«Bu gün Amnistiya Aktının tətbiqinin ilk günüdür və bununla bağlı cəzaçəkmə müəssisələrinə gəlmişik. Mən, hələlik, 1 və 4 saylı qadın cəzaçəkmə müəssisəsində olmuşam».

Əfv Komissiyasının üzvü Əliməmməd Nuriyev bunu AzadlıqRadiosuna bildirib.

Ə.Nuriyevin deməsinə görə, aktın ilk günü 350 nəfər məhbusun həbsxana divarlarından azad olunacağı gözlənilir: «Qanunda bu prosesin 4 aya başa çatdırılması nəzərdə tutulur. Amma fikrimcə, Penitensiar Xidmət bu prosesi daha tez başa vurmağın yolunu tapa bilər».

Milli Məclis Heydər Əliyev Fondunun prezidenti, deputat Mehriban Əliyevanın təşəbbüsü ilə 28 May Respublika Günü münasibətilə mayın 20-də Amnistiya Aktı qəbul etmişdi.

Ümumilikdə 10 min nəfərə şamil edilməsi gözlənən bu aktla 3 min 500 məhkum azadlığa çıxmalıdır.

gundemxeber.az