədən artırıldığını, istismara qəbul edilən bir neçə obyektin müvafiq qaydada uçota alınmadığını və əsaslı vəsait qoyuluşu üzrə kreditor borcların balansda əks etdirilmədiyini diqqətə çatdırıb.
Qobustan şəhər İnzibati Ərazi Dairəsi üzrə Nümayəndəliyi tərəfindən Qobustan şəhərinin küçələrinin işıqlandırılması üçün ayrılmış vəsaitin bəzi hallarda təyinatının dəyişdirildiyini bildirən auditor RİH tərəfindən malların (işlərin və xidmətlərin) satın alınması zamanı müvafiq qanunvericiliyin tələblərinə bir sıra hallarda riayət edilmədiyini, həmçinin məbləğ məhdudiyyətini aradan qaldırmaq məqsədilə vəsaitin ayrı-ayrı müqavilələrə bölünərək satınalma metodu dəyişdirilməklə icra olunduğunu, həmçinin yolların əsaslı təmiri üzrə tenderə təqdim edilmiş qiymət cədvəlindəki iş vahidlərinin qiymətindən fərqli qiymətlər tətbiq edildiyini, yolların əsaslı təmiri işləri üzrə tərtib edilən qəbul aktlarında işlərin həyata keçirildiyi ünvanların tam göstərilmədiyini deyib.
Eyni zamanda, mal-material qiymətlilərinin uçota alınması, yanacaq və ehtiyat hissələrinin silinməsi prosesində nöqsanlara yol verildiyi, bəzi hallarda fiziki şəxsə ödənilən icarə haqqından ödəmə mənbəyindən vergi tutulmadığı, RİH və tabeliyindəki qurumlar tərəfindən maliyyə hesabatlarının qüvvədə olan müvafiq təlimatlara uyğun aparılmadığı qeyd edilib.
Auditor RİH-in müəyyən olunmuş nöqsanların bir hissəsinin audit zamanı aradan qaldırdığını bildirərək podratçı təşkilatlarla satınalma müqavilələrinin bağlanılması və büdcə vəsaiti hesabına malların (iş və xidmətlərin) satın alınması zamanı bu sahəni tənzimləyən normativ hüquqi aktların tələblərinə tam riayət olunmasına, başa çatmış obyektlərin vaxtında istismara qəbul edilərək müvafiq balans hesablarında düzgün uçota alınmasına nəzarətin gücləndirilməsini zəruri hesab edib.
Eyni zamanda büdcə vəsaitlərin təyinatının dəyişdirilməsinin normativ hüquqi aktların tələblərinə uyğun həyata keçirilməsi, mühasibat uçotunun təşkili və aparılması ilə bağlı fəaliyyətin gücləndirilməsi məqsədəmüvafiq hesab olunub.