Məhkəmə ölümə səbəb olan qəzanın günahkarına 6 il 6 ay cəza kəsdi

Ağır yol-nəqliyyat hadisəsi törətməkdə təqsirli bilinən İmişli rayon sakini, 1988-ci il təvəllüdlü Fərman Bünyətovun cinayət işi üzrə məhkəmə prosesi başa çatıb.

İttihama görə, Fərman Bünyətov 11 iyul 2015-ci il tarixdə, saat 20.45 radələrində nəqliyyat vasitələrini idarə etmək hüququ olmadan idarə etdiyi “Mercedes Benz Vito 112” minik markalı avtomobili İmişli şəhəri, H.Əliyev prospektində hərəkətdə olarkən sürət həddini aşıb.

Fərman Bünyətov yol hərəkəti qaydasını pozaraq H.Əliyev prospektində irəlidə-yolun sağ kənarında dayanmış Mübariz Şirinova “Qaz-31105 120” minik markalı avtomobili vurub. O, hadisə zamanı yaralanan Mübariz Şirinova ilkin yardım göstərməyib və idarə etdiyi avtomobillə hadisə yerini tərk edib.

Nəticədə aldığı xəsarətdən xəstəxanaya çatdırılan Mübariz Şirinova tibbi yardım göstərilsə də, onun həyatını xilas etmək mümkün olmayıb. Mübariz Şirinov iyulun 13-də xəstəxanada vəfat edib.

Fərman Bünyətovun barəsində Cinayət Məcəlləsinin 263-1.3-cü (yol hərəkəti qaydalarını sərxoş vəziyyətdə pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (hadisə yerindən qaçma) maddələri ilə ittiham edilib.

Lənkəran Ağır Cinayətlər Məhkəməsinin hökmü ilə Fərman Bünyətov 6 il 6 ay müddətinə azadlıqdan məhrum edilib. Hökmdən narazı qalan Fərman Bünyətov apelyasiya şikayəti verib və cəzasının yüngülləşdirilməsini istəyib.

Fərman Bünyətovun apelyasiya şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Zəki Babayevin sədrlik etdiyi kollegiyada araşdırılıb.

Fərman Bünyətovun vəkili Vəliəhəd Həbibov bildirib ki, məhkəmə Fərman Bünyatovun ehtiyyatsızlıqdan cinayət əməlini törətməsi baxımından onun cəmiyyətdən təcrid olunmadan islah olunmasını qeyri-mümkün hesab edib: “Məhkəmə Fərman Bünyətovun barəsində azadlıqdan məhrum etmə cəzasını tətbiq etməklə ümumi rejmili cəzaçəkmə müəssisəsində çəkiləcək bu cəzanın maksikmum dərəcədə onun islah və yenidən tərbiyə olunması məqsədinə xidmət edəcəyini əsas götürüb. Lakin, Lənkəran Ağır Cinayətlər Məhkəməsinin hökmünün dəyişdirilməsi, törətdiyi əmələ görə Fərman Büyatov barəsində Cinayət Məcəlləsinin 62-ci maddəsi tətbiq edilməsi, ona elan olunan Cinayət Məcəlləsinin 263-1.3 və 264-cü maddələrinin sanksiyasında nəzərdə tutulan cəzalar qismən toplamaqla müəyyən edilmiş aşağı həddən də az cəza təyin olunması məqsədə müvafiqdir”.

Məhkəmədə təqsirləndirilən şəxs qisimində dindirilən Fərman Bünyatov Cinayət Məcəlləsinin 263-1.3 və 264-cü maddələri ilə elan olunmuş ittiham üzrə özünü təqsirli bilib. O, ifadəsində göstərib ki,

baş vermiş hadisəyə görə həyacanlanıb: “Bu səbəbdən də toqquşduğum avtomobilin sürücüsü ilə maraqlanmamışam və hadisə yerindən getmişəm. Törətmiş olduğum cinayət əməlindən peşimaçılıq hissi keçirirəm, hadisə nəticəsində dünyasını dəyişmiş mərhum Mübariz Şirinovun dəfn xərclərinin ödənilməsində iştirak etmişəm, zərərçəkmiş şəxslərin hüquqi varisləri ilə barışıq əldə etmişəm”.

Zərərçəkmiş şəxsin hüquqi varisi qismində dindirilən Rəmzi Şirinov bildirib ki, baş vermiş yol-nəqliyyat hadisəsi nəticəsində atası Mübariz xəsarət alıb və İmişli Mərkəzi rayon Xəstəxanasına daxil olub. Xəstəxanada iyulun 13-də atasını ölməsini təsdiq edən zərərçəkmiş şəxsin hüquqi varisi bildirib ki, atasının dəfni ilə əlaqədar Fərman Bünyatov tərəfindən ziyanın tam ödənilib. O, Fərmana qarşı şikayətinin olmadığını bildirib.

Həmçinin Rəmzi Şirinov məhkəməyə ərizə verərək təqsirləndirilən şəxs tərəfindən cinayət nəticəsində ona dəymiş ziyanın tam ödənilməsini, Fərman Bünyatova qarşı heç bir şikayət və tələbinin olmadığını bir daha göstərib.

Dövlət ittihamçısı Elnar Hüseynov Fərman Bünyətovun müdafiəçisinin verdiyi apelyasiya şikayətinin dəlillərinin əsassız olduğunu, birinci instansiya məhkəməsi tərəfindən Fərman Bünyətovun əməlinin Cinayət Məcəlləsinin 263-1.3 və 264-cü maddələri ilə düzgün tövsif olunduğunu, məhkum edilmiş şəxsin cəzasını yüngülləşdirən və ağırlaşdıran hallar nəzərə alındığını bildirib.

Elnar Hüseynov qeyd edib ki, Fərman Bünyətovun şəxsiyyəti, törətdiyi cinayətin ictimai təhlükəliliyi və xarakteri, təyin edilmiş cəzanın ailəsinə təsiri nəzərə alınmaqla ədalətli cəza təyin olunub. Onun sözlərinə görə, məhkəmənin hökmünün apelyasiya şikayətinə əsasən dəyişdirilməsi üçün əsasların yoxdur. Elnar Hüseynov Lənkəran Ağır Cinayətlər Məhkəməsinin hökmünün dəyişdirilmədən saxlanılmasını xahiş edib.

Apelyasiya şikayətinin dəlillərini araşdıran hakim kollegiyası sonda qərar elan edib. Qərara görə, Fərman Bünyətovun cəzasının yüngülləşdirilməsi ilə bağlı apelyasiya şikayəti təmin edilməyib.

gundemxeber.az