Baş redaktor şantaj və təhdidlə üz-üzə

gundemxeber.az “Azadlıq” qəzetinin baş redaktoru Qənimət Zahid təhdid edilir. Bu barədə baş redaktor həm rəhbəri olduğu qəzetdə, həm də sosial şəbəkədəki statusunda bilgi verib. Onun sözlərinə görə, təhdid və hədələr təbii olaraq onun peşə fəaliyyəti ilə bağlıdır.
Q. Zahid onu təhdid edənlərə mesaj da ünvanlayıb: “Məni şantaj etmək və ya hədələmək istəyən bütün şəxslərin və dövlət qurumlarının nəzərinə çatdırıram: bu taktikanız arsenalınızda olan çirkin texnologiyalardan yararlanmaqla insanları necə sındırdığınızın daha bir sübutudur. Mənə qarşı bütün təhdid hərəkətlərinizlə bu əməliyyatların məhz sizə məxsus olduğunu bir daha altından xətt çəkməklə təsdiq edirsiniz. Məni hədələməklə ram edə biləcəyinizi ağlınızdan belə keçirməyin. Təsir əks-təsirə bərabərdir. Əgər çevrənizdə və başınızın üstündəki insanların sizin üçün dəyəri varsa, bu təhdid faktorundan vaz keçməyinizi məsləhət görürəm”.
Q.Zahid “Yeni Müsavat”a açıqlamasında bu təhdidin detallarına toxunub. Öncə bildirib ki, ona qarşı bu əməliyyatda iştirak edənlərdən kimlərinsə adını açıqlamaq istəmir: “Məsələn, dünyaya isinişə bilməmiş bir gənci mənim arxamca salıb hansısa murdar proyektləri icra etmək istəyirlərsə, mən bu gənci niyə ifşa edim ki?! Mənim işim bu gəncə həyatı başa salmaqdır. Axı onun gələcəyi var. Görürsünüzmü, Naxçıvandan qaçan İbrahim Musayevi? O da gəncdir, cəmi 22 yaşı var. Bizim cəmiyyət bu cür gəncləri o dəhşətlərin içindən qoparmağı, onları reabilitasiya etməyi bacarmalıdır. Mən kimisə ifşa etmək istəmirəm, yazığım gəlir. Amma mətbuatda və sosial şəbəkələrdə verdiyim açıqlamaların ünvanına yetişdiyinə şübhə etmirəm. Mən təqiblərə, təzyiqlərə vərdiş etmiş adamam. Gənc deyiləm, yaşım 50-ni haqlayıb. Buna görə də çılğınlıq etmək, hay-küy salmaq, üçüncü-dördüncü dərəcəli faktorlarla mübarizə aparmaq mənim işim deyil. Mən bu açıqlamanı ona görə verirəm ki, yaramaz və sarsaq texnologiyaları sevən o murdar mərkəzlər özlərini yığışdırsınlar”.
Q.Zahid onu da deyib ki, Azərbaycanda əlahiddə götürülmüş hər hansı dövlət orqanından şübhələnmir: “Ona görə ki, Azərbaycanda bəlli-başlı funksiyalar üzrə müəyyənləşmiş fəaliyyət prinsipləri olan heç bir dövlət orqanı yoxdur. Siyasi hakimiyyətin mövcud olmadığı, dövlət mənafelərinin beş-altı adamın mənafelərinə fəda edildiyi bir ölkədə hansı dövlət orqanı haqqında nəsə demək olar ki?! Burada Kənd Təsərrüfatı Nazirliyinin əməkdaşını da rahatlıqla terrora cəlb edə bilərlər”.
Baş redaktordan konkret hansı yazısından və ya açıqlamasından sonra bu mərkəzlərin hədəfinə gəlməsini də soruşulub. O, suala sualla cavab verib: “Sizcə, mənim fəaliyyətim diktatura qurmaq istəyən bir rejim üçün arzuolunmaz deyilmi?”
“Azadlıq”ın baş redaktoru bu açıqlamasının Fransada siyasi mühacir statusu almasına təkan verəcəyi şübhələrinə də aydınlıq gətirdi. Dedi ki, onun Fransada siyasi mühacir statusu almaq kimi bir problemi yoxdur: “Ailəm orada siyasi mühacir statusu alıb və orada da yaşayır. Mənim fəaliyyətimə görə təqib edilən ailə üzvlərimə status verilirsə, mənə əlavə hansısa arqumentlər yaratmaq lazım deyil. Və nəhayət, mənə siyasi mühacir kimi Fransada qalmaq təklif edilib, amma bundan imtina etmişəm. Hesab edirəm ki, indi siyasi mühacir kimi rahat həyat axtarmaq yox, Azərbaycan avtoritarizminə qarşı ən müxtəlif layihələr üzərində düşünmək lazımdır. Baxmayaraq ki, həyat yoldaşım və uşaqlarım siyasi mühacir statusu alıblar, bu yaxınlarda onlar da çox maraqlı layihələr üzərində fəaliyyətə başlayacaqlar”.

Elçin