İsgəndər Həmidova 65 yaşın zirvəsindən böyük qələbə müjdəsi ilə…

Həmidov İsgəndər Məcid oğlu 10 aprel 1948-ci ildə Azərbaycan Respublikasının Kəlbəcər rayonunda anadan olub. 1988-ci ildə başlanan milli azadlıq hərəkatının liderlik edənlərdən biri olub. İsgəndər Həmidov 1992-ci il 16 may tarixindən 16 aprel 1993-cü il tarixə qədər Daxili İşlər Naziri vəzifəsində çalışıb. 1992-ci ilin avqust-oktyabr aylarında 701 nəfər məhbusu həbsdən azad etmək, "İstiqlal" qəzetinin redaktorunu və əməkdaşını döymək, 400 min ABŞ dollarını mənimsəmək və israf etmək kimi saxta ittihamlarla 14 il müddətinə azadlıqdan məhrum edilib. 2003-cü ilin dekabrında azadlığa çıxıb. Bu gün İsgəndər bəyin 65 yaşı tamam olur.
Rəsmi tərcümeyi halı bir yana qoyub onun haqda öz sözümüzü danışaq. Çünki öncə SÖZ yarandı... Yaradanın bir «ol» sözündən yarandı hər şey, yaradılanlar özləri yaratmaq eşqinə düşdülər.. Sonra beynin çevrədən dərk etdiyi nəyəsə ad verdi İnsan və özü Söz yaratdı. Sanki yaratdığının sehrinə düşdü, gözəlliyinə, gücünə vuruldu insan. Bu vurğunluq sehrində yaşaya-yaşaya yaratdı, yarada-yarada yaşatdı.
Yaradılmışın sayı yaradanın sayını keçdi. Yaradıldıqca, çoxaldıqca adiləşdi insan üçün söz. Zihaf gecəsi gərdək əvəzinə əyyaşlar məclisinə atılmış bakirə qız kimi təkrar-təkrar çeynəndi, bütün gözəlliyini itirdi söz. Sevərək də öldürmək olurmuş. İnsan sözü sevə-sevə, bu sevgi təsirindən yarada-yarada öldürdü. Amma bu çox sonralar oldu (bəlkə də «sözün su qiyməti» aldığı zamanımızda). Öncə yaranan söz isə Tanrı nəfəsi qədər pak, müqəddəsdir. O ilkin sözlərhansısa gözəgörünməz qüvvəylə sonadək bakirəliyini saxladılar. Əyyaşlıq bu gözəlliyə toxunmaq gücündə deyildi... İlk öncə söz yarandı, Tanrı sözü. Sonra yer, göy, insan, torpaq...
...Və tarixin hansısa uzaq bir anında, sözün Tanrı pıçıltısının paklığına qovuşduğu zamanda kiminsə dilindən bir söz çıxdı: TÜRK! Kimə, nəyə deyildi bu söz? İlk dəfə hansı formada, hansı anlamda işləndi görəsən? Min illər sonra yerlə göylə əlləşən, səmanın gözəgörünməzliyinə belə nüfuz edən alimlər baş sındırdılar bu sözün ilkin forması, anlamı üzərində. Amma çifayda. Türk sözü kimsəyə öz sirrini açmadı. Sanki Tanrı dili ilə, Tanrı dərgahında söylənmişdi bu söz...
...Və Tanrıdan gələn başqa bir söz: SAVAŞın sizinlə, savaşanlara qarşı savaşın! Tanrı öz elçilərindən birinə «İsa mənim sözümdür»-deyə tərif verib. Əslində bütün elçilər Tanrı sözünün bəşərə çatdırıcısıdır. Amma bu elçilərin hamısı da bəşərin baqısına məruz qaldı. Sözünün, elçisinin qorunmadığı bir zamanda verdi Tanrı bu əmri: Savaşın...
... Qısa, qəzəb dolu, sensasiyalı siyasi xəbərlərə alışmış oxucunu bəlkə də yorduq. Amma bu girişimiz elə yazacağımız ünvanın təyinatı üçündür. Savaşdan və Türkdən yazacayıq. SAVAŞAN TÜRKdən.
Əslində bu bir savaşdır, səngərlər qazılmasa da, əlimizdə silah olmasa da itkimiz-ölənimiz, döyülənimiz, tutularaq əsir alınanımız var. Ortada iki ordunun savaşı gedir. GENERAL bir çoxları üçün sadəcə bir rütbə sayıla bilər, amma illərdir zülmə və şərə qarşı apardığımız savaşın önündə olan isimlərdən biri olan İSGƏNDƏR HƏMİDOV bu rütbəni həmdə savaşımızın önündə olması ilə təsdiqlədi. TÜRK GENERALI obrazı ilı. İllərdir millətinin və dövlətinin adına haqq bildiyi bütün mövqelərin ən sərt məqamında onu gördük. Keçilən yolda həbs də oldu, təqib də, işgəncə də, təhqir də...Qara vicdanlarını qara əməllə ortaya qoyanlar BOZ QURDun qəfəsə sığmadığının fərqinə varmadılar. İsgəndər bəy məhbəsdə belə dünyanı dar etdi bu insanlara.
Milyonlarla kapitala, minlərlə boynuyoğunlara, zor və işgəncə aparatına, daha nələrə, nələrə sahib olanlar daş divarlar arasındakı bir söz adamının qələmi qarşısında aciz qaldılar.
Ötən illər ərzində nələr yaşamadıq ki, 93-cü ilin ağır günlərindən bu yana harda Azərbaycan, Demokratiya, Vətəndaş söhbəti oldusa o söhbətlərin başında İsgəndər bəy də oldu...
Nə zaman rejim azadlığa, millətə qarşı durdusa, cismi və əqidəsi ilə dəyənəyə və zorakılığa qarşı İsgəndər bəyi gördük... Ölümü, şəri, həbsi göz önünə alıb çıxdı bu yola. «Çeynənən bir millətin haq bağıran səsi» kimi hər kəsi susdurdu. Bu mübarizəni həm də savaş kimi gördüyümüzdən general rütbəsində görmüşük onu. İndi TÜRK GENERALIna qarşı şər rejimin oliqarxları və generalları dayanıb. QƏLƏBƏ sözünə, özünə və millətinə xəyanət etməyənindir. SAVAŞINDA SÖZ QƏLƏBƏN QUTLU OLSUN, TÜRK GENERALI!!!.. 65 yaşın zirvəsindən böyük qələbə müjdəsi ilə…

“Gündəm xəbər”