Qəza törədən sürücü hakimləri ittiham etdi

O, apelyasiya şikayəti versə də, sonradan şikayətini geri götürdü

Ağır yol-nəqliyyat hadisəsi törətməkdə təqsirli bilinən Ucar rayon sakini, 1964-cü il təvəllüdlü Nadir Məmmədovun cinayət işi üzrə məhkəmə prosesi başa çatıb.

İttihama görə, Nadir Məmmədov 15 oktyabr 2015-ci il tarixdə, saat 07.25-də Göyçay-Ucar yolunun Göyçay şəhəri istiqamətində hərəkətdə olarkən yol hərəkəti qaydasını pozub.



Nadir Məmmədov Göyçay rayon Mallı-Şıxlı kəndi ərazisindən keçən yolun 5-ci kilometrliyində Feyruz Aslanova məxsus və etibarnamə ilə idarə etdiyi “Mersedes Benz-D 200” markalı avtomobillə piyadalar Zahid Hüseynov və Elnur Mikayılovu vurub. Hadisə zamanı piyadaların hər ikisi hadisə yerində ölüblər.

Nadir Məmmədov Cinayət Məcəlləsinin 263.3-cü (Ehtiyatsızlıqdan iki və daha çox şəxsin ölümünə səbəb olma) maddəsi ilə ittiham edilib.

Şəki Ağır Cinayətlər Məhkəməsinin hökmü ilə Nadir Məmmədov 6 il müddətinə azadlıqdan məhrum edilib. Hökmdən narazı qalan Nadir Məmmədov apelyasiya

şikayəti verib. Onun şikayəti araşdırılması üçün Şəki Apelyasiya Məhkəməsinə göndərilib.

Nadir Məmmədov bildirib ki, birinci instansiya məhkəməsinin hökmdən narazıdır: “Həmin hökm qanunsuz, ədalətsizdir. Məhkəmə işə baxarkən sübutlara tam qiymət verməyib, işin faktiki halları araşdırılmadan, qeyri-obyektiv və qərəzli hökm qəbul edərək konstitusion hüquq və azadlıqlarımı pozub. Məhkəmə işə baxarkən təqsirli olub-olmamağımı, ahıl yaşında olmağımı, səhhətimdə qüsurların olmasını və nəhayət yoldaşımın xəstə olmasını nəzərə almayıb. Obyektiv məhkəmə istintaqı aparılmadan yalan ittihamla təsdiq olunmuş ittiham aktına əsaslanaraq barəmdə hökm çıxarılıb”.

Nadir Məmmədov Şəki Ağır Cinayətlər Məhkəməsinin 25 fevral 2016-cı il tarixli hökmünün Cinayət Məcəlləsinin 70-ci (şərti məhkum etmə) maddəsini tətbiq edilməsini, şərti cəza almasını istəyib.

Amma hakim İmanverdi Şükürovun sədrliyi ilə keçirilən prosesdə Nadir Məmmədov apelyasiya şikayətinə baxılmasından imtina edib. Buna görə də onun apelyasiya şikayətinin baxılmasına xitam verilib.