İcra başçısının müavini: “Akif Çovdarovun adını hallandırmamışam, onun adı ilə heç kimi qorxutmamışam”

Bələdiyyə sədri: “İcra başçısının müavini bizi hədələdi”

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir.

Proses Bakı Hərbi Məhkəməsinin hakimi Həbib Həsənovun sədrliyi ilə keçirilir. Təhlükəsizlik tədbirləri ilə bağlı cinayət işinə hərbi məhkəmənin binasında yox, Sabunçu rayon Məhkəməsinin inzibati binasında baxılır.

Proses başlanan kimi Akif Çovdarov arayış verib: “Bundan əvvəlki iclasda mən müstəntiq Emil Qəhrəmanovun epizodlardan birini cinayət işinə daxil etməməsi üçün məndən 100 min manat istəməsini demişdim. Bu söhbət vəkilimin iştirakı ilə olub, amma bir məsələ var. Mənim heç vaxt sıravi əməkdaşlarla işim olmayıb. Təbii ki, Ağır Cinayətlərə Dair İşlər üzrə istintaq İdarəsinin rəisi Eldar Əhmədovun xəbəri olmasaydı, müstəntiq mənimlə bu barədə danışmazdı. Sadəcə olaraq, istədim ki, bunu biləsiniz. Onsuz da onların hamısı gəlib burada ifadə verəcəklər. Onlar burada olanda mən hər şeyi açıb deyəcəyəm. Kimin əsl rüşvətxor, korrupsioner olduğunu hamı biləcək”.

Akif Çovdarovun istəyi niyə yerinə yetirilmir?

Daha sonra Akif Çovdarovun vəkillərindən biri Sadiq Rəsulov vəsatətlə çıxış edib. Vəkil qeyd edib ki, müvəkkilinin kardioloji xəstəlikləri ilə əlaqədar müayinə edilməsinə şəraitin yaradılmalıdır: “Belə ki, Kardiologiya İnstitutunun əməkdaşları, bu tibb müəssisəsi dövlətə tabe olduğu üçün, məsələnin müvafiq instansiyalarda həll edilməsindən sonra təcridxanaya həkim göndərə biləcəklərini bildirirlər. Bu səbəbdən də “MediClub” özəl tibb müəssisəsi ilə danışıqlar aparıb, müayinə üçün lazım olan vəsaiti də təqsirləndirilənin hesabına ödədik. Lakin təcridxananın rəhbərliyi kənar tibb işçilərinin daxil olması üçün məhkəmənin müvafiq qərarının olmasını tələb edirlər”.

Dövlət ittihamçısı təqsirləndirilənin müayinə edilməsinin onun konstitusion hüququ olduğunu deyib. O, vəsatətin təmin edilməsinə etiraz etməyib. Məhkəmə isə vəsatəti təmin etməyib.

Sonra Kürdəmir rayonunda yerləşən “Xatirə” restoranın sahibinə qarşı edilən qanunsuz hərəkətlərlə bağlı dinləmə olub. Məlumat üçün bildirək ki, Kürdəmir rayon Mollakənd sakini Şehman İmanova məxsus “Xatirə” restoranı Akif Çovdarov və adamları tərəfindən zorla ələ keçirilib.

Kürdəmir rayon sabiq icra hakiminin aqrar məsələlər üzrə müavini olmuş Əşrəf Şükürov ifadə verib. O, ifadəsində istintaqa ifadəni təsdiqləyib.

Kürdəmirdəki torpaq sahələrinin ələ keçirilməsi

Əşrəf Şükürovun sözlərinə görə, 1975-ci ildə Azərbaycan Kənd Təsərrüfatı İnstitutunun aqronomluq fakultəsini bitirib, ali təhsil

aldıqdan sonra müxtəlif qurumlarda müvafiq vəzifələrdə çalışıb: “1999-cu ildən 2015-ci ilin mart ayına kimi Kürdəmir rayon İcra Hakimiyyətinin aqrar məsələləri üzrə başçısının müavini vəzifəsində işləmişəm. 1985-ci ilin aprel ayının əvvəllərində Girdiman çayında suyun səviyyəsi həddən artıq qalxması nəticəsində Kürdəmir rayonunun Ərşəli kəndi su basıb. Bu səbəbdən həmin kənddə bir dənə də ev salamat qalmayıb, yeni salınmış kənd 12 kilometr yuxarı Karrar kənd ərazisinə köçürülüb. Həmin dövrdə kənd camaatı həm əkin, həm də örüş üçün həmin dövrdə fəaliyyət göstərən Axundov adına kolxozun torpaqlarından istifadə edirdi. 1996-cı ildən etibarən respublikada həyata keçirilmiş torpaq islahatı zamanı Axundov adına kolxozun torpaqlarından, həmçinin Ərşəli kənd camaatına da torpaq payı verilib. Həmin dövrdə bələdiyyə mülkiyyətinə aid olan təxminən 30 hektara yaxın əkinə yararlı olmayan torpaq sahəsi örüş üçün Ərşəli kənd camaatına ayrılıb. Həmin örüş sahələri kəndin ətrafında yerləşirdi”.

“Sərəncamın icrası mənə tapşırılmışdı”

Əşrəf Şükürov qeyd edib ki, 2006-cı ilin dekabr ayının axırlarında “RAF-2006” MMC-nin rəhbərliyi Kürdəmir rayon İcra Hakimiyyəti Başçısına müraciət edərək kənd təsərrüfatı məhsulları istehsalı məqsədilə dövlət fondu torpaqlarından cəmiyyətin uzunmüddətli istifadəsinə 100 hektar torpaq sahəsi ayrılmasını xahiş edib: “Müraciətlə əlaqədar mütəxəssis komissiyası rayonun ərazisindəki dövlət fondu torpaqlarına baxış keçirdi. Kənd təsərrüfatı məhsulları istehsalı məqsədilə “RAF-2006” MMC-nin uzunmüddətli istifadəsinə “Ərşəli yeri” adlanan dövlət fondu

torpaqlarından 100 hektar sahənin icarəyə verilməsini məqsədəmüvafiq hesab etdi. Bununla əlaqədar Kürdəmir rayon İcra Hakimiyyəti başçısı Fəxrəddin Məlikov tərəfindən sərəncam verildi. Sərəncama əsasən Kürdəmir rayon İcra Hakimiyyəti tərəfindən “RAF-2006” MMC ilə icarə müqaviləsinin bağlanması mənə həvalə edildi. Sərəncamın icrasına nəzarət mənə tapşırıldı. Qanunamüvafiq qaydada torpaq sahəsinin uzunmüddətli istifadəyə verilməsi ilə bağlı həmin cəmiyyətlə müqavilə bağlanıldı, 60 hektara yaxın torpaq sahəsində nar ağacları əkildi, həmin torpaq sahəsi hazırda da istifadə edilirdi”.

Əşrəf Şükürov bildirib ki, 2013-cü ildə həmin torpaq sahəsi notariat yolu ilə “RAF-2006” MMC tərəfindən Bakı şəhər sakini Həsən Şərifovun istifadəsinə verilib.

“Akif Çovdarovun adını hallandırmamışam”

Əşrəf Şükürov həmçinin ifadəsində “RAF-2006” MMC-nin sahibi və təsisçisinin kim olduğunu bilmədiyini deyib: “Həmin cəmiyyətin yalnız sədri Ramiz Əfəndiyevi tanıyırdım. “Ərşəli yeri” adlanan torpaq sahəsi rayonun Ərşəli kəndindən təxminən 2-3 kilometr məsafədə yerləşir. Ərşəli kənd camaatın mal-qarası otlamaq üçün örüş sahəsi kimi 100 hektar torpaq sahəsinin “Ərşəli yeri” adlanan torpaq sahəsinin olduğunu dəqiq bilməmişəm. MTN-nin yüksək rəhbər vəzifədə olan Akif Çovdarov adlı şəxsin olduğunu yalnız respublikada rezonans yaratmış baş vermiş hadisələrdən sonra bilmişəm. Heç vaxt Mətləb Rzayevə Akif Çovdarovun adını hallandırmamışam. Onun adı ilə heç kimi qorxutmamışam, heç vaxt Mətləb Rzayevdən qardaşı Rzayev Yaşar Söydümalı oğluna müvəqqəti istifadə üçün verilmiş 60

hektar torpaq sahəsindən imtina edilməsi ilə bağlı ərizə yazmağa məcbur etməmişəm”.

“Örüş sahəsinin Akif Çovdarova icarəyə verilməsini dedi”

Sonra şahid qismində dindirilən Mətləb Rzayev bildirib ki, 1985-ci ilin aprel ayında Kürdəmir rayonunun ərazisindən 100 hektar sahə Ağsu rayonuna qışlaq kimi verilib: “1996-cı ildə torpaq islahatı zamanı həmin sahə Kürdəmir rayonu Ərşəli kənd camaatına örüş kimi ayrılıb, 2003-cü ilin əvvəllərində kənd bələdiyyəsinin sədri olarkən, həmin örüşdən 60 hektar sahə müvəqqəti istifadə üçün qardaşım Yaşar Rzayevə verilib”.

Mətləb Rzayevin sözlərinə görə, 2006-cı ilin payızında Kürdəmir rayon İcra Hakimiyyəti başçısının aqrar məsələlər üzrə müavini Əşrəf Şükürov 22 dekabr 2006-cı il tarixli sərəncamla həmin 100 hektarlıq örüş sahəsinin MTN-də yüksək rəhbər vəzifədə olan Akif Çovdarova məxsus “RAF-2006” MMC-nə icarəyə verilməsini deyib: “Bu səbəbdən qardaşıma verilmiş sahədən imtina etməyi, əks halda böyük problemlərlə rastlaşacağımızı bildirdi. Kənd camaatının çoxsaylı şikayətlərindən sonra örüş üçün yararsız yerdən 50 hektar sahə ayrıldı”.

“Heç kimin yolunu bağlamamışıq”

Daha sonra şahid qismində ifadə verən “RAF-2006” MMC-nin direktoru, Akif Çovdarovun uşaqlıq dostu Fəttah Seyidov bildirib ki, təqaüdə çıxdıqdan sonra Kürdəmir rayonunda kənd təsərrüfatı ilə məşğul olmağa qərar verib: “Bu məqsədlə İqtisadi İnkişaf Nazirliyindən götürdüyüm kreditin və şəxsi vəsaitinin hesabına

Kürdəmirdə balıqçılıq təsərrüfatı və nar bağı, eyni zamanda, Göyçay rayonunda nar bağı saldım”.

Fəttah Seyidov zərərçəkmiş Şehman İmanovun verdiyi ifadənin əsassız olduğunu deyib: “Biz heç kimin yolunu bağlamamışıq və heç belə fikrimiz də olmayıb. Minlərlə nar ağacı şitili əkmişdik, mal-qaranın onları məhv etməməsi üçün tor məftil hasar çəkdik və cəftəli bir qapı qoyduq. İstənilən adam həmin cəftəni açıb içəri girə bilərdi, çünki biz balıq satırıq-alıcıların üzünə qapını bağlaya bilmərik ki?”

Şahid onu da məhkəmənin diqqətinə çatdırıb ki, “Xatirə” yeməkxanası 1993-cü ildən sonra fəaliyyət göstərməyib və onun fəaliyyəti ilə bağlı heç bir sübut yoxdur.

Aslan