Turqay Bayramovun istintaqa dedikləri ortaya ciddi suallar və sensasion təfərrüatlar çıxarır

“Monitor” jurnalının baş redaktoru Elmar Hüseynovun qətlindən 7 ilə yaxın müddət keçir. Qətlin icraçılarından ikisi - Teymuraz Əliyev və Tahir Xubanovun barəsində axtarış elan edilsə də, istintaqçılarımız bu günə kimi onların yerini müəyyən edib, tapa bilmir. Lakin bu cinayətdə rəsmən qatil elan olunanlar barədə dəfələrlə məlumatlar yayılıb, iddialar ortaya qoyulub. İndi isə Elmar Hüseynov cinayətində adları keçənlər barədə istintaq ifadələri yayılıb. İşdə cinayətkarlara telefon nömrələri aldığı iddia olunan Turqay Bayram oğlu Bayramovun ifadələri redaksiyamıza çatdırılıb. İfadədə bu günə kimi qətllə bağlı yayılan bir çox məlumatlar təsdiqini tapır. Bundan başqa, bəzi qaranlıq məqamlar da ifadədə yer alır.
Killer dəstəsi Bakıya yanvarda gəlib

Turqay BayramovT.Bayramovun ifadəsindən aydın olur ki, Elmar Hüseynovu qətlə yetirən dəstə Bakıya 2005-ci ilin yanvar ayının təxminən sonlarında gəlib. Onu dəstə üzvləri ilə xalası oğlu Teymuraz Əliyev (qətldə əsas şübhəlilərdən biri) tanış edib. Deyib ki, Bakıya “Seko” adlı dostu ilə neft almaq üçün müqavilə bağlamağa gəliblər. Onun yanında “Seko”dan başqa Tahir adında azərbaycanlı olub. Məlumat üçün deyək ki, T.Əliyevin “Seko” kimi tədqim etdiyi Davrişov Serqo adlı Gürcüstan vətəndaşıdır.
Bir daha xatirladaq ki, 2007-ci ildə beynəlxalq tədbir çərçivəsində Tiflisdə olan azərbaycanlı jurnalistlər Tahir Xubanov, Teymuraz Əliyev və Serqo Davrişovla görüşüb onlara qətllə bağlı suallar vermişdilər.
T.Bayramov ifadəsində bildirir ki, xalası oğlu (Teymuraz Əliyev) Tahir Xubanovu ona Tiflisdəki qonşusu və uzaq qohumu, “Seko”nu isə kirvəsi kimi təqdim edib. İfadədən belə məlum olur ki, Teymurazgilin ilk işi Elmar Hüseynovun yaşadığı mənzilə çox yaxın bir yerdən - Nizami rayonu, Rüstəmov küçəsindəki beş mərtəbəlı binadan ev kirayələmək olub. Sonradan məlum olacaqdı ki, mənzilin eyvanından E.Hüseynovun adəti üzrə gedib-gəldiyi yolu nəzarətdə saxlamaq mümkün olub.
T.Bayramovun ifadəsində diqqəti çəkən məqamlardan biri də Teymuraz Əliyev və “Seko”nun Bakıdakı səfirliklərdən biri ilə mütəmadi əlaqə saxlamasıdır. O da məlum olur ki, dəstə üzvləri qətlə qədər bir neçə dəfə Tiflisə gedib gəliblər: “Teymuraz və ”Seko" fevralın 2-də Tiflisə neft alveri ilə bağlı sənəd arxasınca gediblər. Guya səfırlik vasitəsilə görmək istədikləri neft alveri ilə bağlı hansısa sənədləri çatışmır. Fevralın 22-də Tahir, “Seko” və Teymuraz bazara yanıma gəldilər. Dedi ki, ona müvəqqəti istifadə etmək üçün televizor və videomaqnitofon verim, həm də futbollara baxacaq. Verdim".
Güman olunur ki, T.Əliyev televizor və videomaqnitafonu xalası oğlundan E.Hüseynovu izləyərkən lentə alınan kadrlara baxmaq üçün alıb. Ehtimalən həmin kadrlara killer dəstəsini koordinasiya edən şəxs baxıb və öz tapşırıqlarını verib. Bu məqamı dolayısı ilə təsdiqləyən məlumat T.Bayramovun ifadəsində var: “Teymurazın kirayələdiyi evə çatanda ”Seko" və həmin iki gürcü geyimli formada evdən çıxmağa hazırlaşırdılar. Onların yanında təxminən 38-40 yaşlarında dolu bədənli, orta boylu, bığsız bir şəxs də vardı. Mən onu azərbaycanlıya oxşatdım. Əynində uzun ətəkli tünd rəngi - ola bilsin ki, ya qara, ya da tünd qəhvəyi rəngli dəri kurtkası var idi".
Bu şəxsin kimliyini istintaqçıların müəyyən edib-etməməsi bəlli deyil. Ehtimal etmək olar ki, məhz bu şəxs killer dəstəsi ilə Elmar Hüseynovu izləyən dəstəni koordinasiya edib, ümumilikdə qətliamın təşkilatçısı olub.
Həmin şəxsin müəyyən edilməsi qətl sifarişçisinin kimliyi barədə də ipucular verə bilər.

İşdə adları keçən naməlumlar kimdir?

T.Bayramov ifadələrində Tahir, “Seko” “Nuqo” və adını bilmədiyi bir gürcü barədə məlumat verir, cinayətdə istifadə olunan 539-93-81 və 539-93-82 nömrələrini saxta məlumatlar verməklə almalarından danışır.
Onun “Nuqo” kimi tanıdığı şəxs Bolkvadze Nuqzar, adını bilmədiyi gürcü isə Kasiya Arçildir.
T.Bayramov deyir ki, Teymuraz, “Seko” və Tahirin öz aralarında gürcü dilində danışmalarından «aeroport», «Dubay», «İsrail», «Fransa», «Almaniya» sözlərini eşidib. Lakin gürcü dilini bilmədiyindən söhbətin nədən getdiyini anlamayıb.
İfadəsində T.Bayramov “Teymuraz rus dili qarışıq azərbaycan dilində Tahirə dedi ki, təcili aeroporta get, dostum gəlir, bəlkə günorta reysi ilə gəlir, qabağına çıx. Bir də dedi ki, o ikranın məsələsini həll et”, deyib. Görünür, T.Əliyevin dəstə üzvünə “dostum gəlir” deyəndə Elmar Hüseynovun evinə qayıtmasını nəzərdə tutub. Bu həm də qətlindən əvvəl E.Hüseynovu güdən 2-ci bir dəstənin olduğu barədə mətbuatda yazılan iddiaları təsdiqləyir.
T.Bayramov ifadəsini davam etdirərək T.Əliyevlə Tahir adlı şəxsin arasındakı dialoqdan danışır: “Tahir Teymuraza dedi ki, aeroportda trafaretə baxdım və həmin reys gəlib. İki reys kimi Tahir səhv etmirəmsə, Almaniya və İsrail dedi. Teymuraz soruşdu ki, ”bəs ikranın haqq-hesabı nə oldu?" Tahir cavab verdi ki, alınmadı. Teymuraz Sekoya rus dilində dedi ki, Tahir işi yarıtmadı, gedib özümüz öyrənək görək hansı reys hələ gəlməyib və dostumuz niyə gəlməyib, əgər gündüz reysi ilə gəlməyibsə, gedək görək bəlkə axşam reysi ilə gələcək, gəlməmişdisə də o adam zəng vurub deməliydi.
Teymuraz və Seko təzə aldığımız nömrələrdən birinin quraşdırıldığı “Samsunq” markalı telefonu götürüb aeroporta yola düşdülər".
Bu dialoqdan belə təxmin etmək olar ki, aeroport deyəndə dəstə üzvləri E.Hüseynovun yaşadığı mənzili və mənzilin yerləşdiyi binanın ətrafını nəzərdə tutublar.
“Gəlməmişdisə də o adam zəng vurub deməliydi”, sözü də E.Hüseynovu güdən dəstəyə işarədir. Yəni E.Hüseynovun mənzilinə gəlməsini həmin dəstədən kimsə zəng edib killer dəstəsinə məlumat verməli idi. Digər diqqəti çəkən məqam isə T.Əliyevin rus, gürcü, kürd, erməni dillərini bilməsi ilə bağlıdır. Qeyd edək ki, bir neçə gün əvvəl cinayətdə iştirak etmiş Sekonun milliyyətcə erməni olması ilə bağlı məlumatlar dərc etmişdik. Bu həm də killer dəstəsinin transmilli cinayətkar qruplaşmalarla sıx ünsiyyətdə olmasından xəbər verən məqamlardandır.

Qətl fevralın 28-də olmalıymış?

T.Bayramov dəstə üzvlərinin 2005-ci ilin fevral ayının 28-də Gürcüstana qayıtması ilə bağlı məlumat verib: “Teymuraz zəng vurdu və dedi ki, axşam zəng gəlib və ona dostunun atasının Gürcüstanda vəfat etməsini xəbər veriblər, ona görə də ola bilər ki, cənazə yerdən götürülməmiş bu gün çıxıb gedə bilərlər, bu səbəbdən də televizoru, vıdeomaqnitafonu və kaseti ondan götürüm. Yasa onların hamısının gedəcəyini soruşdum. Dedi ki, əgər getməli olsalar, Seko ilə o ikisi birlikdə gedəcəklər”.
Görünür, qətl fevralın 28-də həyata keçirilməliymiş. Hansısa səbəbdən həmin gün baş tutmayıb. Tamamilə mümkündür ki, həmin gün Elmar Hüseynov evinə gedərkən blokda kimsə olub və bu səbəbdən qətl törədilməyib.
Xatırladaq ki, “Monitor”un baş redaktorunun qətlində iştirak edənlərdən Teymuraz Adil oğlu Əliyev 16 noyabr 1962-ci ildə Gürcüstanın Tiflis şəhərində anadan olub. Tiflisdə 63 saylı orta məktəbi bitirib. Bu məktəbdə dərslər rus dilində keçirilib. Qətldə adı keçən digər 3 noyabr 1959-cu il təvəllüdlü Gürcüstan sakini Tahir Bayram oğlu Xubanov da Tiflisdə anadan olub.
Hər iki şəxs barəsində Elmar Hüseynovun qətlindən 5 ay sonra - 10 iyul 2005-ci ildə Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) və 277-ci (dövlət xadiminin və ya ictimai xadimin həyatına sui-qəsd etmə, terror aktı) maddəsi ilə, elə həmin gün Teymuraz Əliyev barəsində eyni maddələr və əlavə olaraq 32.5-ci maddə ilə axtarış elan olunub. Bu günə kimi istintaq orqanı onları bu və ya digər səbəbdən həbs etməyib.

E.HÜSEYNOV