“Ağ ölüm” daşıyıcılarına narkomaniyadan məcburi müalicə təyin edildi

İrandan Azərbaycana külli miqdarda narkotik vasitə gətirməkdə ittiham olunan Neftçala rayon sakini, 1974-cü il təvəllüdlü Ceyhun Hüseynov və Salyan rayon sakini, 1973-cü il təvəllüdlü Ceyhun Əliyevin cinayət işi üzrə məhkəmə prosesi başa çatıb.

İttihama görə, Ceyhun Hüseynov və Ceyhun Əliyev satış məqsədi olmadan qanunsuz olaraq narkotik vasitələri əldə etmə, saxlama və Azərbaycan Respubilkasının gömrük sərhədindən gömrük nəzarətindən gizli olaraq keçirməyi planlaşdırıblar.

Onlar 11 may 2015-ci ildə İran İslam Respublikasının Biləsuvar şəhərində qabaqcadan əlbir olaraq cinayət əlaqəsinə giriblər. Bu məqsədlə Ceyhun Əliyev həmin tarixdə Biləsuvar şəhərində istintaqla müəyyən edilməmiş mənbədən satış məqsədi olmadan qanunsuz olaraq şəxsi istehlak miqdarından artıq miqdarda 28,894 qram tiryək narkotik vasitəsini əldə edib. Ceyhun Əliyev həmin narkotik vasitəni özünd saxlayıb.

Aralarında olan razılığa əsasən Ceyhun Əliyev narkotik vasitəni düz bağırsağında yerləşdirib. O, daha sonra 2 bükümdə qablaşdıraraq narkotik vasitəni Ceyhun Hüseynova verib.

Ceyhun Həsənov da öz növbəsində həmin narkotik vasitəni 2 bükümdə malların aşkar edilməsini çətinləşdirən üsullardan istifadə etməklə düz bağırsağında yerləşdirib. Onlar həmin gün birlikdə İran İslam Respublikasından Azərbaycan Respublikasına qayıdarkən saat 17 radələrində Biləsuvar Gömrük İdarəsinin “Qoşa Təpə” gömrük postunda Azərbaycan Respublikasının gömrük sərhədində tutulublar.

Təqsirləndirilən şəxslər Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qaçaqmalçılığı törətmək) və 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddələri ilə ittiham ediliblər.

Lənkəran Ağır Cinayətlər Məhkəməsinin hökmü ilə Ceyhun Hüseynov 6 il, Ceyhun Əliyev isə 7 il müddətinə azadlıqdan məhrum ediliblər. Məhkəmə Cinayət Məcəlləsinin 93.1.4-cü maddəsini rəhbər tutaraq təqsirləndirilən şəxslərə tibbi xarakterli məcburi tədbirlər təyin edib. Həmin qərara əsasən, təqsirləndirilən şəxslır cəza çəkdiyi dövrdə narkomaniyadan

məcburi müalicə olunacaqlar və ərazi narkoloji dispanserdə profilaktik qeydiyyata alınacaqlar.

Hökmdən narazı qalan Ceyhun Hüseynov apelyasiya şikayəti verib. O, apelyasiya şikayətini onunla əsaslandırıb ki, barəsində olan hökmdən razı deyil. Birinci instansiya məhkəməsi ona cəza təyin edərkən məsuliyyətini yüngülləşdirən halları nəzərə almayıb. Himayəsində 2 azyaşlı övladının, 69 yaşlı

ağbirçək xəstə anasının olmasını və ağır ailə vəziyyətini nəzərə alıb ona təyin edilən cəzanın yüngülləşdirilməsini, ya da təyin edilmiş cəzasının rejiminin dəyişdirilməsini apelyasiya məhkəməsindən xahiş edib.

Digər təqsirləndirilən Ceyhun Əliyev apelyasiya şikayəti verməyib və o, birinci instansiya məhkəməsinin hökmü ilə razılaşıb. Ceyhun Hüseynovun şikayəti araşdırılması üçün Şirvan Apelyasiya Məhkəməsinə göndərilib. Onun şikayəti hakim Amil Dosiyevin sədrlik etdiyi kollegiyada araşdırılıb.

Məhkəmədə çıxış edən Ceyhun Hüseynov bildirib ki, Lənkəran

Ağır Cinayətlər Məhkəməsinin hökmündən verdiyi apelyasiya şikayətinin dəlillərini müdafiə edir. O, birinci instansiya

məhkəməsi tərəfindən ona ağır cəza təyin edildiyini bildirib. Eyni zamanda, Ceyhun Hüseynov apelyasiya şikayətinin təmin edilməsini, barəsində qanuni, ədalətli və daha yüngül cəza təyin edilməsi barədə qərar qəbul edilməsini məhkəmə kollegiyasından xahiş edib.

Ceyhun Hüseynovun vəkili Salman Fərəcov apelyasiya şikayətinin dəlillərini müdafiə edib. Daha sonra çıxış edən dövlət ittihamçısı Səyavuş Sadıqov qeyd edib ki, Ceyhun Hüseynov və Ceyhun Əliyev Cinayət Məcəlləsinin 206.3.2 və 234.1-ci maddələri ilə məhkum ediliblər.

Dövlət ittihamçısının sözlərinə görə, Lənkəran Ağır Cinayətlər Məhkəməsinin hökmündən məhkum edilmiş Ceyhun Hüseynov tərəfindən verilmiş apelyasiya şikayəti verilib. O, apelyasiya şikayətinin dəlilləri ilə razı olmayıb.

Dövlət ittihamçısı qeyd edib ki, Ceyhun Hüseynovun törətdiyi cinayət əməllərinin birinci instansiya məhkəməsi tərəfindən tam sübuta yetirilib: “Ona cəza təyin olunarkən iş üzrə

yüngülləşdirici halların nəzərə alınıb və ona ədalətli cəza təyin olunub”.

Səyavuş Sadıqov Lənkəran Ağır Cinayətlər Məhkəməsinin hökmünün dəyişdirilmədən saxlanılmasını, məhkum edilmiş Ceyhun Hüseynov tərəfindən verilmiş apelyasiya şikayətinin təmin edilməməsini məhkəmə kollegiyasından xahiş edib.

Tərəflərin fikirlərini öyrənən hakim kollegiyası sonda qərara elan edib. Qərara görə, Ceyhun Hüseynovun apelyasiya şikayəti qismən təmin edilib və Lənkəran Ağır Cinayətlər Məhkəməsinin hökmü dəyişdirilib.

Yeni hökmə əsasən, Ceyhun Hüseynovun ittiham olunduğu Cinayət Məcəlləsinin 206.3.2-ci maddəsini həmin məcəllənin

206.2-ci maddəsinə tövsif edib. Məhkəmənin hökmü ilə Ceyhun Hüseynova 5 il 6 ay azadlıqdan məhrum etmə cəzası təyin edilib.

Hakimlər həmçinin Ceyhun Əliyevin cəzasının yüngülləşdirilməsi barədə də hökm elan ediblər. Ceyhun Əliyevin ittiham olunduğu Cinayət Məcəlləsinin 206.3.2-ci maddəsini həmin məcəllənin 35, 206.3.2-ci (qaçaqmalçılıqda iştrakçılıq) maddəsinə tövsüf edib. Hökmə əsasən, Ceyhun Əliyevin cəzası 6 il 6 aya endirilib.