Şirvan Apelyasiya Məhkəməsində ölümlə nəticələnən yol-nəqliyyat hadisəsi törətməkdə təqsirli bilinən Cəlilabad rayon sakini, 1989-cu il təvəllüdlü Səyidmüslüm Soltanovun cinayət işi üzrə məhkəmə prosesi başa çatıb.

İttihama görə, Səyidmüslüm Sоltаnоv 14 iyul 2014-cü il tarixdə, saat 23.30-da atası Miraqil Soltanovun etibarnamə əsasında istifadəsində olan “Mercedes Benz-C 200” markalı avtomobili sürücülük hüququ olmadan Cəlilabad şəhəri, Heydər Əliyev prospekti ilə sürərkən yol hərəkəti qaydasını pozub. O, həmin prospektin kəsişdiyi Ələt-Astara yolu istiqamətində idarə edərkən Cəlilabad Rаyоn İcrа Hаkimiyyətinin inzibati binasının qarşısında yolu keçən piyada 1997-ci il təvəllüdlü Elməddin Quluzadəni vurub.

Elməddin Quluzadə ağır vəziyyətdə əvvəlcə Cəlilabad Rаyоn Mərkəzi Xəstəхаnаsınin qəbul şöbəsinə yerləşdirilib. O, daha sonra isə Bakı 1 saylı Kliniki Tibbi Mərkəzinə gətirilib. Ona tibbi yardım göstərilməsinə baxmayaraq iyulun 17-də vəfat edib.

İstintaq araşdırması zamanı baş verən yol-nəqliyyat hadisəsinin törədilməsində Səyidmüslüm Soltanov günahkar bilinib. Buna görə də onun barəsində Cinayət Məcəlləsinin 263-1.3-cü (yol hərəkəti qaydalarını sərxoş vəziyyətdə pozma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham edilib.

Lənkəran Ağır Cinayətlər Məhkəməsinin hökmü ilə Səyidmüslüm Soltanov 6 il 6 ay müddətinə azadlıqdan məhrum edilib. Hökmdən narazı qalan Səyidmüslüm Soltanov apelyasiya şikayəti verib.

Səyidmüslüm Soltanovun vəkili Arif Allahverdiyev bildirib ki, Səyidmüslüm Sоltаnоvun barəsində olan hökmün dəyişdirilməsi üçün əsaslar var: “Onun gənc olması, ilk dəfə ehtiyatsızlıqdan cinayət törətməsini, etdiyi əməlləri səmimi etiraf etməsini, zərərçəkmiş tərəfin adamları ilə barışıq təşəbbüsü göstərməsini birinci instansiya məhkəməsi nəzərə almayıb. Ona görə də məhkəmədən Lənkərаn Аğır Cinаyətlər Məhkəməsinin hökmü dəyişdirərək, Səyidmüslüm Sоltаnоvun barəsində təyin edilmiş cəzanın yüngülləşdirilməsini xahiş edirəm”.

Hakimlər müdafiə tərəfinin apelyasiya şikayətinin əsassız olması nəticəsinə gəliblər. Buna görə də apelyasiya şikayətinin təmin edilməməsi barədə qərar elan edilib.

gundemxeber.az