Oğuzda həmkəndillərin pul davası cinayətlə nəticələndi

Xuliqanlıqda təqsirli bilinən Oğuz rayon sakini, 1971-ci il təvəllüdlü Bahar Soltanovun cinayət işi üzrə məhkəmə prosesi başa çatıb. İttihama görə, Bahar Soltanov 14 aprel 2015-ci il tarixdə, saat 14 radələrində Oğuz rayonu Padar kəndi ərazisində heç bir əsaslı səbəb olmadan həmkəndlisi Vüqar Abdullayevin sifətinə yumruqla və bədəninin müxtəlif nahiyələrinə təpiklə vurub. Bahar Soltanov eyni zamanda üzərində olan baltanın sapı ilə Vüqar Abdullayevin qol nahiyəsinə vuraraq ona xəsarət yetirib.

Həmçinin, Bahar Soltanov əlindəki balta ilə Vüqar Abdullayevin idarə etdiyi “Mersedes Benz-2080” markalı mikroavtobusun qabaq alın, arxa və bütün yan şüşələrini sındırıb, üzərində olan bıçaqla həmin avtomobilin 4 ədəd təkərini və arxa hissəsində olan 1 ədəd ehtiyat təkərini deşərək yararsız vəziyyətə salıb. Bununla da Bahar Soltanov Vüqar Abdullayevə ümumilikdə 710 manat məbləğində maddi ziyan vurub.

İstintaq orqanı Bahar Soltanovu Cinayət Məcəlləsinin 221.3-cü (xuliqanlıq) maddəsi ilə ittiham edib və barəsində olan cinayət işini baxılması üçün Oğuz rayon Məhkəməsinə göndərib.

“Faizə pul vermişəm”

Cinayət işi hakim Rəfayel Şirinovun icraatında araşdırıb. Hakim Bahar Soltnaovun ittihamında dəyişiklik edib və onu Cinayət Məcəlləsinin 128-ci (sağlamlığa az ağır zərər yetirmə) maddəsi ilə ittiham edib.

Məhkəmənin hökmü ilə Bahar Soltanov 300 manat miqdarında cərimə cəzasına məhkum edilib. Hökmdən narazı qalan Baş Prokurorluq apelyasiya protesti verib. Prokurorluq Bahar Soltanovun Cinayət Məcəlləsinin 221.3-cü maddəsi ilə cəzalandırılmasını istəyib.

Prokurorluğun protesti baxılması üçün Şəki Apelyasiya Məhkəməsinə göndərilib.

Məhkəmdə ifadə verən Bahar Soltanov bildirib ki, Oğuz rayonu Padar kəndində anası Kifayət Soltanova ilə birlikdə yaşayır: “Səhhətim ilə bağlı işləyə bilmədiyi üçün aldığım təqaüdlə dolanıram, eyni zamanda maddi ehtiyacı olan tanıdığım şəxslərə faizə pul verərək həmin şəxslərdən aldığı faizlərlə özümün maddi ehtiyaclarımı ödəyirəm. Vüqar Abdullayevi Padar kəndinin sakini kimi tanıyıram, aramızda hər hansı narazılıq və ya ədavət olmayıb”.

“Baltanı avtobusun içinə atdım”

Təqsirləndirilən şəxsin sözlərinə görə, Vüqar Abdullayev 2013-cü ildə ondan faizlə borc pul istəyib: “Vüqara etibar edərək 2013-cü ilin sonlarına qədər ona hissə-hissə cəmi 530 manat vermişım. Ancaq Vüqar sonradan pullarımı qaytarmayıb. Dəfələrlə Vüqardan pulu istəsəm də, ala bilməmişəm. Bu barədə Vüqarın atası Fərrux Abdullayevə də demişəm. Lakin heç bir nəticəsi olmayıb”.

Bahar Soltanov qeyd edib ki, 17 mart 2015-ci il tarixdə Padar kəndinin “bazar yeri” adlanan ərazisinə gəlib: “Vüqar və atası Fərrux Abdullayevin növbə ilə idarə etdikləri, Padar kəndindən Oğuz şəhərinə sərnişin daşıyan “Mersedes Benz-2080” markalı mikroavtobusun qabaq alın şüşəsinə özüm ilə gətirdiyim balta ilə 5-6 dəfə vuraraq şüşəni sındırmışam. Fərrux Abdullayev yanıma gələrək nə üçün belə hərəkət etdiyimi soruşdu. Oğlu Vüqarın mənə borclu olduğu pulu qaytarmadığına görə belə etdiyimi dedim və əlimdə olan baltanı mikroavtobusun içərisinə atdım”.

Bahar Soltanov bildirib ki, bir neçə gün sonra Fərrux Abdullayev 400 manat pul gətirib və ona verib: “Həmin vaxt anam xəstə olduğundan məcburiyyət qarşısında qalaraq pulu götürmüşəm. Lakin bir neçə gün sonra Fərrux Abdullayevin yanına gedərək 400 manat pulu ona qaytarmışam və Vüqarın faizlə birlikdə 1500 manat verməli olduğunu

demişəm. Bu barədə Vüqarın özünə də demişəm. Lakin Vüqar həmin məbləğdə pul verə bilməyəcəyini söyləyib”.

“Nə üçün pulumu vermədiyini soruşdum”

Bahar Soltanov əlavə edib ki, aprelin 14-də Padar kəndinə sərnişinləri mikroavtobusla Vüqarın gətirdiyini bilib: “Həyətdə istifadə etdiyim başqa bir baltanı və açılıb-qatlanan cib bıçağını özüm ilə götürərək gödəkcəmin altında gizlətdim. Sonra Padar kəndinin “bazar yeri” adlanan ərazisinə gəldim. Bir qədər sonra Vüqar mikroavtobusla həmin yerə gəldi, sərnişinlər düşdükdən sonra mikroavtobusa minərək Vüqara avtomobili bir qədər kənara sürməsini dedim. Vüqar mikroavtobusu təxminən 400-500 metr kənara sürərək heç kim olmayan yerdə saxladı. Vüqardan nə üçün pulumu vermədiyini soruşdum. O heç nə demədiyi üçün əsəbiləşərək sillə və yumruqla Vüqarın sifətinə, təpiklə isə bədəninin müxtəlif nahiyələrinə vurdum. Özüm ilə gətirdiyim balta ilə mikroavtobusun şüşələrini sındırdım, bıçaqla isə təkərlərini deşdim. Bundan sonra həmkəndlisi Sadiq İsgəndərov yanımıza gəldi və nə baş verdiyini soruşdu. Vüqar mənə olan borcunu qaytara bilmədiyi üçün aramızda mübahisə yarandığını Sadiqə dedim. Daha sonra Vüqar və Sadiq oradan getdilər. Bundan sonra həmin yerdən uzaqlaşdım”.

Təqsirləndirilən şəxsin sözlərinə görə, aprelin 14-də baş vermiş hadisə zamanı Vüqar Abdullayevi baltanın tiyəsinin arxası ilə və ya sapı ilə vurmayıb: “Onu vuracağım və xəsarət yetirəcəyim ilə hədələməmişəm, balta ilə onun üzərinə getməmişəm. Hadisə baş verən vaxt həmin yerdə heç kim olmayıb. Heç kimin ünvanına söyüş söyməmişəm, Sadiq İsgəndərov da bizim yanımıza sonradan gəlib”.

“Zərərçəkmiş məni bağışlayıb”

Bahar Soltanov bildirib ki, xuliqanlıq etməyib, ictimai qaydanı pozan hər hansı hərəkətə yol verməyib: “Yalnız Vüqar Abdullayev mənim pulunu qaytarmadığı üçün onu vuraraq xəsarət yetirmişəm. Vüqar

Abdullayevə vuraraq xəsarət yetirdiyimə və idarə etdiyi mikroavtobusa maddi zərər vurduğuma görə əməlimdən səmimi peşman olmuşam. Vüqardan üzr istəmişəm və ona vurduğum maddi ziyan məbləğini könüllü olaraq tam şəkildə ödəmişəm. Zərərçəkmiş şəxslə barışıb razılıq əldə etmişəm. Zərərçəkmiş şəxs də məni bağışlayıb. Onun mənə qarşı şikayəti yoxdur. Səhhətimin və ailə vəziyyətimin nəzərə alınmasını, protestin təmin olunmamasını xahiş edirəm”.

“Faizi ilə birlikdə 1500 manat tələb etdi”

Zərərçəkmiş Vüqar Abdullayevin sözlərinə görə, Oğuz rayonu Padar kəndində qeydiyyatda olsa da, ailə üzvləri ilə birlikdə Oğuz şəhərində yaşayır: “Padar kəndindən Oğuz şəhərinə sərnişin daşıyan “Mersedes Benz-2080” markalı mikroavtobusu atam Fərruxla birlikdə növbə ilə idarə edirik. 2013-cü ildə maddi ehtiyacım olduğu üçün Bahar Soltanovdan faizlə borc pul istəmişəm. Bahar Soltanov da mənə borc pul verib. Bir müddət sonra Bahar Soltanovun pulunu qaytarmışam. Bundan sonra Bahar Soltanovdan bir neçə dəfə də borc pul almışam. Ancaq sonradan onun pullarını qaytara bilməmişəm. Bahar Soltanov sonradan məndən faizi ilə birlikdə 1500 manat tələb etdi, həmin məbləği verə bilmədiyimə görə aramızda narazılıq yarandı”.

Zərərçəkmiş qeyd edib ki, Bahar Soltanov 17 mart 2015-ci il tarixdə Padar kəndinin “bazar yeri” adlanan ərazisində onlara məxsus mikroavtobusun qabaq alın şüşəsini balta ilə sındırıb: “Lakin həmkəndli olduğumuz üçün atam Bahar Soltanovun barəsində şikayət etməyib. Bundan sonra da Bahar Soltanov pulun qaytarılmasını məndən mütəmadi olaraq tələb edib. Lakin pulu qaytara bilməmişəm”.

“Tələb etdiyi pulu verə bilməyəcəyimi dedim”

Vüqar Abdullayev bildirib ki, aprelin 14-də Padar kəndinə gətirdiyi sərnişinlər düşdükdən sonra Bahar Soltanov mikroavtobusa minib və

ona avtomobili bir qədər kənara sürməsini deyib: “Mikroavtobusu təxminən 400-500 metr kənara sürərək heç kim olmayan yerdə saxladım. Həmin vaxt küçədə bizdən başqa heç kim olmayıb. Bahar Soltanov məndən nə üçün pulu qaytarmadığımı soruşdu. Ona tələb etdiyi miqdarda pul verə bilməyəcəyimi dedim. Bundan sonra Bahar sillə və yumruqla sifətimə, təpiklə isə bədəninin müxtəlif nahiyələrinə vurdu. Bahar Soltanov gödəkcəsinin altından çıxardığı balta ilə mikroavtobusun bütün şüşələrini sındırdı, bıçaqla isə mikroavtobusun bütün təkərlərini deşdi”.

Zərərçəkmişin sözlərinə görə, hadisə yerinə gələn Sadiq İsgəndərovla birlikdə onun yaşadığı evə gedib: “Sadin evindən Daxili İşlər Nazirliyinin 102 xidmətinə zəng edərək baş vermiş hadisə barədə məlumat vermişəm”.

Tərəfləri dinləyən hakim heyəti sonda qərar elan edib. Qərara görə, prokurorluğun protesti təmin edilib və Oğuz rayon Məhkəməsinin hökmü ləğv edilib.

Apelyasiya instansiyasında Bahar Soltanovun barəsində yeni hökm çıxarılıb. Yeni hökmə əsasən, Bahar Soltanov Cinayət Məcəlləsinin 221.3-cü maddəsi ilə cəzalandırılıb və barəsində 3 il müddətinə şərti cəza təyin edilib.

gundemxeber.az