Zərərçəkmiş: “Allahverdi yanımda Etibar Mirzəyevlə telefonla danışdı”

Dələduzluqda ittiham olunan Goranboy rayon sakini, 1955-ci il təvəllüdlü Allahverdi Hüseynovun cinayət işi üzrə məhkəmə prosesi başa çatıb.

İttihama görə, Allahverdi Hüseynov uzaq qohumu Ülfətin oğlu Faiqi Fövqəladə Hallar Nazirliyinin Aran Regional mərkəzinə zabit vəzifəsinə işə qəbul edilməsinə köməklik edəcəyini yalandan vəd edib.

Allahverdi Hüsseynov onun etibardan sui-istifadə edib aldatmaqla 26 iyul 2014-cü ildə Nəsimi rayonu A.Mustafayev küçəsi 1-D saylı binanın qarşısındakı körpünün altında Ülfətdən 7000 manatı alaraq ələ keçirib. Allahverdi, vəd etdiyi köməkliyi yerinə yetirmədən zərərçəkmiş şəxsə xeyli miqdarda ziyan vurmaqla dələduzluq edib.

Allahverdi Hüseynov Cinayət Məcəlləsinin 178.2.4-cü (xeyli ziyan vurmaqla dələduzluq etmək) maddəsi ilə ittiham edilib. Onun barəsində olan cinayət işi Nəsimi Rayon Məhkəməsində araşdırılıb.

Məhkəmədə təqsirləndirilən şəxs qismində ifadə verən Allahverdi Hüseynov bildirib ki, 2014-cü ildə Goranboy rayonunda olarkən yeznəsi Ramizdən iki ay müddətinə 7.000 manat borc pul istəyib: “Ramizdə həmin pulu Ülfətin oğlu Faiqlə göndərəcəyini bildirdi. Həmin ilin sentyabr ayında Faiq mənə zəng etdi və Ramizin verdiyi 7000 manatı mənə çatdırmalı olduğunu söylədi. Biz Nəsimi rayonu 3-cü mikrorayon dairəsindəki körpünün altında görüşdük və Faiqdən həmin pulu aldım. Bir müddətdən sonra Ramizin mənə borc kimi verdiyi 7000 manatı qudası Ülfətdən aldığını öyrəndim”.

“Borcumu qaytara bilmədim”

Təqsirləndirilən şəxsin sözlərinə görə, iki ay ərzində pulu qaytara bilməyib: “Ramizdən aldığım borcu Ülfətə verə bilmədim. Bundan sonra Ülfət birbaşa mənimlə əlaqə saxladı və pulunu geri istədi. Maddi vəziyyətimin ağır olduğunu deyərək imkanım olan kimi pulu

qaytaracağıma söz verdim. Lakin borcumu qaytara bilmədiyimdən Ülfət barəmdə polisə şikayət etdi. İbtidai istintaq dövründə borcumdan 1000 manatı zərərçəkmişə qaytarmışam. Bunu nəzərə alaraq barəmdə bəraət hökmü çıxarılmasını xahiş edirəm”.

Zərərçəkmiş şəxs qismində ifadə verən Ülfət bildirib ki, oğlu Faiq uzun müddət işsiz qalıb, tanışları olmadığından heç bir yerə işə düzəldə bilməyib: “Oğlumun həyat yoldaşının dayısı Allahverdi Hüseynovu tanımışaç və münasibətlərim yaxşı olub”.

“Telefonda generalla danışdı”

Zərərçəkmişin sözlərinə görə, 2014-cü ilin iyun ayında Faiq Allahverdi Hüseynovun 15000 manat müqabilində Fövqəladə Hallar Nazirliyində zabit vəzifəsinə işə qəbul etdirməkdə köməklik edə biləcəyini ona deyib: “Bu səbəbdən Allahverdi ilə görüşdüm. Görüş zamanı Allahverdi oğlumin söylədiklərini təsdiq edərək həmin nazirlikdə yüksək rütbəli tanışlarının olduğunu və 15000 manat müqabilində bu şəxslər vasitəsilə oğlumu işə düzəldə biləcəyini bildidi. Allahverdi mənim yanımda nazirlikdə general rütbəsində olan Etibar Mirzəyev adlı şəxslə telefonla danışdı. Qohumum olduğundan Allahverdiyə tam inandım və onunla razılaşdım”.

Zərərçəkmiş əlavə edib ki, bir neçə gündən sonra Allahverdi onunla əlaqə saxlayaraq oğluna məxsus bəzi sənədlərin surətini alıb, daha sonra isə onunla görüşərək pul məsələsini müzakirə edib: “Görüş vaxtı Allahverdi əvvəlcədən məndən tam şəkildə 15000 manat istədi. İmkanım olmadığını deyərək ilkin olaraq 7000 manat, oğlumun işə düzəlməsi barədə əmr verildikdən sonra isə qalan pulu verə biləcəyimi bildirdim. Allahverdi bununla razılaşdı”.

Ülfət bildirib ki, bir neçə gündən sonra Allahverdi ona zəng edərək oğlunun işini həll etmək üçün Bakı şəhərinə gəldiyini deyib və pulu istəyib: “Bankdan oğlumun adına kredit götürərək 26 iyul 2014-cü il tarixdə 7000 manatı Allahverdiyə çatdırmaq üçün oğlum Faiqə verdim. Oğlum həmin günü gecə saat 04 radələrində rayondan çıxdı və saat 10-

11 radələrində mənə zəng edərək 3-cü mikrorayon dairəsindəki körpünün altında pulu Allahverdiyə verdiyini bildirdi”.

“Generalın 8 min manatı da qabaqcadan istədiyini bildirdi”

Zərərçəkmişin sözlərinə görə, bundan sonra Allahverdi zəng edərək pulu Faiqdən aldığını deyib: “Üç aydan çox keçməsinə baxmayaraq oğlumun iş məsələsinin hələ alınmadığını gördüm və Allahverdi ilə əlaqə saxladım. Allahverdi işi həll edən generalın qalan 8000 manatı da qabaqcadan istədiyini bildirdi. Allahverdiyə əvvəldən razışlaşdığımız şərti xatırlatdım və əmr çıxmayanadək qalan pulu verməyəcəyimi yenidən bildirdım. Həmin gündən etibarən Allahverdi hər dəfə müxtəlif bəhanlərlə işin həll edilməsi üçün vaxt istədi, sonradan isə ümumiyyətlə zənglərə cavab vermədi. Buna görə də polisə müraciət etdim. Bundan sonra Allahverdi hər şeyi boynuna aldı, yazılı iltizam verərək pulu 20 mart 2015-ci il tarixədək qaytaracağına söz verdi. Bununlda belə Allahverdi dəymiş ziyandan yalnız 1000 manat qaytardı, qalan borcumu isə ödəmədi. Buna görə də ondan şikayətçiyəm”.

Məhkəmənin hökmü ilə Allahverdi Hüseynov apelyasiya şikayəti verib. O, şikayətində göstərib ki, məhkəmə cəza təyin edərkən, onun zərərçəkmiş şəxsi aldatmaq niyyətinin olmaması barədə verdiyi ifadəsini və borc kimi aldığı 6000 manat pulun 1000 manatını qaytarmasını, ali təhsilli olmasını, müxtəlif dövlət müəssisələrində işlədiyini, Qarabağ müharibə veteranı və yüksək diabet xəstəsi olduğunu, yeddi ay ərzində həbsxana şəraitində qaldığından gözlərinin tutulduğunu və əvvəllər məhkum olunmadığını nəzərə almadan ona ədalətsiz cəza təyin edib.

Allahverdi Hüseynovun barəsində bəraət hökmünün çıxarılması ilə bağlı yazdığı şikayəti araşdırılması üçün Bakı Apelyasiya Məhkəməsinə göndərilib. Apelyasiya şikayəti hakim İlqar Murquzovun sədrlik etdiyi kollegiyada araşdırılıb. Apelyasiya şikayətinin dəlillərini müəyyən edən hakim kollegiyası sonda qərar elan edib. Qərara görə, Allahverdi Hüseynovun apelyasiya şikayəti təmin edilməyib.