O, hələ də günahsız yerə həbsdə saxlanılır

Bu ilin yanvarında Azərbaycan Hərbi Məhkəməsi Prezident yanında Xüsusi Dövlət Mühafizə Xidmətinin (XDMX) keçmiş baş leytenantı Asif Lətifova 6 il müddətinə azadlıqdan məhrumetmə cəzası verdi. Hal-hazırda Asif Lətifov cəzasını çəkir.
Qeyd edək ki, onun həbsi birdən-birə baş vermədi. Baş leytenant Asif Lətifov məhz uzun müddət üzləşdiyi haqsızlıq və ədalətsizliklərlə razılaşmadığı, özünün və hərbçi yoldaşlarının haqqını müdafiə etmək üçün mübarizə apardığına görə həbs edildi.
Asif Lətifovun anası Gülnaz Lətifova da bildirir ki, oğlu XDMX-nın rəisi Vaqif Axundovun sifarişi ilə həbs edilib. "Gündəm Xəbər" qəzeti olaraq bu mövzunu ilk dəfə biz işıqlandırmışıq. Son iki il ərzində bu məsələ ilə bağlı proseslər daim diqqətimizdə olub. Bu baxımdan baş verənlərin xronologiyasına diqqət yetirmək kifayətdir ki, Asif Lətifovun günahsız yerə həbs olunduğu bir daha aydın olsun.
Hər şey baş leytenantın qanunsuz olaraq XDMX-dan uzaqlaşdırılmasından başladı. Bununla barışmayan Asif Lətifov öz hüquqları uğrunda hüquqi müstəvidə mübarizəyə başladı. XDMX-da 17 il qulluq edən, dəfələrlə dövlət mükafatları ilə təltif edilən, müsbət xarakterizə olunan Asif Lətifov nəyə etiraz edirdi?
Onun bildirdiyinə görə, hər şey qulluq etdiyi “Betta” dəstəsinə Fikrət Rzayevin komandir gəlməsindən sonra başlayıb. Asif Lətofovun öncə işdən çıxarılmasına, sonra həbsinə səbəb bir ədəd patronun itməsi olub. Belə ki, 2001-ci il martın 5-də Emin Ələkbərov adlı mühafizəçi patronu itirib. Martın 6-na keçən gecə Asif Lətifov patronu tapıb. Ziddiyyətdə olduğu üçün patronu dəstə komandirinə - Fikrət Rzyaevə deyil, müffətişliyə təqdim edib. 4 gündən sonra o, Mülki Məcəllənin 156-cı (xidməti uyğunsuzluq) maddəsilə işdən azad edilib. İşdən azad edildikdən təqribən bir ay sonra xidmətin rəhbəriVaqif Axundovun qəbulunda olsa da, müsbət heç nə baş verməyib. 2012-ci ilin yayından, hadisənin üstündən bir il üç ay keçdikdən sonra A.Lətifov məsələni mətbuat vasitəsilə ictimailəşdirdikdən, xidmət rəhbərliyini tənqidlərə məruz qoyduqdan sonra ona qarşı cinayət işinə start verilib. Öncə ölkə prokurorluğu A.Lətifova qarşı Cinayət Məcəlləsinin 228-ci (qanunsuz silah-sursat saxlamaq) və 232-ci (səlahiyyət həddini aşmaq) maddələrilə cinayət işi başlayıb. Daha sonra iş hərbi prokurorluğa verilib. Hərbi prokurorluq isə, yuxarıda qey etdiyimiz kimi, bu il yanvarın 29-da A.Lətivoun 6 il müddətinə azadlqıdan məhrum edilməsi haqda qərar çıxarıb.
Maraqlıdır ki, patronu itirən E.Ələkbərov heç bir cəza almayıb, A.Lətifov isə patronu oğurlamaqda ittiham edilib. Əvvəlcə hər iki mühafizəçinin işi bir cinayət işində olsa da, sonradan E.Ələkbərovun işi ayrılıb. Məhkəmə prosesində şahidlərdən kimsə A.Lətifovun patronu oğurlamasını gördüyünü deməyib. Kimdənsə eşitdiklərini mülahizələrə görə səsləndiriblər.
Bəs Fikrət Rzayevlə Asif Lətifov arasında ziddiyyətlər haradan qaynaqlanır? Asif Lətifovla XDMX rəhbərliyi arasındakı yaranmış problemin kökünə diqqət edəndə aydın olur ki, baş leytenant qurumda korrupsiya faktlarının üstünü açdığı üçün hədəfə gəlib.Asif Lətifovla onun komandiri Fikrət Rzayevin arasında problemin kökündə şəxsi məsələ dayanır. Fikrət Rzayev hər fürsətdə Asif Lətifovu işdən çıxarmaq istəyirmiş. Bundan başqa Asif Lətifovun sözlərinə görə, Fikrət Rzayev hər ay işçilərin maaşından 30 manat pul tuturmuş. Həmçinin tədbirlərdə işçilər üçün nəzərdə tutulan ”konvert”ləri onlara vermirmiş. Bəylər Əyyubovun yaxın qohumu olan Fikrət Rzayev Asif Lətifovun bütün bunlara etiraz etməsinə dözə bilməyib və himayədarları vasitəsilə onun işdən çıxarılmasına nail olub.
Asif Lətifovu işdən çıxarmaq üçün ona qarşı çalışdığı qurumda təzyiqlər başlanılıb. Lətifova qarşı ən absurd ittihamlar irəli sürülüb. Məsələn, Asif Lətifov Milli Təhlükəsizlik Nazirliyi ilə əməkdaşlıq etməkdə günahlandırılıb. Sanki Asif Lətifov hansısa ölkənin xarici kəşfiyyatı orqanı ilə işbirliyində olub. Daha sonra Asif Lətifov qeyri-qanuni olaraq xidməti uyğunsuzluq maddəsilə işdən çıxarılıb. O, hüquqları uğrunda mübarizəyə başladıqdan sonra təzyiqlər daha şiddətli xarakter alıb. Iş vaxtı travma almasına rəğmən Asif Lətifova əlillik dərəcəsi verilməməsi, ona çatacaq sığorta pulunu verməkdən imtina edilməsi və s. bu kimi faktları nümunə göstərmək olar. Asif Lətifovla bağlı məsələ ictimailəşəndən sonra bəzi problemlər həll olunub. Məsələn o, məhkəmə yolu ilə də olsa, sığorta pulunu ala bilib.
Asif Lətifova qarşı ən güclü təzyiqlər isə o, Xüsusi Dövlət Mühafizə Xidmətində baş verən qanunsuzluqlarla bağlı mətbuata ardıcıl və geniş açıqlamalar verdikdən sonra başlayıb. Baş leytenanat buradakı korrupsiya faktları, özbaşınalıq və mənfi təzahürlər barədə zaman-zaman mətbuat konfransları da keçirib.
A.Lətifov həmçinin XDMX-də qohumbazlıq və yerlibazlığın geniş yayıldığı, aparıcı vəzifələrdə bu xidmətin rəisi Vaqif Axundovun qohumlarının yerləşdirildiyini açıqlayıb. O, deyib ki, burada vəzifə yüksəldilməsi rüşvətlə həyata keçirilir. Zabit “xidmətə uyğun olmamaq” ittihamı ilə işdən çıxarılması haqqında əmrin ləğvi məqsədilə məhkəmə iddiası verdikdən sonra A.Lətifovun atasını telefonla hədələməyə başlayıblar. Polis zəng edən şəxsin kimliyini müəyyən edib, lakin onun “nömrəni səhv yığdığını” bildirib.
Asif Lətifov həbsindən əvvəl XDMX-də baş vermiş bir “çp”-ni də diqqətə çatdırıb. Bu, DIN-in sabiq əməliyyat müvəkkili, adam oğurluğu və başqa ağır cinayətlərdə təqsirli bilinərək ömürlük azadlıqdan məhrum edilən Hacı Məmmədov barədədir. Baş leytenant bildirib ki, Hacı Məmmədova məxsus axtarışda olan “Mercedes 600” markalı avtomobil XDMX-də tapılıb: ”Hacı Məmmədov həmin avtomobillə bir çox cinayətlər törədib. Ona görə də “Qara Kəmər” əməliyyatından sonra bu maşın axtarışa verilmişdi.Sən demə, həmin avtomobil bizim zabitlərdən birində imiş.Bəzi səbəblərdən həmin zabitin adını çəkmək istəmirəm.Yalnız onu deyə bilərəm ki, həmin zabit ölkə başçısının şəxsi mühafizəsində çalışırdı. Bu fakt mühafizə xidmətində nələrin baş verdiyini təsəvvür etmək üçün kifayət deyilmi?”.
Beləliklə, XDMX-da baş verən korrupsiya və digər mənfi halları gün işığına çıxaran Asif Lətifov qurumun rəhbərliyinin qəzəbini daha da artırıb.Onun zərəsizləşdirilməsi üçün plan qurulub.Bu planın necə həyata keçirildiyi də bəllidir.Məhkəmə “yuxarı”dan gələn sifarişlə Asif Lətifovu azadlıqdan məhrum edib. Çünki generalların onu susdurmaq üçün başqa yolu qalmamışdı…
Şakir