Bakı-Sumqayıt-Bakı marşrutu ilə hərəkət edən elektrik qatarlarında gediş tariflərində dəyişiklik edilib. Yeni, bahalaşmış tariflər bu gün martın 3-dən etibarən qüvvəyə minəcək.
Bu haqda “Azərbaycan Dəmir Yolları” Qapalı Səhmdar Cəmiyyəti xəbər verib.
Xəbərdə bildirilir ki, tariflərin dəyişdirilməsi xidmət xərclərinin balanslaşdırılması ilə bağlıdır.
Yeni tariflərə görə, gediş haqları 10 qəpikdən 40 qəpiyə kimi artırılıb.
Bakı-Sumqayıt marşrutu üzrə ekonom klasda gediş haqqı 80 qəpikdən 1 manata, biznes klas qiyməti isə 1.20 manatdan 1,60 manata qaldırılıb.
Bakı-Biləcəri marşrutu üzrə ekonom klasda gediş haqqı 30 qəpikdən 40 qəpiyə, biznes klas qiyməti isə 80 qəpikdən 1.20 manata qaldırılıb.
Bakı-Xırdalan, Biləcəri-Xırdalan, Biləcəri-Sumqayıt, Xırdalan-Sumqayıt marşrutları üzrə gediş haqları da klaslar üzrə 10 qəpikdən 40 qəpiyə kimi bahalanıb.