Şikayət vermə müddəti başa çatmamış qərar qəbul edən hakim Ramil Həsənov isə, növbəti dəfə hakim adına xələl gətirən özbaşınalığa əl atıb
“Rəvan Sığorta” ASC–nin törəməsi olduğu bildirilən “Nurgin Motors”da 10 min manatlıq saxta akt tərtib edib, xaricdə müalicəyə ehtiyacı olan, ağ ciyərinin üçdən iki hissəsini apardığı Qarabağ əlili Xaliq Abbaszadədən dələduzluq yolu ilə sığorta ödənişi tələb olunması məsələsi, heç də gündəmdən düşmür. Fikir verin ki, yararsız hala salınan da, cəzalanan da, dövlətin sığortaladığı Qarabağ əlilinə “Rəvan Sığorta” şirkətinin sifarişilə məhkəmə hakimiyyəti, 10 min manata yaxın cərimə yazıb “get,özünü yandır” deyir !(??) Artıq Qarabağ əlili “dövlət qayğısı”ndan əlavə başqa bir xəstəliyə, yəni şəkər xəstəliyinə də yoluxub. Hər üç aydan bir Qarabağda aldığı yaralardan əməliyyat olunmağa məcbur olan Qarabağ əlilinə yardım etmək əvəzinə “Rəvan Sığorta” şirkəti, əlilin dərman puluna göz dikib. Kim nə deyər belə qeyrətə ? Özü də Qarabağ əlilinə aid olmayan reabilitasiya vasitəsinin məhv olunmasına görə ! Bəs məhkəmə hakimi bunu niyə görməzliyə vurur? Dillər əzbəri olan gülməcədə deyildiyi kimi, hakimlər niyə “ayıya əmoğluluq” edirlər? Baxın, Nərimanov rayon Məhkəməsinin (hakim Ramin Quliyev) eyni tərəflər arasında, eyni predmet və əsaslar üzrə qanuni qüvvəyə minmiş 18.11.2015 tarixli qətnaməsi olduğu halda, Sabunçu rayon Məhkəməsi “Rəvan Sığorta”nın şəhidə və əlilə qarşı saxta iddiasını icraata götürüb. Gerçəkdə saxta iddiaçını cəzalandırmaq əvəzinə, cavabdehin ölməsini “əsas tutub” aidiyyəti üzrə Suraxanı rayon Məhkəməsinə dəyişən hakim İmran Burcayevin 10.02.2016 tarixli qərardadından şikayət vermə müddəti başa çatmamış, Suraxanı rayon Məhkəməsinin hakimi Ramil Həsənov işi icraata götürüb !(??) Nə qədər zavallı əlil olaya və maşına bağlı olmadığını, tərəfin ölməsilə icraata xitam verilməli olduğunu, tərəflər arasında eyni predmet və əsaslar üzrə məhkəmənin qanuni qüvvəsini almış qətnaməsi olduğunu yazılı şəkildə bildirsə də, qarşılıqlı iddia, vəsatətlər versə də, hakimlər özlərini “karlığa–korluğa qoyurlar.
28.11.2016- cı ildə Ramil Həsənov Qarabağ əlilini hazırlıq iclasına çağırıb və iclassız cərimə edildiyini bildirərək “get, özünü yandır” qərarını verib”. Bu “yandırma qərarı”nı icra etməyə isə. Bakı şəhər İcra Hakimiyyətinin başçısı, professor Hacıbala Abutalıbov polisə göstəriş verməklə mane olub. Hələ də 28.11.2016 tarixli akt Qarabağ əlilinə verilməyib. Bakı Apellyasiya Məhkəməsi isə, 12.01.2017 tarixdə elektron poçtla apellyasiya instansiyasının 18.08.2016 tarixli qərardadını əlilə göndərib və qarşlıqlı iddiaçı, ilkin iddia üzrə cavabdeh Qarabağ əlili, bu qərardaddan kassasiya şikayətini Ali Məhkəməyə göndərib. Bu isə o deməkdir ki, Suraxanı rayon Məhkəməsinin 28.11.2016 tarixli aktı “avtomatik” etibarsız, hüquqi qüvvəsi olmayan kağız parçasıdır, yalnız “özünü yandırma” qərarına yardımçı ola bilər. Şikayət vermə müddəti başa çatmamış qərar qəbul edən hakim Ramil Həsənov isə, növbəti dəfə hakim adına xələl gətirən özbaşınalığa əl atıb. Suraxanı rayon Məhkəməsinə elektron poçtla 28.11.2016 tarixli aktdan şikayət verən Xaliq Abbaszadənin telefonuna sözügedən rayon məhkəməsinin icra məmuru Vüsal Əliyevin (070)571-78-78 nömrəsindən zəng edilərək, “Rəvan Sığorta”ya olan borcu ödəmək tələb olunub. Axı, məhkəmə qərarı qanuni qüvvəyə minməyib! İcra məmuru öncə məhkəmədən əlilə verilməyən qərarı alıb verəcəyini, əlilin icra sənədini göndərmə tələbindən sonra isə telefonla bildiriş (??) etdiyini deyib. Özbaşınalığa fikir verin, məhkəmə əlilə qərarını vermədən, qərardan şikayət vermə müddəti bitməmiş saxta aktını icraya yönəldib?! (??) Hər halda icra məmuru Vüsal Əliyevin zəngindən belə anlaşılır.
Məhkəmənin “get,özünü yandır” “qayğısı” ilə qarşılaşan əlilin, Ədliyyə Nazirliyinə, Məhkəmə-Hüquq Şurasına, Ombudsmana və s. Ünvanlana şikayətlərinə də “məhkəmənin işinə qarışa bilməmə” adıyla baxılmır. Bəyəm, “özünü yandırma qərarı” məhkəmə işidir? Bəs onda Ombudsman kimə müvəkkilik edir, Məhkəmə-Hüquq Şurası nəyə lazımdır? Büdcədən adı çəkilən qurumların maliyyələşməsi məntiqə sığırmı?

Məğrur