Bu gün Bakı metrosunda problem yaşanıb. Bu barədə anspress-ə Bakı metropoliteninin mətbuat xidmətinin rəhbəri Nəsimi Paşayev deyib. Onun sözlərinə görə, Həzi Aslanov-İçərişəhər xətti üzrə hərəkət edən 4 saylı qatarda nasazlıq yaranıb. Problem metronun Qara Qarayev stansiyasında meydana gəlib.

"Həzi Aslanovdan gələn qatarda nazaslıq olduğu üçün maşinist Qara Qarayevdə sərnişinləri boşaldıb və depoya gedib. Onun əvəzinə isə stansiyaya ehtiyat qatarı buraxılıb. Hazırda metroda heç bir problem yoxdur və hərəkət təmin edilib", - deyə qurum rəsmisi bildirib.

Bənzər hadisələr metroda müntəzəm olaraq baş verir. Analoji hal ötən ilin dekabrında da olub. "İçərişəhər" - "Həzi Aslanov"istiqamətində hərəkət edən qatar "Gənclik" stansiyasına çatmamış tuneldə qalıb.

Bildirilir ki, qatar tuneldə 10 dəqiqəyə yaxın qalıb. Daha sonra isə sərnişinlər "Gənclik" stansiyasında təxliyyə edilib. Nəticədə stansiyada basabas yaranıb. Sərnişinlərdən bəzilərinin halı pisləşib.

"Bakı Metropoliteni" QSC-dən verilən məlumata görə, qatarın tuneldə qalmasına səbəb həmin qatarda nasazlığın yaranması olub.

Sərniçinlər xəttə buraxılan başqa qatarla hərəkətə davam ediblər.