Məhkəmədən yüngül cəza alan Arıkan Memet xəsarət yetirdiyi azyaşlının atasını tutdurmaq istəyir

Sumqayıt şəhərində yol qəzası törətməkdə təqsirli bilinən Türkiyə vətəndaşı, 1961-ci il təvəllüdlü Arıkan Memet Abdullah oğlunun cinayət işi üzrə məhkəmə prosesi başa çatıb.

İttihama görə, Arıkan Memet 21 may 2015-ci il tarixdə, saat 15.50 radələrində idarə etdiyi “VAZ-2107” markalı avtomobil ilə Sumqayıt şəhəri, Koroğlu prospektində hərəkətdə olarkən sürət həddini aşıb.

Bu zaman Arıkan Memet yolun sol tərəfindən sağ tərəfinə velosiped ilə keçmək istəyən azyaşlı Mərdan Mərdanovu görüb və idarə etdiyi avtomobilin sürətini azaltmalı olduğu halda, habelə baş vermiş təhlükənin qarşısını almağa texniki imkanı olsa da, bunu etməyib.

Arıkan Memet idarə etdiyi avtomobilin qabaq tərəfi ilə yolun hərəkət hissəsindən keçmək istəyən Mərdan Mərdanovu vurub. Azyaşlıya xəstəxanada tibbi yardım göstərilib və onun həyatını xilas etmək mümkün olub.

İstintaq araşdırması zamanı Arıkan Memetin yol hərəkəti qaydasını pozması müəyyən edilib. O, Cinayət Məcəlləsinin 263.1-ci (avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin sağlamlığına az ağır və ya ağır zərər vurulmasına səbəb olma) maddəsi ilə ittiham edilib.

Sumqayıt şəhər Məhkəməsinin hökmü ilə Arıkan Memet qazancından dövlət nəfinə 20 faiz məbləğində pul tutulmaqla 1il müddətinə islah işləri cəzasına məhkum edilib.

Hökmdən zərərçəkmişin qanunu nümayəndəsi, atası Kamran Mərdanov apelyasiya şikayəti verib. Nümayəndə Arıkan Memetin Cinayət Məcəlləsinin 263.1-ci maddəsinin sanksiyası daxilində həbslə əlaqədar olan cəza təyin edilməsini və 4400 manat pulu tutularaq ona ödənilməsini xahiş edib.

Apelyasiya şikayəti araşdırılması üçün Sumqayıt Apelyasiya Məhkəməsinə göndərilib. Apelyasiya şikayəti hakim Fərmayıl Zeynallının sədrlik etdiyi kollegiyada araşdırılıb.

Kamran Mərdanov bildirib ki, birinci instansiya məhkəməsi hökm qəbul edərkən maddi və prosessual qanunvericiliyinin tələblərini kobud surətdə pozub, Arıkan Memetin barəsində yüngül cəza təyin edib: “Belə ki, Arıkan Memetdən zərərçəkmiş şəxsin müalicəsi ilə əlaqədar çəkilən xərci 4400 manatın tutulmasını birinci instansiya məhkəməsində tələb etmişəm. Azyaşlı oğlumun ayağı gipsdə qaldığından qanqrena başladığını hətta ayağının ombutasiya olmaq təhlükəsi yaranıb. Arıkan Memet hadisə baş verən ilk günlərdə təxminən iki üç dəfə xəstəxanaya gəlib, sonradan bir dəfə də olsun uşağın səhəti ilə maraqlanmayıb, azyaşlı uşağa və ailəsinə maddi, mənəvi dayaq olmayıb. Əksinə Arıkan Memet mənə şər atmaqla təhqir dib, barəmdə əsassız şikayət ərizəsi ilə polis idarəsinə müraciət edib. Həmçinin, məhkəmə cəza təyin edərkən Arıkan Memetin yol hərəkət qaydalarını pozaraq azyaşlı uşağın az qala ayağının itirilməsinə səbəb olan

həyat üçün təhlükəli olan sağlamlığa az ağır xəsarət vurmaya aid olan xəsarət yetirməsini nəzərə almayıb və Arıkan Memetə yüngül cəza təyin edib”.

Apelyasiya şikayətinin dəlillərini araşdıran hakim heyəti sonda qərar elan edib. Qərara görə, zərərçəkmiş şəxsin nümayəndəsinin apelyasiya şikayəti təmin edilməyib.

gundemxeber.az