Xidmət rəisi Fikrət Məmmədovu ağir ittihamlarla üz-üzə qoydu

Son günlər mətbuatda ədliyyə nazirinin müavini, nazirliyin penitensiar xidmətinin rəisi Mədət Quliyev barədə yazılan tənqidi yazılara qəribə reaksiyalar gəlir. Penitensiar Xidmət tərəfindən bəzi KİV-lərə ötürülən qeyri-rəsmi “press reliz”də və müəllif yazılarında iddia olunur ki, Mədət Quliyev Penitensiar xidmətə rəis təyin olunduqdan sonra cəzaçəkmə müəssisələrinə girən “əllər” kəsilib.
Bildirilir ki, bundan əvvəl cəzaçəkmə müəssisələrində cinayətkarlıq halları baş alıb gedirmiş, məhbuslara olmazın zülmlər edilirmiş. Amma elə ki, M.Quliyev gəlib, “sular durulub”, cinayətkarlığın kökü birdəfəlik kəsilib. İddia olunur ki, Mədət Quliyev cəzaçəkmə müəssisələrində tüğyan edən narkoticarəti ləğv edib, bu isə xidmət rəisinə qarşı kampaniyanın başlamasına səbəb olub.
Çox güman ki, xidmət şefinin xeyir-duası, razılığı ilə bu məlumatı hazırlayanlar və mətbuata ötürənlər həm Mədət Quliyevi, həm də Ədliyyə nazirini ciddi ittihamlara hədəf etdiklərinin görünür, fərqində deyillər. Fərqində deyillər ki, Mədət Quliyev Penitensiar Xidmətə rəis təyin olunduqdan sonra narkoticarətin kökünü kəsibsə, deməli, Mədət Quliyevə qədər türmələrdə narkoticarətin olduğu etiraf edilir. Onda:
1. Əgər cəzaçəkmə müəssisələrində narkotik alveriylə məşğul olan qruplaşmalar vardısa və bu hala yalnız M.Quliyev gələndən sonra son qoyulubsa, deməli, ədliyyə naziri Fikrət Məmmədov vəzifələrinin öhdəsindən layiqincə gəlmirmiş. Çünki M.Quliyev Pentensiar Xidmətə rəhbər təyin olunmazdan öncə də nazir məhz F.Məmmədov idi.
Deməli M. Quliyevdən əvvəl bu vəzifəni icra edən şəxs cinayətkar imiş. Və onda sual doğur, niyə həmin şəxs məsuliyyətə cəlb olunmur? Niyə Fikrət Məmmədov illər uzunu bu “rəzalətə” göz yumub? Və yaxud, bu məsələnin üstü açılandan sonra nazir niyə cəzalanmayıb? Hər-halda Mədət müəllim cəzaçəkmə müəssisələrində aşkarladığı neqativ halları, indiyə kimi baş vermiş olan “dəhşətlər”, “cinayətkar şəbəkə” barədə mətbuata ötürdüyü “faktları” öz nazirinə və müvafiq şəxslərə çatdırmaya bilməzdi axı...
2. M.Quliyev cəzaçəkmə müəssisələrində kimlərinsə narkobizneslə məşğul olduğunu bilirsə, onlar haqda ölçü götürülməsi üçün niyə rəsmi şəkildə hüquq-mühafizə orqanlarına müraciət etməyib?
Xidmətdən mətbuata ötürülən yazılarda iddia olunur ki, bu işlərə Penitensiar Xidmətin əməkdaşı olmuş Elxan Sadıqov rəhbərlik edirmiş və buna görə də o, tutduğu vəzifədən azad olunub. Söhbət narkobizneslə məşğul olmaq kimi ağır cinayətdən gedirsə, bu cinayətə görə adamı təkcə işdən çıxarmırlar, onu həm də həbs edirlər, axı! Görəsən, bu cür ağır cinayətləri törədən şəxsi azadlıqda hansı qüvvələr saxlayır?
Cavabını gözləyən daha bir sual da var: Görəsən, Penitensiar Xidmətin mətbuatla əlaqəli şəxsi nazir Fikrət Məmmədovu zərbə altında qoymaqda məqsədi nədir?
Bu suallara sözügedən qurum cavab vermək istəsə, böyük məmnuniyyətlə dərc edərik...

Azər