XDMX-nin sabiq əməkdaşı Asif Lətifovla bağlı məsələ
beynəlxalq təşkilatların da diqqətinə çatdırılacaq

"Mənim oğlum Xüsusi Dövlət Mühafizə Xidmətinin rəhbəri Vaqif Axundovun sifarişi ilə həbs edilib". Bu sözləri Xüsusi Dövlət Mühafizə Xidmətinin (XDMX) sabiq əməkdaşı, baş leytenant Asif Lətifovun anası Gülnaz Lətifova dünən Reportyorların Azadlığı və Təhlükəsizliyi İnstitutunun ofisində keçirdiyi mətbuat konfransında deyib. Asif Lətifovun qondarma ittihamlarla həbs edlidiyini deyən Gülnaz Lətifova bildirib ki, Hərbi Məhkəmə də oğlu barəsində sifarişli hökm çıxarıb: "Oğlumun heç bir təqsiri olmadan ona 5 il 6 ay iş veriblər. Asif 17 il "Betta" dəstəsində xidmət edib. Bu müddət ərzində dəfələrlə mükafatlara layiq görülüb. Lakin komandiri Fikrət Rzayevin qanunsuz əməllərinə etiraz etdiyinə hədəfə gəlib. Fikrət Rzayev hər ay əməkdaşlardan 30 manat pulu yığıb. Asif isə bu qanunsuzluğa etiraz edib. Onun haqqı deməsi Xüsusi Dövlət Mühafizə Xidmətinin rəhbərliyinin maraqlarına uyğun olmayıb. Ona görə də oğlumu 2011-ci ildə xüsusi maddə ilə işdən çıxarıb. Asif bundan sonra hüquqlarının bərpası uğrunda mübarizə aparıb. Məhkəməyə müraciət edib, üzləşdiyi haqsızlıqla bağlı mətbuata məlumat verib. Vaqif Axundov qəzetlərdə adının hallanmasından qəzəblənərək sifarişlə oğlumu həbs etdirib. İşdən çıxarılmasından 1 ildən artıq vaxt keçəndən sonra barəsində 228.1.9 (odlu silah saxlamaq və gəzdirmə) və 232.2.3 (vəzifə səlahiyyətindən sui-istifadə etməklə odlu silah və partlayıcı qurğular tələb etmək) maddələrilə qondarma cinayət başladıldı. Guya Asif xidmət zamanı iş yoldaşının gülləsini oğurlayıb. Halbuki Asif həmin gülləni tapmışdı və Xüsusi Dövlət Mühafizə Xidmətinin daxili təhqiqat şöbəsinə təşvil vermişdi. Əgər Asifin əməlində cinayət tərkibi var idisə niyə həmin vaxt məsuliyyətə cəlb olunmurdu? Niyə Vaqif Axundovun qanunsuz əməllərinə qarşı çıxdıqdan sonra onun barəsində cinayət işi başladılar?! Bütün bunlar onu göstərir ki, Asifin heç bir təqsiri yoxdur, sadəcə haqqını tələb etdiyinə görə Vaqif Axundovun hədəfinə gəlib".
Asif Lətifovun vəkili Fərzalı İbrahimov da müdafiə etdiyi şəxsin əsassız olaraq həbs edildiyini bildirib. Vəkil deyib ki, Asif Lətifovun əməlində cinayət tərkibi yoxdur. "Digər tərəfdən Asif Lətifov barəsində hökm çıxarılan zaman yüngülləşdirici hallar nəzərə alınmayıb. Məsələn, Asif Lətifov 2-ci qrup əlildir. Lakin buna əhəmiyyət verilməyib", deyə vəkil vurğulayıb.
Hüquq müdafiəçisi Vidadi İsgəndərov Asif Lətifovun ona da müraciət etdiyini diqqətə çatdıraraq məsələni araşdırdığını deyib: "İşlə tanış olduqda adam dəhşətə gəlir. Heç bir günahı olmaya-olmaya bir insanı 5 il 6 ay azadlıqdan məhrum ediblər. Bu fakt bir daha göstərir ki, məhkəmələr məmurların əlində oyuncaqdır. Kim nə sifariş verirsə, onu da edirlər".
Vidadi İsgəndərli əlavə edib ki, Asif Lətifovla bağlı məsələni beynəlxalq təşkilatların diqqətinə çatdıracaq: "Asif Lətifov haqsızlığın qurbanı olub. Rüşvətə, korrupsiyaya qarşı çıxdığına görə işdən çıxarılıb və sonra da həbs edilib. Mən bu məsələni beynəlxalq təşkilatların nümayəndələri ilə görüşlərimdə onların diqqətinə çatdıracam. Qoy bu məsələni nəzarətə götürsünlər".
Fuad