İcra başçısının əməllərinə görə cavab vermək vaxtı çatıb

İmişli rayon icra hakimiyyətinin başçısı Vilyam Hacıyevlə rayonun abadlaşdırılması, təmir-tikinti prosesində iştirak edən iş adamları ilə bir müddət əvvəl yaranan qalmaqal yenidən qızışıb. Bir müddət öncə iş adamları ilə icra başçısının razılığa gəlindiyi bildirilsə də, indi bəlli olur ki, V.Hacıyev hələ də həmin şəxslərlə arasında olan pul problemini həll etməyib.

Bu barədə məlumat verən «Omis» MTK-nın rəhbəri Osman İsayev V.Hacıyevin görülən iş üçün razılaşdıqları pulu vermədiyini bildirib. Onun sözlərinə görə, rəhbəri olduğu «Omis» MTK tərəfindən İmişli şəhərinin girəcəyi, hasarın, yolun çəkilməsi, yolkənarı obyektlərin aqlay işlərini görüblər, amma bu günə kimi veriləcək 40 min manatı ala bilməyiblər: «Mənimlə bərabər, 13 iş adamı ilə Vilyam Hacıyev arasında problem yaranıb. Yəni, hər şirkət bir işi görüb, amma söz verilən pulu ala bilməmişik, daha doğrusu, icra başçısı pulu verməkdən imtina edir. Elə iş adamı var ki, Vilyam Hacıyevin ona 250 min, 100 min manat borcu var. Ən kiçik məbləğ bizimkidir - 40 min manat. Ümumilikdə isə 700 min manatdan söhbət gedir ki, Vilyam Hacıyev onu verməkdən imtina edir. Pərviz Zahirova 130 min manat, Nadir Feyziyevlə Cahangir müəllimə bir yerdə 370 min manat, Cavanşir müəllimə 80 min manat, Vaqif Məmmədova 100 min manat borcu var. İşi görüb, qurtarandan sonra hamı pulunu istəyəndə, dedi ki, verəcəm, bir qədər keçəndən sonra isə bildirdi ki, ümumiyyətlə, sizə verəcəyim yoxdur. Bu cavabı eşidəndən sonra etiraz elədik ki, gördüyümüz işləri sökürük. Vilyam Hacıyev buna ehtiyac olmadığını, məsələni həll edəcəyini bildirdi. Amma sonradan Mütəşəkkil Cinayətkarlığa Qarşı Mübarizə İdarəsinə şikayət elədi ki, guya biz hansısa qanunsuz iş görürük. İcra başçısından narazı qalan iş adamları Mütəşəkkil Cinayətkarlığa Qarşı Mübarizə İdarəsində sorğu-sual edildi və nəticədə Vilyam Hacıyevin təqsirli olduğu, bizim pulumuzu vermədiyi ortaya çıxdı».
O. İsayevin sözlərinə görə, təxminən bir ay, ay yarım bundan əvvəl Mütəşəkkil Cinayətkarlığa Qarşı Mübarizə İdarəsində Vilyam Hacıyev onlara söz verib ki, həftənin birinci günü pullarını verəcək. Ancaq o vaxtdan bəri yenə də pulu verməkdən imtina edir: «Biz işin görülməsi ilə bağlı müqavilə bağlamaq istəyəndə dedi ki, kişinin sözü elə müqavilədir. Bir də ki, bu günə kimi bir neçə dəfə iş görmüşük, pulumuz verilib. Yəni, arada bir etibar olub, amma sonda bu etibardan sui-istifadə edilib. Dəfələrlə zəng edirik, amma heç kimin telefonuna cavab vermir. Bundan əlavə, Samux rayonundakı beton zavodunun müdirinin 400 min manatı, həmçinin, bir də üç nəfər iş adamı var ki, onların da müəyyən məbləğdə pulları verilmir. Nadir müəllimlə Üzeyir müəllim dünən Vilyam Hacıyevin qəbulunda olublar. İcra başçısı onlara deyib ki, «mənim dədəmin evində işləməmisiz, Prezident üçün işləmisiz, o da bu işlər üçün 2 milyon pul ayırıb, onun da bir milyonu geri qayıdıb. Ona görə də gedin, pulunuzu Prezidentdən alın»,-deyib».
Hüquq-mühafizə orqanlarına şikayət edib-etməyəcəklərinə gəlincə, O.İsayev deyib ki, müsbət nəticə olacağına inanmadıqları üçün belə bir təşəbbüs qaldırmaqda maraqlı deyillər: «Mütəşəkkil Cinayətkarlığa Qarşı Mübarizə İdarəsində Vilyam Hacıyev borcunu qaytaracağına söz versə də, bir neçə gündən sonra vədinə xilaf çıxdı. O boyda idarədən sonra harasa şikayət etməyin mənası yoxdur. Məsələylə bağlı Vilyam Hacıyevi Prezident Administrasiyasına da çağırıblar, problemi həll etməyi tapşırıblar, amma nəticə yoxdur»

Tahir