Göyçay rayon Ləkçıplaq kəndində məscid
tikilməsinə mane olan qara qüvvələr

Atalar yaxşı deyib ki, böyüksüz olan yerdə otur, Allahsız olan yerdə oturma. Ürəyində Allah xofu, Tanrı eşqiolmayan insan hər nə desən etməyə qadirdir. Gözünü vəzifə ehtirası, var dövlət hərisliyi tutanlar üçün bu dünyada haqq, ədalət, insanlıq anlayışları arxa plana keçir. Belələri vəzifə sahibi olanda isə vay o məmləkətin halına. Orada dindən, imandan nə əsər qalar, nə də əlamət.
Bu yaxınlarda Göyçay rayonunun Ləkçıplaq kəndinin sakinləri məscid tikdirmək üçün rayonun və respublikanın əlaqədar təşkilatlarına müraciət ediblər. Və bu məscidi onlar öz hesablarına tikmək istəyirlər. Sadəcə bu tikinti üçün rəsmi icazə verilməlidir. Indi görün, bu Allah evinin tikintisi üçün nə həngamələr başlayıb. Sanki məscid tikdirmək hansısa bir terror əməli və ya dövləti cinayətdir. Belə olmasaydı bu müqəddəs savab əməlin önünə sədd çəkilməz, ötur-ötür oyununa çevrilməzdi.
Məscid tikintisi ilə əlaqədar Göyçaydan millət vəkili seçilmiş Şəmsəddin Hacıyev kənd sakinləri ilə görüşəndə bu işə yardım edəcəyinə söz vermişdi. Lakin törədilən bürokratik amillər o qədər güclü olub ki, millət vəkili belə bu savab əmələ kömək edə bilmir. Biz Şəmsəddin Haciyevə müraciət edərkən o bu məsələnin həlli bağlı İqtisad Universitetinin prorektoru Şahin müəllimə həvalə etdiyini bildirdi. Şahin müəllimin qəbulunda olarkən o bizə Göyçay rayon İH başçısının birinci müavini Ramiz müəllimlə görüşməyi məsləhət gördü. Lakin Ramiz müəllim səhhəti ilə əlaqədar Mərkəzi Klinik Xəstəxanada müalicədə olduğu üçün biz İcra Hakimiyyəti başçısının hümanitar məsələlər üzrə şöbə müdiri Rəxşəndə Rəcəbova ilə görüşməli olduq. Kaş ki görüşməsəydik...
Doğrusu, çoxları bizim bu xanımla görüşəcəyimizi eşidəndə təəssüflənib, köks ötürəndə işin məğzini anlamışdıq. Amma, humanitar şöbənin rəhbəri olsa da humanizmdən xəbəri olmayan Rəxşəndə xanım bizə bir üz göstərdi ki, əlimiz üzümüzdə qaldı. Ömrünün ixtiyar çağlarını yaşasa da, yaşı 65-i keçsə də təqaüdə çıxmağı ağlına belə gətirməyən, oturduğu kreslodan bərk-bərk yapışan R.Rəcəbova məscid adını eşidəndə haldan-hala düşdü, qəzəbləndi. “məscid kimə kazımdır”, “neyniyirsiz məscidi?” və s. kimi elə sözlər dedi ki, elə bildik ki, yoldaş Brejnevin hakimiyyəti vaxtıdı. R.Rəcəbova da kommunist partiyasının novator ateistlərindəndir... Fikirləşdik ki, bəlkə bu xanım yaşlandığı üçün artıq vəzifəsinin öhdəsindən gələ bilmir, ona görə bizi başdan edir. Amma məlum oldu ki, icra başçısı Mansur müəllimin “əvəzedilməz” kadrı olan bu xanımı belə arxayınlaşdıran səbəblər vardır. Mansur müəllimin hamının qarşısında dəfələrlə “nə qədər mən bu rayonun başçısıyam sənə heç kim toxuna bilməz” deməsi Rəxşəndə xanımı Göyçayın yenilməz əvəzedilməz humanitar əməlləri isə bütün rayonda dillər əzbəridir. Qaçqınlara, imkansızlara göstərdiyi “humanitar” köməkləri sadalasaq, gərək dastan danışaq. Qeyri-qanuni kommersiya fəaliyyəti ilə məşğul olan bu xanımın rayonda “Rəxşəndənin obyektləri” kimi məşhur olan ticarət müəssisələri də xeyli saydadır. Düzdü,bu müəssisələr R.Rəcəbovanın adına olmasa da, onların əsl sahibinin kim olduğunu hamı bilir.
Nə isə mətləbdən uzaqlaşmayaq. Rəxşəndə xanım bu məscid tikintisinə görə bizə çox soyuq, başdansovdu münasibət göstərdi. Səbəbi də bu oldu ki, guya bu məscidi kimlərin tikdirdiyi kimlərin nəzarətində olacağı məlum deyil. Izah edirik ki, məscid camaatın vəsaiti köməkliyi ilə tikilir və bu məscidə dövlət orqanları kimi axund, imam təyin etsə, camaatın etirazı yoxdur. Sadəcə bu insanlar normal ibadət etmək üçün bir məscid, Allah evi tikmək istəyirlər. Amma R.Rəcəbovanın imanının heç tükləri də tərpənmədi.
Məscidin tikintisinə xeyir dua verənlərdən biri də yuxarıda qeyd etdiyimiz kimi millət vəkili Şəmsəddin Hacıyev olmuşdur. Əslində Şəmsəddin müəllim heç bu bölgənin deputatı olmasa da, ictimaiyyət qarşısında dəfələrlə bu işə kömək edəcəyinə söz vermişdi. Bu barədə 302 nəfər kənd sakininin imzası ilə yazılan müraciət də Şəmsəddin müəllimə təqdim olunmuşdur. Kim istəməz savab qazanmağı, el gözündə ucalmağı? Bu bəlkə də vəzifəli şəxslərə Allah qatında savab qazanmaq üçün Tanrının yaratdığı bir şans idi. Lap rəhmətlik Nəsibə xanım demişkən “xoşbəxtlik quşu özü gəlib onların çiyninə qonmuşdu” onlarsa bunu dəyərləndirmək istəmirlər. Göyçayın ən böyük kəndlərindən biri olan Ləkçıplaq kənd sakinləri isə hələ də intizarla gözləyir ki, görəsən Şəmsəddin müəllim, Mansur müəllim, Dini İşlər üzrə Dövlət Komitəsinin əməkdaşları nə vaxt bu ötür-ötür oyununa son qoyub məscidin tikintisinə xeyir-dua verəcəklər. Biz bunları yazdıq, Allahın əməl yazan mələkləri bu işə cavabdehlərin əməl dəftərinə nə yazır onu bilmirik.
Mövzu diqqətimizdədir.

Nicat Mahmudov,
Elman Əhmədov