Şəhid Fikrət Bəşirov dünən Astarada dəfn olunub.
Dəfn mərasimində rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin əməkdaşları, yerli hüquq-mühafizə orqanlarının rəhbərliyi, rayon ictimaiyyətinin nümayəndələri, hərbçilər iştirak ediblər.
Şəhid Astaranın Şahağacı kənd qəbiristanlığında yayılım atəşi ilə son mənzilə yola salınıb Qeyd edək ki, F. Bəşirov müddətdən artıq hərbi qulluqçudur.
Onun qız övladı beş gün əvvəl dünyaya göz açıb.



Azərbaycan Müdafiə Nazirliyi təmas xəttində baş vermiş insident barədə məlumat yayıb. Məlumatda deyilir:
Dağlıq Qarabağda ermənilər tərəfindən mövqelərimizin atəşə tutulmasına qarşı cavab tədbirləri görülərkən düşmən atəşindən Silahlı Qüvvələrimizin hərbi qulluqçusu Bəşirov Fikrət Nurşiravan oğlu şəhid olub.
Ermənilərin növbəti təxribatı nəticəsində şəhid olan hərbi qulluqçu Müdafiə naziri general-polkovnik Zakir Həsənovun əmrinə əsasən ölümündən sonra "Hərbi xidmətdə fərqlənməyə görə" 3-cü dərəcəli medalla təltif olunub.
Müdafiə Nazirliyinin rəhbərliyi şəhidin yaxınlarına, əzizlərinə dərin hüznlə baş sağlığı verir və səbr diləyir.
İnsidentin nə vaxt və təmas xəttinin hansı sahəsində baş verdiyi göstərilmir. Habelə hərbi qulluqçumuzun vurulmasına cavab olaraq düşmənə qarşı qisas tədbirlərinin görüldüyü barədə məlumat yoxdur.