O, vəzifəsinin icraasına başladığı ilk gündən atdığı addımları, söylədiyi naşı açıqlamaları ilə də yadda qaldı

Bu gün respublikamızın hər bir ərazisindəki təhsil ocaqlarının fəaliyyəti tam əksəriyyət tərəfindən müəyyən mənada qiymətləndirilir və həmin təhsil ocaqlarına qarşı bəlli ictimai münasibət də formalaşır. Lənkəran Dövlət Universiteti də aparıcı təhsil ocaqlarından biri olduğu üçün, bu ali təhsil müəssisəsinin ictimai-siyasi həyatında baş verən hadisələr, həyata keçirilən idarəçiliyin mahiyyəti, rəhbər şəxslərin hazırlıq göstəricisi, onların bir çox məsələlərlə bağlı söylədikləri açıqlamaların mahiyyəti və.s kimi məsələlər də, daim diqqət mərkəzində saxlanılır, yeri gələndə müəyyən müzakirələrə də səbəb olur.

Onu da qeyd edək ki, hələ bir müddət bundan əvvəl sabiq rektor Asəf İsgəndərov daşıdığı vəzifəsindən uzaqlaşdırıldıqdan sonra, universitetdə rektor vəzifəsini, universitetin tədris işləri üzrə prorektoru cənab Nizami Yusifov müvəqqəti icra etməyə başladı. O, vəzifəsinin icraasına başladığı ilk gündən atdığı addımları, söylədiyi naşı açıqlamaları ilə də yadda qaldı. Adicə bir faktı qeyd edək ki, cəbhə bölgəsində baş verən son hadisələr zamanı Lənkəran şəhərinə ilk olaraq üç şəhid göndərilir ki, həmin gün cənab Nizami Yusifov tələbələri şəhidlərin dəfninə buraxmır. Baxmayaraq ki, torpaqlarımız uğrunda canından keçən hər bir şəhidimizin dəfnində izdiham yaşanır, xalq onların ölməzliyi qarşısında baş əyir və ruhlarına dualar oxuyaraq, onları son mənzilə də yola salırlar. Belə bir yanaşma dövlət başçısından tutmuş sıravi vətandaşadək hər kəs tərəfindən nümayiş etdirildiyi halda, görəsən Nizami Yusifovun bu cür yanaşmasına nə ad vermək olar? Əgər ad vermək olarsa...

Əvvəla onu da vurğulayaq ki, bir müddət bundan əvvəl sabiq rektor Asəf İsgəndərov prezidentin müvafiq qərarı ilə daşıdığı vəzifəsindən azad olunsa da, onun təhsil sahəsindəki səmərəli fəaliyyəti unudulmadı və o, ölkə rəhbəri tərəfindən “Şərəf Ordeni” ilə də təltif olundu. Amma, Nizami Yusifov unversitet tələbələri ilə ayrı-ayrılıqda görüşərkən bildirib ki, “ona “Şərəf Ordeni”ni hakimiyyətin yüksək çinli vəzifə sahiblərindən biri verdirib. Əgər Asəf İsgəndərova orden verilməsəydi, o halda onunla bağlı yoxlamalar aparılardı və həbsi də həyata keçirilə bilərdi”. Nizami Yusifov görüş zamanı onu da qeyd edib ki, “mən rektor təsdiq olunana qədər hər bir addım şəffaf olacaq, sonra isə hər iş “öz axarı ilə gedəcək”.

O, başqa bir açıqlamasında da bildirib ki, “Lənkəran şəhər İcra Hakimiyyətinin başçısı Taleh Qaraşov, Universitetin daxili işlərinə olduqca müdaxilələr edir, bu da heç cür yolverilməz haldır. Şəhərin daxili yollarının kənarlarındakı səkilərin rənglənməsi zamanı, mən ona 200 manat pul çatdırmışam, rektor təyin olunduqdan sonra, heç o 200 manatları da verməyəcəyəm” deyə, o, bu gün də məntiqsiz açıqlamalarını danışmaqda davam edir. Belə bir açıqlamaların bildirilməsi, hər kəsdə olduqca ikrah hissi də doğurur. Çünki, sual oluna bilər ki, icra başçısı o qədərmi imkansız şəxsdir ki, o, Nizami Yusifovun 200 manatına möhtac qalsın?.

Bütün bunlardan əlavə o, bir neçə gün bundan əvvəl onu da vurğulayıb ki, “11 aprel 2016-cı il tarixdə təhsil naziri cənab Mikayıl Cabbarovla görüşüm olacaq və görüş zamanı rektor təyin olunmağım əsas müzakirə mövzusuna çevriləcək. Düzdür, mən Lənkəran Dövlət Universitetinə yox, Azərbaycan Texniki Universitetinə rektor təyin olunmaq istəyirəm. Amma, Lənkərandan olduğum üçün, nazir məni bu təhsil ocağına rektor təyin etmək istəyir”.

Nizami Yusifov müəllimlərlə görüşündə isə bildirir ki, “mən rektor təyin olunduqdan sonra, bu universitetdə ancaq lənkəranlılar dərs deyə biləcəklər, digər bölgələrdən olan müəllimlər indidən özləri üçün tədbir görsünlər. Mənim bugünkü missiyam, bölgəmizi universitetə şərəf ordeni verdirən yüksək çinli məmurların təsir dairəsindən xilas etməkdir. Mən bütün bunlara da nail olacağam. Bu gün hər kəs bilir ki, mən Mehriban xanım Əliyevanın kadrıyam, deməli bir kimsə mənə nəsə edə bilməz” deməkdən də çəkinmir. Təəssüf və təəccüb doğuran hal odur ki, bu cür məntiqsiz, yöndəmsiz, əsası olmayan açıqlamalar söyləyən bir şəxs, heç cür inana bilmirik ki, Mehriban xanımın kadrı ola bilsin. Deməli, onun bu cür cəfən açıqlamalar söyləməkdə məqsədi, yalnız və yalnız müəllim-tələbə kontingentini aldatmaqdan ibarətdir.

Mövzuya qayıdacağıq.