Nadir İsrafilov: “Bayram Hüseynzadənin “xidməti” sayəsində “Azərbaycan müəllimi” bu gün köşklərdə yoxdur”

Məlumata görə yeni nazir Mikayıl Cabbarovun qərarı ilə Təhsil Nazirliyinin orqanı olan həftəlik “Azərbaycan müəllimi” qəzetində dəyişikliklərə başlanılıb. Belə ki, qəzetin həcmi artırılaraq 8 səhifədən 12 səhifəyə qaldırılıb. Bu addım ölkə təhsilindəki yeniliklərin geniş əhatə olunması zərurətindən atılıb. Başqa bir dəyişikliksə qəzetin dili ilə bağlıdır. Bundan sonra qəzet əksər mətbu orqanların istifadə etdiyi yazı üslubunda yox, rəsmi qəzet dilində buraxılacaq. Xatırladırıq ki, qəzetin 3 may tarixli sonuncu buraxılışı məhz bu dəyişikliklərlə çap edilib.
Məsələyə təhsil eksperti Nadir İsrafilovun münasibətini öyrəndik. O, bunları dedi: “Əslində belə bir addım çoxdan atılmalı idi. Çünki “Azərbaycan müəllimi” kimi, tarixi ənənələri olan qəzeti Bayram Hüseynzadə adlı birisi uzun müddətdir, sanki öz “şəxsi qəzet”inə çevirmişdi. Nə istəyirdisə, onu da edirdi, qəzet vasitəsi ilə şeytanın ağlına gəlməyən işlər görürdü. O, qəzetə rəhbər gələn kimi, redaksiyanın bir çox təcrübəli işçilərini pərən-pərən saldı, hərəni bir yolla işdən çıxardı. Qəzetdə Azərbaycan təhsilinin dərd-səri ilə əlaqəsi olmayan palaz-palaz tərcümə yazılar dərc olunmağa başladı. Dünyanın müxtəlif ali məktəbləri, Nobel mükafatı laureatları haqqında bəzən 5-6 səhifəlik materiallar verilirdi. Halbuki bunların hamısı internetdə və ayrı-ayrı ensiklopediyalarda var. Gərək olardısa, onları müəllim istədiyi vaxt həmin mənbələrdən asanlıqla əldə edə bilərdi. Qəzetin bütün nömrələrinin sonuncu səhifəsinin yarıdan çoxunu “Xalq kompüteri”nin reklamı tuturdu. Bu reklamın təkrar-təkrar verilməsi nəyə gərək idi? Düşündürücüdür, belə şeylərin arxasında nələr dayanır?!
Bayram Hüseynzadənin “xidməti” sayəsində “Azərbaycan müəllimi” bu gün köşklərdə yoxdur, onu ancaq və ancaq abunə yolu əldə etmək mümkündür. Belə çıxır ki, qəzetin hansısa bir nömrəsi sənə lazımdırsa, ya abunəçi olmalısan, ya da onu əldə etmək üçün yollar axtarmalısan. 10000-dən artıq tirajı olan bu qəzetin bir nüsxəsinin abunə qiyməti 1 manatdır (?!). Hüseynzadə ölkədə bu qiymətə satılan ikinci bir qəzet göstərə bilərmi? Yəni, müəllim o qədərmi böyük maaş alır ki, bir qəzetə 1 manat pul versin?!
Tirajı “artırmaq” məqsədi ilə qəzetdə verilən yazılar açıq-açığına şantaj təsiri bağışlayır. Belə ki, bəzən onun səhifələrində abunəçilərin sayı az olan rayonların siyahısı dərc edilir, onlardan abunənin sayını artırmaları tələb olunurdu. Bunu edənlər anlamırlar ki, qəzetin tirajını nazirliyin administrativ rıçaqlarının köməyi ilə, hədə-qorxu ilə yox, materialların keyfiyyətini yaxşılaşdırmaq, onu oxunaqlı etmək yolu ilə artırmaq olar. Görünən odur ki, bu məsələdə redaktor Hüseynzadənin eyni zamanda (?!) nazirlikdə şöbə müdiri işləməsi də böyük rol oynayır. Bununsa bircə adı var: qəzetin rəhbərliyi dövrün tələblərinə uyğun normal qəzet çıxarmaqda acizdir!
Mətbuatın yazdığına görə, Hüseynzadənin supermarketləri, geniş apteklər şəbəkəsi və altında bahalı CİP-i var. Hətta buna irad bildirən kasıb həmkarlarına o, vaxtilə “kişinin altında maşını olar!” da demişdi...
Bilmirəm, bəlkə də Hüseynzadənin biznes sahəsində işi daha müvəffəqiyyətlidir, amma onun “Azərbaycan müəllimi” qəzetinin redaktoru kimi müvəffəqiyyətsiz olması ən az 200 min müəllimin gözü önündədir