Rektor sahibkarlığa mane olur, SDU-da isə qanunsuzluq pik həddə çatıb

gundemxeber.az “Gündəm-xəbər” qəzetinin redaksiyasına Sumqayıt Dövlət Universitetinin rektoru Nadir Qəhrəmanovun özbaşınalıqlarından və törətdiyi qanun pozuntularından bəhs edən çoxsaylı şikayət məktubları daxil olmaqdadır. Bu sayımızda həmin şikayətlərdə əks olunan faktlara işıq tutmaqla Sumqayıt Dövlət Universitetində nələrin baş verdiyinə aydınlıq gətirməyə çalışacağıq. İlkin olaraq redaksiyamıza yazılı şəkildə müraciət edən Sumqayıt şəhər 45-ci məhəllə, 14 saylı binanın 82-ci mənzilinin sakini, əmək veteranı Cəfərov Təbiət Qasım oğlunun şikayət ərizəsindəki faktlara göz ataq.
Şikayətçi bildirir ki, SDU-nun rektoru Nadir Qəhrəmanov artıq vəzifə səlahiyyətlərini aşaraq sahibkarlara qarşı mübarizəyə girişib: “Mən ölkəmizdə yaradılmış şəraitdən istifadə edərək müstəqil sahibkarlıqla məşğul olmaq istəyirəm. Bu məqsədlə mənə Sumqayıt şəhər Bələdiyyəsinin 26 saylı 2007-ci il tarixli 29 saylı protokoluna əsasən Sumqayıt şəhər icra başçısının 4 noyabr 2008-ci il tarixdə 339 saylı sərəncamı ilə mənə 43 məhəllə ərazisində M.Quliyev küçəsində kommersiya obyekti işlətmək məqsədilə torpaq sahəsi ayrılıbdır. Bu torpaq sahəsi 19 fevral 2008-ci il tarixdə aktla mənə təhvil verilibdir. Həmin vaxtdan şəhər bələdiyyəsinə bu torpağa görə icarə haqqı ödəyirəm. İnşaat pasportuna və başqa işlərəgörə şəhərin memarlıq şöbəsinə və şəhər bələdiyyəsinə dövlət rüsumları ödəmişəm. Bütün hüşuşi sənədlərin əlimdə olmasına baxmayaraq SDU-nun rektoru Nadir Qəhrəmanov özbaşınalıq edərək tikinti işlərini aparmağa imkan vermir. Belə ki, rektor mənim tanımadığım şəxsləri əraziyə göndərərək fəhlələrin tikinti aparmasına imkan verməyib. Mən bu haqda şəhər icra hakimiyyətinə və şəhər memarlıq şöbəsinə məlumat verdim. Nəhayət, şəhər memarlıq şöbəsinin işçisi Kənan müəllim xəritə ilə sözügedən ərazidə oldu və mənə rəsmən bildirdi ki, tikinti işlərini davam etdirə bilərəm. Bundan sonra mən həmin ərazini zibil tullantılarından təmizlətmişəm, həmin sahəyə traktor gətirib torpağı kürüdərək ərazini hamarlatmışam. Səhərisi gün fəhlələri apardım ki, tikintini fundamentini qazsınlar. Amma əraziyə gələrkən gördüm ki, Nadir Qəhrəmanov həmin əraziyə dəmir turbalar düzdürərək məftil çəkdirib. Bu haqda Memarlıq Şöbəsinə məlumat verdim, yenə də Kənan müəllim və İcra Hakimiyyətindən 2 nəfər məsul işçi həmin sahəyə gəldilər. Onlar mənim işimə maneçilik törədən adamlara izah edərək bildirdilər ki, mənim hüquqi sənədlərim imkan verir ki, orada tikinti işlərini davam etdirim. Buna baxmayaraq həmin şəxslər işlərin davam etdirilməsinə imkan vermədilər. Bununla bağlı müvafiq orqanlara müraciət etsəm də bu günə qədər Nadir Qəhrəmanovun bu özbaşınalığının qarşısının alınması üçün heç bir tədbir görülməyib”.
Şikayət məktubundan da göründüyü kimi artıq SDU-nun rektoru Nadir Qəhrəmanov vəzifə səlahiyyətlərinə heç bir aidiyyatı olmayan məsələlərə qarışaraq qanunsuzluqlar törətməkdən çəkinmir. Maraqlıdır, görəsən kimə arxalanan rektor bütün sənədləri qaydasında olan işadamına qarşı bu cür özbaşınalıq edir? Hər halda biz bu məsələnin araşdırılması istiqamətində araşdırmalarımızı davam etdirəcəyik. İndilik isə Nadir Qəhrəmanovun SDU-da həyata keçirdiyi digər özbaşınalıqların yer aldığı ikinci şikayət məktubunu diqqətinizə çatdırırıq. Məlumat üçün bildirək ki, bu şikayət qəzetimizin elektron ünvanına göndərilib və onu kiçik ixtisarla dərc edirik: “SDU bu gün sözün əsl mənasında bataqlığı xatırladır. Qəssab Nadir kimi tanınan Nadir Qəhrəmanovun namizədlik və doktorluq işini Bakı Dövlət Universitetində işləyən dayısı Sabir Hacıyevin vasitəsilə müdafiə edə bilib. Bu işdə ona bibisinin həyat yoldaşı Vladimir Tairovun da köməkliyi dəyib”.
Daha sonra Nadir Qəhrəmanovun SDU-ya necə rəhbər təyin olunmasından yazan müəlliflər şok faktlar açıqlayıblar: “Qeyd edək ki, Nadir Qəhrəmanov buna qədər BDU-da kafedra müdiri vəzifəsində çalışıb. Onun BDU-dakı qanunsuz əməllərinə görə 1999-2000-ci tədris ilində kafedra əməkdaşları rektorluğa müraciət edərək onun kafedra müdirliyindən azad olunması barədə məsələ qaldırıblar. Həmin vaxt pis vəziyyətdə qalan Nadir Qəhrəmanov Akademiyanın institutlarında iş axtarmağa başladı. O ərəfədə SDU-da maxinasiya baş verir, ondan əvvəl isə prorektor Şakir müəllimi kabinetində öldürürlər. Bütün baş verənlərin ardınca isə SDU-nun o vaxtkı rektoru Elmar Fərhadzadəni tutduğu vəzifədən azad edirlər. Yaranmış sitiuasiyadan istifadə edən qəssab Nadir isə dayısı və digər yaxın adamlarının vasitəsilə SDU-ya rektor təyin oluna bilər. Bu isə onu yaxından tanıyan təhsil ictimaiyyəti arasında əsl şok effekti yaradır. Bu vəzifəyə gələndən sonra isə Nadir Qəhrəmanov özü ilə SDU-ya müəyyən adamlar gətirir. İlk vaxtlar rüşvəti Mamed müəllim vasitəsilə alan Nadir Qəhrəmanovun sonradan onunla münasibətləri pozulur. Buna səbəb isə universitetdə baş verənlərlə bağlı mətbuatda silsilə yazılanların dərc olunması olur. Nadir isə bütün bunlara görə Mameddən şübhələnir və o pul yığımından uzaqlaşdırılır. Sonradan bu məsələ elmi iş üzrə prorektor Yadigar müəllimə həvalə olunur.
Rektorun Mamed müəllimlə münasibətləri korlanandan sonra həm ona həm də onun dostlarına qarşı hücum kampaniyası başlayır. İlkin olaraq universitetdən Mamed müəllimin dostu Rafael Qasımov uzaqlaşdırılır. Bunun ardınca isə digər şəxslərə qarşı da təzyişlər davam etdirilir. Elə həmin təzyiqlərin nəticəsi olaraq Xosrov müəllim məcbur olub işdən çıxır. Daha sonra Nadir Qəhrəmanov Mamed Zərbəliyevi məcbur edir ki, kafedra müdirliyindən istefa versin. Amma üstündən iki il keçdikdən sonra Mamed Zərbəliyev işinə bərpa oluna bilir. Bu isə belə baş verib: Mamed Zərbəliyev rektorun qəbuluna gedərək onun haqqında mətbuata material ötürənlərin adlarını deyəcəyini vəd edir. Vədini yerinə yetirdikdən sonra isə itirdiyi işini geri qaytarmağa nail olur”.
Qeyd edək ki, bunlar redaksiyamıza daxil olmuş faktların yalnız kiçik bir qismidir. Növbəti saylarımızda isə rektorun SDU-da heç bir səbəb göstərmək işdən azad etdiyi digər müəllimlərin də adlarını dərc edəcəyik. Eyni zamanda Nadir Qəhrəmanovun harada və nə məqsədlə Prezident Adminstrasiyasının rəhbəri Ramiz Mehdiyevin adından sui-istifadə etdiyini biləcəksiniz.
Orxan