Məhkəmə yol qəzası törədən sdürücüyə 6 il cəza təyin etdi

Ağır yol-nəqliyyat hadisəsi törətməkdə təqsirli bilinən Astara rayon sakini, 1961-ci il təvəllüdlü Akif Mirzəyevin cinayət işi üzrə məhkəmə prosesi başa çatıb.

İttihama görə, Akif Mirzəyev 19 fevral 2015-ci il tarixdə, saat 11 radələrində sürücülük vəsiqəsi və etibarnaməsi olmadan özünə məxsus dövlət qeydiyyat nömrə nişanı olmayan “Muravey” markalı motorolleri Astara şəhəri, Həzi Aslanov küçəsində Astara şəhər istiqamətinə doğru idaerə edərkən Eldəniz İsmayılovun sürdüyü “Muravey” markalı motorolleri ötmək istəyib.

Bu zaman Akif Mirzəyev yol hərəkəti qaydasını pozub və hərəkətin təhlükəsizliyini təmin etməyib.

Bu zaman hər iki motosikletə bağlanmış kəndirin qırılması nəticəsində Eldəniz İsmayılovun sükan arxasında oturduğu “Muravey” markalı motoroller yolun sağ hərəkət zolağından 2,50 metr kənarda olan işıq dirəyinə çırpılıb.

Nəticədə Eldəniz İsmayılov hadisə yerində aldığı xəsarətlərdən ölüb. Həmçinin Eldəniz İsmayılovun əmlakı zədələndiyi üçün Akif Mirzəyev ona 50 manat ziyan vurub.

Akif Mirzəyev Cinayət Məcəlləsinin 263-1.3-cü ((yol hərəkəti qaydalarını sərxoş vəziyyətdə pozma, ehtiyatsızlıqdan zərərçəkmiş şəxsin ölümünə səbəb olduqda) mаddəsi ilə ittiham edilib.

Lənkəran Ağır Cinayətlər Məhkəməsinin hökmü ilə Akif Mirzəyev 6 il müddətinə azadlıqdan məhrum edilib. Hökmdən narazı qalan Akif Mirzəyev apelyasiya şikayəti verib. O, cəzasının yüngülləşdirilməsini istəyib. Onun şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim kamran Əkbərovun sədrlik etdiyi kollegiyada araşdırılıb.

Apelyasiya şikayəti üzrə araşdırma zamanı Akif Mirzəyev hakimin adına məktub göndərib. O, apelyasiya şikayətindən imtina etdiyini və verdiyi apelyasiya şikayətinə xitam verilməsini istəyib.

Hakim onun istəyini nəzərə alaraq apelyasiya şikayətinin baxılmasına xitam verib. Lənkəran Ağır Cinayətlər Məhkəməsinin hökmü qüvvəsində saxlanılıb.

gundemxeber.az