Bir neçə gün bundan əvvəl, Ədliyyə Nazirliyi, Penitensiar Xidməti İdarəsinin 6 saylı cəzaçəkmə müəssisəsində cəza çəkən, Azərbaycan Respublikası Cinayət Məcəlləsinin 221.2.1, 221.2.2, 221.2.3, 127.2.3, 178.2.3, 320.1, 320.2-ci maddələri ilə ittiham olunan və Cinayət Məcəlləsinin 66.3-cü maddəsi tətbiq olunmaqla, Bakı Ağır Cinayətlər Məhkəməsinin qərarı ilə 9 il müddətinə azadlıqdan məhrum edilmiş Məmmədov İlqar Məlik oğlunun, media nümayəndələrinə ünvanladığı müraciəti yayılmışdır. O, yazmış olduğu müraciətində bildirir ki, “mənim həbsimin sifarişçisi millət vəkili, Ana Vətən Partiyasının sədri Fəzail Ağamalı oldu. Çünki, 2005-ci və 2010-cu illərdə Salyan-Neftçala seçki dairəsindən namizədliyimi irəli sürüb, onunla tərəf müqabili də oldum. Belə bir addım atdığım üçün o, həmin illərdən mənimlə düşmənçilik etməyə başladı və son anda da məni həbs etdirdi. Keçirilən məhkəmə prosesinə sədrlik edən hakim Həsən Əliyev, məni 100 dəfə məhkəmə prosesinə çıxartsa da, o, mənimlə bağlı heç bir qərar çıxara bilmirdi. Çünki, günahsız olduğumu daim isbat edə bilirdim.

Mən BDU-nin hüquq və jurnalistika fakültəsini bitirib ali təhsil aldığımdan, kifayət qədər hüquqlarımın müdafiəsi ilə də məşğul olurdum. Elə ki, keçirilən məhkəmə proseslərinə hakim Zeynal Ağayev sədrlik etdi, o, ilk gündən mənimlə qərəzli davranıb, barəmdə 9 il müddətinə azadlıqdan məhrumetmə cəzasının verilməsi haqda məhkəmə hökmünü elan etdi.

Onu da qeyd edim ki, vaxtilə mənimlə bağlı keçirilən məhkəmə proseslərinə sədrlik edən Həsən Əliyev, hal-hazırda bəzi səbəblər üzündən məhbəs həyatı yaşamaqdadır. Mənim həbs olunmağımın heç bir əsası yoxdur, sadəcə olaraq Fəzail Ağamalının qurduğu oyunun qurbanı olmuşam. Qoy hər kəs bilsin ki, o, müstəntiq və hakimlərə “haqq-hesab” verərək məni həbs etdirdi. İstər Fəzail Ağamalı, istərsə də onun kimi əqidə sahibi olan millət vəkilləri bilməlidir ki, haqq-ədalət həmişə qalib gəlib, yəqin ki, mənimlə bağlı problemdə də qalib gələcək”.

Sözsüz ki, səslənən ittihamlar 22 noyabr 2012-ci il tarixdən həbs olunan İlqar Məmmədova məxsus açıqlamalardır. Odur ki, belə bir ittihamları səsləndirən qarşı tərəfin nə dərcədə düzgün danışması haqda hələlik bir söz deyə bilmərik. Deyəcəyimiz söz yalnız o olacaq ki, Allah-Təala hər bir məhbusun, o cümlədən İlqar Məmmədovun da qapısını açsın ki, o da digərləri kimi azad cəmiyyətdə azadlığına qovuşa bilsin.

Problemin varlığını diqqətdə saxlayacağıq.